1 Inaha ho’i, tē fātata mai ra te mahana mai te umu ra i te ’amara’a ; ’e te feiā te’ote’o ato’a ra, ’oia ïa, ’e ’o rātou pā’āto’a ’o tei rave i te parauti’a ’ore ra, e riro ïa ’ei ’aihere ; e ’ama rātou ’ia tae i taua mahana ra, tē nā reira mai ra te Fatu Sabaota ra ; e ’ore roa e fa’atoehia tō rātou a’a ’e e ’ore ato’a te ’āma’a.

2 ’O ’outou rā ’o tei mata’u mai i tō’u nei i’oa, e fā mai ïa te Tamaiti o te Parautia ia ’outou ma te ora i raro a’e i tōna ra pererau ; ’e e haere ho’i ’outou i rāpae, ’e e tupu ho’i ’outou mai te mau fanau’a pua’atoro fa’a’amu i roto i te ’ōpiha ra.

3 ’E nā ’outou ho’i e ta’ata’ahi i te feiā parauti’a ’ore ; nō te mea e riro rātou mai te rehu auahi i raro a’e i te ’apu o tō ’outou ’āvae ’ia tae i te mahana e rave ai au i te reira, tē nā reira mai ra te Fatu Sabaota ra.

4 ’A ha’amana’o ’outou i te ture a tō’u tāvini ra ’o Mose, ’o tā’u i hōro’a atu ’ei fa’auera’a iāna i Horeba ra nā tō ’Īserā’ela tā’āto’a, ē tae noa atu i te mau ture ’e te mau parau.

5 Inaha, e tono atu vau i te peropheta ra ia Eliaha ia ’outou na, hou te taera’a mai o te mahana rahi ’e te mata’u o te Fatu ;

6 ’Ia fa’afāriu ’oia i te ’ā’au o te mau metua i te mau tamari’i, ’e te ’ā’au o te mau tamari’i i tō rātou mau metua, ’o te haere mai ho’i au e tā’iri i te fenua nei i te ’anatemara’a.