1 ’E i reira e tupu ai tei pāpa’ihia ra : ’A hīmene, e te vahine u’i, ’o ’oe tei ’ore i fānau ; ’a ha’apūai na i te hīmene, ’a pi’i ma te reo pūai, ’o ’oe ’o tei ’ore i māuiui fānau i te tamari’i ; nō te mea ’ua rahi atu ho’i tā te vahine u’i ra mau tamari’i i tā te vahine fa’aipoipohia ra, tē nā reira mai ra te Fatu.

2 ’A fa’arahi i te vāhi nō tō ’oe ra ti’ahapa ; ’e ’a tu’u atu ia rātou ’ia ha’amāhorahora i te mau pāruru nō tō ’oe vāhi fa’aeara’a ; ’eiaha e fa’aherehere ; ’a fa’aroa i tā ’oe mau taura, ’e ’a ha’apa’ari i tā ’oe mau titi.

3 E tupu ho’i ’oe i te rahi, i te pae ’atau ’e i te pae ’aui, ’e e fatu tō ’oe ra hua’ai i te mau fenua o te mau ’Ētene, ’e e ta’atahia te mau ’oire pau ra ia rātou.

4 ’Eiaha e mata’u ; e ’ore ho’i ’oe e ha’amā ; e ’ore ho’i ’oe e ha’amouhia ; e ’ore ho’i ’oe e fa’aha’amāhia ; e mo’e ho’i ia ’oe te ha’amāra’a nō tō ’oe ’āpīra’a, ’e e ’ore ho’i ’oe e ha’amana’o i te parau fa’a’ino nō tō ’oe ’āpīra’a, ’e e ’ore ho’i ’oe e ha’amana’o fa’ahou i te parau fa’a’ino nō tō ’oe huru vahine ivi.

5 ’O tei hāmani ho’i ia ’oe ra, ’o tō tāne ïa, ’o te Fatu Sabaota tōna i’oa ; ’e ’o tō ’oe Tāra’ehara, Tei Mo’a i ’Īserā’ela nei—o te Atua ïa nō te mau fenua tā’āto’a nei tōna i’oa.

6 ’Ua pi’i ho’i te Fatu ia ’oe mai te hō’ē vahine fa’aru’ehia ra, ’e ’ua ’oto noa tōna vārua, e mai te vahine i fa’aipoipo-’āpī-hia, ’a fa’aru’ehia ai ’oe ra, tē nā reira mai ra tō Atua.

7 Nō te hō’ē taime poto noa ho’i tō’u fa’aru’era’a ia ’oe ; e ha’aputuputu mai rā vau ia ’oe ma te aroha rahi.

8 Nō te riri ’ū’ana iti i huna ai au i tō’u mata ia ’oe nō te taime poto, nō te maita’i mure ’ore rā e fa’atae atu ai au i tō’u aroha i ni’a ia ’oe, tē nā reira mai ra te Fatu tō ’oe Tāra’ehara.

9 Nō teie, mai te mau pape i te ’anotau ia Noa ra, ’e mai tā’u ho’i i tapu e ’ore roa te mau pape mai te tau ia Noa ra e tāpo’i fa’ahou i te fenua, ’e mai te reira ato’a tā’u nei tapura’a e ’ore roa vau e riri ia ’oe na.

10 E ta’a ’ē atu ho’i te mau mou’a ’e e fa’anu’uhia ho’i te mau ’āivi, ’āre’a rā tō’u nei maita’i e ’ore roa ïa e ta’a ’ē atu ia ’oe, e ’ore ato’a te fafaura’a nō tō’u nei hau e ta’a ’ē atu, tē nā reira mai ra te Fatu ’o tei aroha mai ia ’oe.

11 E o ’oe tei ro’ohia e te ’ati e tei tā’irihia e te vero, ’e ’aita roa ho’i i tāmāhanahanahia ! Inaha, e ha’amau vau i tā ’oe ra mau ’ōfa’i i te pu’a ’una’una, ’e tō ’oe ra mau niu i te mau saphira.

12 ’E e hāmani au i tō ’oe ra mau ha’amāramarama i te kadakada, ’e tō ’oe ra mau ’ūputa i te bereketa, ’e tō ’oe ra mau ’ōti’a ato’a i te mau ’ōfa’i maitata’i.

13 ’E te mau tamari’i ato’a nā ’oe ra, e ha’api’ihia ïa e te Fatu ; ’e e rahi te hau tō te mau tamari’i nā ’oe ra.

14 E ha’apāpūhia ’oe i te parauti’a ; e ātea ’ē roa ’oe i te hāmani-’ino-ra’a nō te mea e’ita ’oe e mata’u, ’e e ātea ’ē ho’i te mata’u rahi nō te mea e’ita te reira e fa’afātata mai ia ’oe.

15 Inaha, e ha’aputuputu tāhō’ē mai ho’i rātou nō te ’aro atu ia ’oe, ’eiaha rā nā roto i tō’u nei hina’aro ; ’e ’o rātou ’o tē ha’aputuputu tāhō’ē nō te ’aro atu ia ’oe ra, e hi’a ïa ’ia maita’i ’oe.

16 Inaha, nā’u i hāmani i te ta’ata tūpa’i ’āuri ’o tei puhipuhi i te ’ārahu e ’ama a’era, ’e ’ua hāmani ihora ’oia i te hō’ē mauha’a nō tāna ’ohipa ; ’e nā’u ho’i i hāmani i te ta’ata ha’amāu’a nō te ha’amou.

17 ’Aita roa te hō’ē mauha’a tama’i i hāmanihia nō te ’aro atu ia ’oe e manuia ; ’e te mau vaha ato’a e fa’a’ino mai ia ’oe nā roto i te ha’avāra’a, ’o tā ’oe ïa e fa’ahapa atu. ’O te ’āi’a teie o te mau tāvini o te Fatu, ’e tō rātou parauti’a nō ’ō nei atu ïa iā’u nei, tē nā reira mai ra te Fatu.