1 ’E i muri a’era, ’ua fa’aro’ohia te hō’ē reo i rotopū i te mau ta’ata ato’a o te ao nei, i ni’a i teie fenua ē hope roa a’e, i te nā-’ō-ra’a ē :

2 ’Auē ho’i ē, ’auē ho’i ē, ’auē ho’i teie nei feiā ē ; ’auē ho’i te mau ta’ata o te ao ato’a nei ’ia ’ore rātou ’ia tātarahapa ; te ’ata’ata ra ho’i te diabolo, ’e tē ’oa’oa ra ho’i tāna mau melahi nō te pohe o te mau tamāroa ’e te mau tamāhine nehenehe a tō’u nei feiā ; ’e nō tā rātou mau ’ohipa ’ī’ino ’e te mau ’ohipa vi’ivi’i ho’i i pohe ai rātou ra !

3 Inaha, ’ua pau taua ’oire rahi ra o Zarahemela iā’u i te auahi, ’e te mau ta’ata ato’a ho’i i roto ra.

4 ’E inaha, taua ’oire rahi ra o Moroni, ’ua fa’atomohia ïa e au i raro i te miti hōhonu, ’e ’ua paremo te mau ta’ata i roto ra.

5 ’E inaha, taua ’oire rahi ra o Moroniha, ’ua tāpo’ihia ïa e au i te repo fenua, ’e te mau ta’ata ato’a i reira, ’ia hunahia tā rātou mau ’ohipa ’ī’ino ’e tā rātou mau ’ohipa vi’ivi’i mai mua atu i tō’u aro, ’ia ’ore te toto o te mau peropheta ’e te feiā mo’a e pi’i fa’ahou mai iā’u nō te fa’ahapa ia rātou.

6 ’E inaha, te ’oire ra nō Gilagala ’ua fa’atomohia ïa e au, ’e te mau ta’ata ato’a i roto ra, ’ua hunahia ïa e au i raro roa i te mau hōhonura’a o te fenua.

7 ’Oia ïa, ’e te ’oire ra nō Oniha ’e te mau ta’ata i roto ra, ’e te ’oire ra nō Mokuma ’e te mau ta’ata i roto ra, ’e te ’oire ra nō Ierusalema ’e te mau ta’ata i roto ra ; nā’u i ha’apu’e i te mau pape i ni’a iho ia rātou nō te huna i tā rātou mau ’ohipa ’ī’ino ’e te mau ’ohipa vi’ivi’i mai mua atu i tō’u nei aro, ’ia ’ore te toto o te mau peropheta ’e tō te feiā mo’a ’ia pi’i fa’ahou mai iā’u nō rātou.

8 ’E inaha, te ’oire ra nō Gadianedi, ’e te ’oire ra nō Gadiomena, ’e te ’oire ra nō Iakoba, ’e te ’oire ra nō Gimigimino, ’ua fa’atomohia ïa rātou ato’a e au, ’e te mau ’āivi ’e te mau peho ’o tā’u ïa i tu’u i ni’a iho ia rātou, ’e te mau ta’ata i reira, ’o tā’u ïa i tanu i raro roa a’e i te fenua, nō te tāpo’i i tā rātou mau ’ohipa ’ī’ino ’e te mau ’ohipa vi’ivi’i mai mua atu i tō’u nei aro, ’ia ’ore te toto o te mau peropheta ’e tō te feiā mo’a ’ia pi’i fa’ahou mai iā’u nō te fa’ahapa atu ia rātou.

9 ’E inaha ; taua ’oire rahi ra o Iakobugata, ’o tei pārahihia e te feiā nō te ari’i ra o Iakoba, ’ua pau ïa iā’u i te auahi, nō tā rātou mau hara ’e tā rātou mau ’ohipa ’ī’ino, ’o tei hau atu i te mau ’ohipa ’ī’ino ato’a a tō te ao ato’a nei, nō tā rātou mau taparahira’a huna i te ta’ata ’e nō te mau pupu ’ohipa huna ; ’e nā rātou ho’i i ha’amou i te hau o tō’u ra mau ta’ata ’e te fa’aterera’a hau o te fenua ; nō reira ’ua pau rātou iā’u i te auahi, nō te ha’amou ia rātou mai mua i tō’u nei aro, ’ia ’ore te toto o te mau peropheta ’e te feiā mo’a e pi’i fa’ahou mai iā’u nō te fa’ahapa atu ia rātou.

10 ’E inaha, te ’oire ra nō Lamana, ’e te ’oire ra nō Iosa, ’e te ’oire ra nō Gada, ’e te ’oire ra nō Kisakumena, ’ua pau ïa iā’u i te auahi ’e te ta’ata ho’i i roto ra, nō tā rātou ’ohipa ’ī’ino i te ti’avarura’a atu i te mau peropheta i rāpae, ’e nō tā rātou pēhira’a atu i te ’ōfa’i i te feiā ’o tā’u i tono atu nō te fa’a’ite atu ia rātou i tā rātou ’ohipa ’ī’ino ’e tā rātou mau ’ohipa vi’ivi’i.

11 ’E nō te mea ’ua ti’avaru atu rātou ia rātou pā’āto’a i rāpae, ’e nō reira ’aita e ta’ata parauti’a fa’ahou i rotopū ia rātou, ’e ’ua ha’ama’iri atu vau i te auahi i raro nō te ha’amou ia rātou, ’ia hunahia tā rātou mau ’ohipa ’ī’ino ’e tā rātou mau ’ohipa vi’ivi’i mai mua atu i tō’u nei aro, ’ia ’ore te toto o te mau peropheta ’e te feiā mo’a ’o tā’u i tono atu i rotopū ia rātou ra ’ia pi’i fa’ahou mai mai te repo mai iā’u nei nō te fa’ahapa atu ia rātou.

12 ’E e rave rahi te mau ha’amoura’a ’o tā’u i ha’ama’iri atu i ni’a iho i teie nei fenua ’e i ni’a iho i teie nei feiā, nō tā rātou mau ’ohipa ’ī’ino ’e tā rātou mau ’ohipa vi’ivi’i.

13 ’E ’outou tei fa’ahereherehia mai te pohe mai nō te mea ’ua hau tō ’outou parauti’a i tō rātou, ’aita ānei ’outou e fāriu mai iā’u i teienei, ’e ’ia tātarahapa ho’i i tā ’outou mau hara, ’e ’ia fa’afāriuhia mai, ’ia fa’aorahia ’outou e au ra ?

14 ’Oia ïa, ’oia mau, tē parau atu nei au ia ’outou na, ’ia haere mai ’outou iā’u nei ra, e roa’a ïa ia ’outou te ora mure ’ore. Inaha, ’ua fa’atorohia atu tō’u nei rima nō te aroha ia ’outou na, ’e ’o ’oia ’o tē haere mai iā’u nei ra, ’o tā’u ïa e fāri’i ; ’e e ha’amaita’ihia rātou ’o tē haere mai iā’u nei.

15 Inaha, ’o vau nei ’o Iesu Mesia, te Tamaiti a te Atua. Nā’u i hāmani i te mau ra’i ’e te fenua nei, ’e te mau mea ato’a i roto ra. Tei te Metua ra vau i te mātāmua ra. Tei roto vau i te Metua, ’e tei roto te Metua iā’u ; ’e nā roto iā’u nei ’ua fa’ahanahana te Metua i tōna i’oa.

16 I haere mai na vau i tō’u ihora mau ta’ata, ’e ’aita tō’u ihora mau ta’ata i fāri’i mai iā’u nei. ’E ’ua tupu te mau parau i roto i te mau pāpa’ira’a mo’a nō tō’u ra taera’a mai.

17 ’E ’o rātou pā’āto’a ’o tei fāri’i mai iā’u ra, ’o rātou ïa tā’u e hōro’a atu ’ia riro ’ei mau tamari’i tamāroa nā te Atua ; ’e e nā reira ato’a atu vau i te feiā ato’a e ti’aturi i tō’u ra i’oa, inaha ho’i, nā roto iā’u e tae mai ai te fa’aorara’a, ’e nā roto ho’i iā’u nei e fa’ati’ahia ai te ture a Mose ra.

18 ’O vau te māramarama ’e te ora o te ao nei. ’O vau te Alepha ’e te Omega, te mātāmeha’i ’e te fa’ahope’a.

19 ’Eiaha ’outou e pūpū fa’ahou mai iā’u nei i te tusia ha’amani’ira’a toto ; ’oia ïa, ’ia fa’a’orehia tā ’outou mau tusia ’e tā ’outou mau ō tāauahi, e ’ore roa ho’i au e fāri’i fa’ahou i tā ’outou mau tusia ’e tā ’outou mau ō tāauahi.

20 ’E e pūpū mai ’outou iā’u nei i te tusia nō te ’ā’au ’oto ’e te vārua tātarahapa. ’E ’o ’oia ’o tē haere mai iā’u nei ma te ’ā’au ’oto ’e te vārua tātarahapa ra, ’o tā’u ïa e bāpetizo i te auahi ’e te Vārua Maita’i mai te mau ’āti Lamana ra ’o tei bāpetizohia i te auahi ’e i te Vārua Maita’i, nō tō rātou fa’aro’o iā’u nei i te tau i fa’afāriuhia mai ai rātou ra, ’aita rā rātou i ’ite i te reira.

21 Inaha, ’ua haere mai au i roto i te ao nei nō te ’āfa’i mai i te fa’aorara’a i tō te ao nei, nō te fa’aora i tō te ao nei i tā rātou mau hara.

22 Nō reira, ’o ’oia ’o tē tātarahapa ’e ’o tē haere mai iā’u nei mai te hō’ē tamari’i ’aru’aru ra, ’o ’oia ïa tā’u e fāri’i, ’e nōna ho’i te bāsileia o te Atua ra. Inaha, nō rātou ’ua tu’u vau i tō’u nei ora i raro, ’e ’ua rave fa’ahou mai au i te reira ; nō reira ’a tātarahapa, ’e ’a haere mai iā’u e tō te mau hope’a o te fenua nei, ’e ’ia fa’aorahia ’outou.