1 ’E i teienei, i muri a’era, i te hō’ē ’ahuru ’e ma ono o te matahiti i muri a’e i te taera’a mai o te Mesia, ’ua fāri’i Lakoneusa, te tāvana o te fenua, i te hō’ē ’episetole nō ’ō mai i te ta’ata fa’atere ’e te tāvana nō te pupu ’eiā haru ; e teie te mau parau i pāpa’ihia, ’o tei nā ’ō mai ē :

2 E Lakoneusa, te tāvana fa’ahiahia rahi o te fenua, inaha, tē pāpa’i atu nei au i teie nei ’episetole ia ’oe na, ’e tē ’ārue rahi nei au ia ’oe nō tō ’oe ha’apa’o maita’i, ’e nō te ha’apa’o maita’i ato’a o tō ’oe mau ta’ata, i te tāpe’a-māite-ra’a i tei mana’ohia e ’outou nō tō ’outou ti’ara’a ’e ti’amāra’a ; ’oia ïa, ’ua tāpe’a māite ’outou, mai te mea ra ē, ’ua turuhia ’outou e te rima o te hō’ē atua, nō te pāruru i tō ’outou ti’amāra’a, ’e tā ’outou tao’a, ’e tō ’outou fenua, ’e ’aore rā ’o tei parauhia e ’outou ē, nō ’outou mau iho ā.

3 ’E tē ’oto nei au ia ’oe, e te ta’ata fa’ahiahia rahi e Lakoneusa, ’o ’oe i riro ’ei mea ma’ama’a i te mana’ora’a ē, e ti’a ia ’oe ’ia ’aro mai i te mau ta’ata pūai e rave rahi i raro a’e i tā’u nei fa’aterera’a, ’o tei ineine i teienei ’e tā rātou mau mauha’a tama’i, ’e ’o tē tīa’i ra ma te ’ana’anatae rahi i te parau ē—’A haere atu i raro ’e ’a ’aro atu i te mau ’āti Nephi ’e ’a ha’amou ia rātou.

4 ’E ’ua ’ite au i tō rātou vārua vī ’ore, ’e ’ua fa’a’ite mai rātou i tō rātou iho huru i ni’a i te tahua ’arora’a, ’e ’ua ’ite ato’a vau i tō rātou ’ino’ino mure ’ore ia ’outou, nō te mau mea hape e rave rahi tā ’outou i rave i ni’a ia rātou, nō reira mai te mea e haere mai rātou e ’aro ia ’outou, e ha’amou roa rātou ia ’outou.

5 Nō reira, ’ua pāpa’i au i teie nei ’episetole, ma te tītiro i te reira i tō’u iho rima, ma te aroha ia ’outou nō tō ’outou ’āueue ’ore i te ti’aturira’a i te mea ’o tā ’outou i ti’aturi e mea ti’a, ’e nō tō ’outou ’ā’au itoito i ni’a i te tahua nō te ’arora’a.

6 Nō reira tē pāpa’i atu nei au ia ’oe na, ma te hina’aro ’ia tu’u mai ’outou ia ’outou i roto i te rima o tō’u nei feiā, ’e tō ’outou mau ’oire, ’e tō ’outou mau fenua, ’e tā ’outou mau tao’a, ’ia ’ore rātou ’ia haere mai e ’aro ia ’outou i tā rātou ’o’e ’e ’a fa’atae atu ai i te ha’amoura’a i ni’a ia ’outou.

7 Terā te tahi parau, ’a tu’u mai ia ’outou iho ia mātou nei, ’e ’a ’āmui mai ia mātou nei ’e ’a ha’amātau ia ’outou i tā mātou mau ’ohipa huna, e fa’ariro ia ’outou ’ei mau taea’e nō mātou ’e ’ia riro mai ia mātou nei te huru—’eiaha ’ei mau tītī nā mātou, ’ei mau taea’e rā ’e ’ei mau hoa nō mātou i te pae’au nō tā mātou mau tao’a ato’a.

8 ’E inaha, tē tapu nei au i te hō’ē tapura’a ia ’oe, mai te mea e nā reira ’outou, e ’ore roa ’outou e ha’amouhia ; ’ia ’ore rā ’outou e nā reira, tē tapu nei au i te hō’ē tapura’a ia ’outou, ’ia tae i te ’āva’e i mua nei e fa’aue atu vau i tō’u nei mau nu’u fa’ehau ’ia haere atu e ’aro ia ’outou, e ’ore roa rātou e tāpe’a i tō rātou rima ’e e ’ore roa ho’i rātou e fa’aora noa ia ’outou, e taparahi rā rātou ia ’outou, ’e e ha’ama’iri mai rātou i te ’o’e i ni’a ia ’outou ē tae roa ’ua mou roa ’outou.

9 ’E inaha, ’o vau nei ’o Gidiani ; ’e ’o vau nei te tāvana nō teie pupu ’ohipa huna a Gadianetona ; ’e ’ua ’ite au e mea maita’i te mau ’ohipa a teie pupu ; ’e nō te ’anotau tahito mai te reira ’e ’ua fa’atae-roa-hia mai te reira ia mātou nei.

10 ’E tē pāpa’i atu nei au i teie nei ’episetole ia ’oe na, e Lakoneusa, ’e tē ti’aturi nei au e hōro’a mai ’outou i tō ’outou mau fenua ’e tā ’outou mau tao’a, ’ia ’ore te toto ’ia ha’amani’ihia, ’e ’ia roa’a fa’ahou mai i tō’u nei mau ta’ata tō rātou ti’amāra’a ’e te fa’aterera’a hau fenua, ’o rātou teie ’o tei tāiva ’ē ia ’outou nō tā ’outou mau ’ohipa ’ī’ino i te ravera’a atu i tō rātou ti’amāra’a nō te fa’atere i te hau fenua, ’e ’ia ’ore ’outou ’ia rave i te reira, e tāho’o atu vau i tā rātou ra mau hāmani-’ino-ra’a. ’O vau nei ’o Gidiani.

11 ’E i teienei, i muri a’era, i tō Lakoneusa fāri’ira’a i teie ’episetole, ’ua māere roa ihora ’oia nō te mata’u ’ore o Gidiani i te tītaura’a ’ia hōro’a atu i te fenua o te mau ’āti Nephi, ’e ’oia ato’a ho’i nō te ha’amata’ura’a ho’i i te mau ta’ata ’e nō te tāho’ora’a i te mau hāmani-’ino-ra’a i te feiā ’o tei ’ore i hāmani-’ino-hia ra, maori rā ’ua hāmani ’ino rātou ia rātou iho nā roto i tā rātou tāiva-’ē-ra’a ’e te ’āmuira’a atu i te mau ta’ata ’eiā haru parauti’a ’ore ’e te vi’ivi’i.

12 I teienei, inaha, ’ua riro teie ta’ata ’o Lakoneusa, te tāvana rahi, ’ei ta’ata parauti’a, ’e ’aita ’oia i mata’u i te mau tītaura’a ’e te mau parau ha’amata’u a te ta’ata ’eiā haru ; nō reira ’aita ’oia i ha’apa’o i te ’episetole a Gidiani, te tāvana o te feiā ’eiā haru, ’ua fa’aue rā ’oia i tōna mau ta’ata ’ia ti’aoro atu i te Fatu nō te fāri’i i te pūai i te taime e pou mai ai te feiā ’eiā haru i raro nō te ’aro mai ia rātou.

13 ’Oia ïa, ’ua fa’atae ’oia i te hō’ē fa’a’itera’a mana i rotopū i te mau ta’ata ato’a, ’ia ha’aputuputu mai rātou i tā rātou mau vahine, ’e tā rātou mau tamari’i, ’e tā rātou mau nana māmoe ’e tā rātou mau nana pua’atoro, ’e tā rātou mau tao’a ato’a i te vāhi hō’ē, maori rā tō rātou fenua.

14 ’E ’ua fa’aue atu ra ’oia ’ia patuhia te mau pā ma te ha’a’ati ia rātou, ’e ’ia rahi roa tō te reira pa’ari. ’E ’ua fa’aue ato’a atu ra ’oia ’ia fa’ata’ahia te tahi mau nu’u fa’ehau o te mau ’āti Nephi ’e te mau ’āti Lamana ’e ’aore rā ia rātou pā’āto’a ’o tei tai’ohia i rotopū i te mau ’āti Nephi, ’e ’ia fa’ata’ahia rātou ’ei mau tīa’i nō te pāruru ia rātou, ’e nō te tīa’i ia rātou i te pō ’e te ao i te feiā ’eiā haru.

15 ’Oia ïa, ’ua parau atu ra ’oia ia rātou : Mai te Fatu e ora ra, ’ia ’ore ’outou ’ia tātarahapa i tā ’outou mau ’ohipa ’ī’ino ato’a, ’e ’ia ti’aoro atu i te Fatu, e ’ore roa ’outou e fa’aorahia i te rima o te feiā ’eiā haru o Gadianetona.

16 E mea rahi roa ’e e mea fa’ahiahia roa te mau parau ’e te mau tohura’a a Lakoneusa ’e ’ua fa’atae atu te reira i te mata’u i ni’a i te mau ta’ata ato’a ; ’e ’ua fa’aitoito a’era rātou ma tō rātou pūai ’ia ha’apa’o i te mau parau a Lakoneusa.

17 ’E i muri a’era, ’ua mā’iti Lakoneusa i te mau ra’atira rahi i ni’a i te mau nu’u fa’ehau ato’a o te mau ’āti Nephi, nō te fa’atere ia rātou i te taime e tae mai ai te feiā ’eiā haru i raro, mai te mēdēbara mai, nō te ’aro ia rātou.

18 I teienei, ’ua mā’itihia te ra’atira rahi roa atu i rotopū i te mau ra’atira rahi ato’a ’e te mau ta’ata fa’atere rahi ato’a o te mau nu’u fa’ehau o te mau ’āti Nephi, ’e tōna i’oa ra o Gidigidoni ïa.

19 I teienei, e peu mātauhia i rotopū i te mau ’āti Nephi ato’a ’ia mā’iti i tō rātou mau ra’atira rahi, te hō’ē ta’ata tei roto iāna te vārua nō te heheura’a ’e nō te tohura’a ato’a (maori rā i te mau tau nō tō rātou parauti’a ’ore) ; nō reira, ’o teie Gidigidoni te hō’ē peropheta rahi i rotopū ia rātou, mai te ha’avā rahi ato’a ho’i.

20 I teienei, ’ua parau atu ra te mau ta’ata ia Gidigidoni : ’A pure i te Fatu, ’e haere ana’e tātou i ni’a i te mau mou’a ’e i roto i te mēdēbara, ’ia ti’a ia tātou ’ia ’aro atu i te feiā ’eiā haru, ’e ’ia ha’amou ia rātou i roto i tō rātou iho mau fenua.

21 ’Āre’a rā ’ua nā ’ō atu ra Gidigidoni ia rātou : ’Ua ’ōpani te Fatu ; ’e mai te mea e haere atu tātou nō te ’aro atu ia rātou, e tu’u atu ïa te Fatu ia tātou i roto i tō rātou rima ; nō reira e fa’aineine ïa tātou ia tātou iho i rōpū mau i tō tātou mau fenua, ’e e ha’aputuputu ’āmui mai tātou i tō tātou mau nu’u fa’ehau pā’āto’a, ’e ’aita tātou e haere atu e ’aro ia rātou, e tīa’i noa rā tātou ē tae noa atu ’ua haere mai rātou e ’aro ia tātou nei ; nō reira, mai te Fatu e ora nei, mai te mea e nā reira tātou i te rave, e tu’u mai ’oia ia rātou i roto i tō tātou nei rima.

22 ’E i muri a’era, ’ia tae a’era i te hō’ē ’ahuru ’e ma hitu o te matahiti, i te pae hope’a o te matahiti, ’ua tae te fa’a’itera’a mana a Lakoneusa i ni’a i te fenua tā’āto’a, ’e ’ua rave mai rātou i tā rātou mau pua’ahorofenua, ’e tā rātou mau pere’o’o, ’e tā rātou mau pua’atoro, ’e tā rātou mau nana māmoe pā’āto’a, ’e tā rātou mau nana pua’atoro, ’e tā rātou sītona, ’e tā rātou mau tao’a pā’āto’a, ’e ’ua haere atu rātou nā roto i te mau pupu hō’ē tauatini, ’e te mau pupu hō’ē ’ahuru tauatini, ē tae noa atu ’ua hope rātou pā’āto’a i te haere atu i te vāhi i fa’ata’ahia nō te ha’aputuputu ’āmui ia rātou, nō te pāruru atu ia rātou iho i tō rātou mau ’enemi.

23 ’E te fenua i fa’ata’ahia ’o te fenua ïa o Zarahemela, ’e te fenua i rōpū i te fenua nō Zarahemela ’e te fenua nō ’Auhune, ’oia ïa, ’e te ’ōti’a i rōpū i te fenua nō ’Auhune ’e te fenua nō Ano.

24 ’E tē vai ra e rave rahi tauatini ta’ata ’o tei parauhia e mau ’āti Nephi, ’o tei ha’aputuputu ’āmui mai ia rarou i teie nei fenua. I teienei ’ua fa’aue Lakoneusa ia rātou ’ia ha’aputuputu ’āmui mai rātou i te fenua i te pae apato’a, nō te ’anatemara’a rahi i tae mai i ni’a i te fenua i te pae apato’erau.

25 ’E ’ua pāruru ha’apa’ari rātou ia rātou iho i tō rātou mau ’enemi ; ’e ’ua pārahi ihora rātou i te fenua hō’ē ’e i roto i te pupu hō’ē, ’e ’ua mata’u ho’i rātou i te mau parau i parauhia e Lakoneusa ra, ’e nō reira ho’i ’ua tātarahapa rātou i tā rātou mau hara ato’a ; ’e ’ua fa’atae atu ra rātou i tā rātou mau pure i te Fatu tō rātou Atua, ’ia fa’aora mai ’oia ia rātou i te taime e tae mai ai tō rātou mau ’enemi nō te ’aro ia rātou.

26 ’E ’ua ’oto rahi rātou nō tō rātou mau ’enemi. ’E ’ua fa’aue atu ra Gidigidoni ’ia hāmani rātou i te mau mauha’a tama’i e rave rahi te huru, ’e ’ia pūai maita’i rātou i te ’ahu tama’i ’e i te mau pāruru tama’i rahi, ’e i te mau pāruru tama’i iti, ’e ’ia au i te huru nō tāna ha’api’ira’a ia rātou.