1 ’E i muri a’era, i te pae hope’a nō te hō’ē ’ahuru ’e ma va’u o te matahiti, ’ua fa’aineine taua mau pupu feiā ’eiā haru ra nō te ’arora’a, ’e ’ua ha’amata rātou i te haere mai i raro ma te rū mai ni’a mai i te mau ’āivi, ’e i rāpae i te mau mou’a, ’e te mau mēdēbara, ’e tō rātou mau ha’apūra’a pa’ari, ’e tō rātou mau vāhi tāpunira’a, ’e ’ua ha’amata rātou i te haru i te mau fenua, te fenua i te pae apato’a ’e te fenua i te pae apato’erau, ’e ’ua ha’amata rātou i te haru i te mau fenua ato’a ’o tei fa’aru’ehia e te mau ’āti Nephi, ’e te mau ’oire ato’a i fa’aru’ehia.

2 Inaha rā, ’aita e mau ’ānimara ’ōviri ’e ’aita ato’a e manu ’ōviri i taua mau fenua ra i fa’aru’ehia mai e te mau ’āti Nephi, ’e ’aita e manu ’ōviri nā te mau ta’ata ’eiā haru, maori rā i roto i te mēdēbara.

3 ’E ’aita roa e ti’a i te feiā ’eiā haru ’ia ora noa nō te mea ’aita e mā’a, maori rā i roto i te mēdēbara ; ’ua vaiiho ano noa te mau ’āti Nephi i tō rātou mau fenua, ’e ’ua ha’aputuputu i tā rātou mau nana māmoe ’e tā rātou nana pua’atoro ’e tā rātou mau huru tao’a ato’a i te vāhi hō’ē i reira rātou i pārahi ai.

4 Nō reira, ’aita roa e rāve’a e ti’a ai i te feiā ’eiā haru ’ia ’eiā nō te fāri’i i te mā’a, maori rā ’ia haere atu rātou e ’aro i te mau ’āti Nephi ; ’e ’ua ha’aputuputuhia te mau ’āti Nephi i te vāhi hō’ē, ’e e rave rahi rātou, ’e ’ua ha’aputu ato’a rātou i te mau huru mā’a ato’a nā rātou, ’e te mau pua’ahorofenua, ’e te mau pua’atoro, ’e te mau huru nana ’ānimara ato’a, ’ia ti’a ia rātou ’ia ora noa nō te ārea e hitu matahiti te maoro, ’e i roto i taua taime ra ’ua ti’aturi rātou ’ia ha’amou roa i te feiā ’eiā haru i ni’a i te fenua ē hope roa a’e ; ’e ’o te hope’a te reira nō te hō’ē ’ahuru ’e ma va’u o te matahiti.

5 ’E i muri a’era, i te hō’ē ’ahuru ’e ma iva o te matahiti ’ua ’ite ihora ’o Gidiani ē, e mea ti’a iāna ’ia haere atu e ’aro i te mau ’āti Nephi ; nō te mea ’aita atu e rāve’a e ti’a ai ia rātou ’ia ora noa, maori rā ’ia haru i te tao’a, ’ia ’eiā ’e ’ia taparahi i te ta’ata.

6 ’E ’aita roa rātou i hina’aro ’ia ha’apurara ia rātou nā ni’a i te fenua ’e ’ia fa’a’apu i te sītona, ’o tē haere mai te mau ’āti Nephi e taparahi ia rātou ; nō reira ’ua hōro’a atu Gidiani i te hō’ē fa’auera’a i tōna mau nu’u fa’ehau ’ia haere e ’aro i te mau ’āti Nephi i taua matahiti ra.

7 ’E i muri a’era, ’ua haere mai ra rātou nō te ’aro ; ’e ’o te ono teie o te ’āva’e ; ’e inaha, e mahana rahi ’e te ri’ari’a ïa ’a tae mai ai rātou nō te ’aro ; ’e ’ua tātuahia rātou mai te au i te peu a te feiā ’eiā haru ra ; e ’iri fanau’a māmoe tō tō rātou tau’upu, ’e ’ua paraihia te reira i te toto, ’e ’ua hahuhia tō rātou mau upo’o, e mau pāruru upo’o tō ni’a ia rātou ; e mea rahi ’e te ri’ari’a te huru o te mau nu’u fa’ehau o Gidiani ’ia hi’ohia atu nō tō rātou ’ahu tama’i ’e nō tō rātou paraira’ahia i te toto.

8 ’E i muri a’era, ’ia ’ite a’era te mau nu’u fa’ehau o te mau ’āti Nephi i te huru o te nu’u fa’ehau o Gidiani, ’ua ma’iri ihora rātou pā’āto’a i raro i te repo, ’e ’ua fa’ateitei a’era i tō rātou reo i te Fatu i tō rātou ra Atua, ’ia fa’aherehere ’oia ia rātou ’e ’ia fa’aora ia rātou i te rima o tō rātou mau ’enemi.

9 ’E i muri a’era, ’ia ’ite a’era te mau nu’u fa’ehau o Gidiani i te reira, ’ua ha’amata ihora rātou i te pi’i ma te reo rahi roa, nō tō rātou ’oa’oa, nō te mea ’ua mana’o rātou ē, ’ua ma’iri te mau ’āti Nephi i te mata’u nō te ri’ari’a rahi o tō rātou mau nu’u fa’ehau.

10 ’Āre’a rā ’ua hape roa rātou i taua mana’o ra, ’aita ho’i te mau ’āti Nephi i mata’u ia rātou ; ’ua mata’u rā rātou i tō rātou Atua ’e ’ua tāparu rātou iāna nō te fāri’i i te pārurura’a ; nō reira, i te haere-rū-ra’a mai te mau nu’u fa’ehau o Gidiani i ni’a ia rātou, ’ua ineine rātou nō te ’aro atu ia rātou ; ’oia ïa, nā roto i te pūai o te Fatu ’ua ’aro atu rātou ia rātou.

11 ’E ’ua ha’amata taua ’arora’a i te ono o te ’āva’e ; e mea rahi ’e te ri’ari’a taua ’arora’a ra, ’oia ïa, ’e e mea rahi ’e te ri’ari’a te taparahira’a ta’ata nā roto i taua ’arora’a ra, ’e nō reira ho’i ’aita roa e taparahira’a ta’ata rahi i ’itehia mai teie te huru i rotopū i te mau ta’ata o Lehi mai te tau i fa’aru’e ai ’oia i Ierusalema.

12 ’E noa atu ā te mau parau ha’amata’u ’e te mau tapura’a tā Gidiani i tapu, inaha, ’ua upo’oti’a te mau ’āti Nephi i ni’a ia rātou, ’e ’ua ’ōtohe rātou mai mua atu ia rātou.

13 ’E i muri a’era, ’ua fa’aue atu ra Gidigidoni i tōna mau nu’u fa’ehau ’ia a’ua’u ia rātou ē tae noa atu i te mau hiti nō te mēdēbara, ’e ’eiaha roa rātou e fa’aora noa i tei ma’iri mai i roto i tō rātou rima nā te pae ’ē’a ; ’e ’ua nā reira rātou i te a’ua’u ’e i te taparahi ia rātou, ē tae noa atu i te mau hiti o te mēdēbara, ’oia ïa, ē tae noa atu ’ua fa’ahope rātou i te fa’auera’a a Gidigidoni.

14 ’E i muri a’era, ’o Gidiani tei ti’a mai ’e tei ’aro mai ma te mata’u ’ore, ’e ’ua a’ua’uhia ’oia i tōna horora’a atu ; ’e nō tōna rohirohi i te tama’i-’ū’ana-ra’a, ’ua roa’ahia ’oia ’e ’ua taparahihia. ’E ’o te hope’a teie nō te ta’ata ’eiā haru ra o Gidiani.

15 ’E i muri a’era, ’ua ho’i fa’ahou mai ra te mau nu’u fa’ehau o te mau ’āti Nephi i tō rātou vāhi ha’apūra’a. ’E i muri a’era, ’o te hope’a ïa nō te hō’ē ’ahuru ’e ma iva o te matahiti, ’e ’aita te feiā ’eiā haru i haere fa’ahou mai nō te ’aro ; ’e ’aita ato’a rātou i haere fa’ahou mai i te piti ’ahuru o te matahiti.

16 ’E i te piti ’ahuru ’e ma hō’ē o te matahiti ’aita rātou i haere mai nō te ’aro, ’āre’a rā ’ua haere mai rātou nā te mau pae ato’a nō te ha’a’ati i te mau ta’ata o Nephi ; ’e ’ua mana’o ho’i rātou ē, mai te mea e fa’ata’a ’ē rātou i te mau ta’ata o Nephi i tō rātou mau fenua, ’e mai te mea e ha’a’ati noa rātou ia rātou i te mau pae ato’a, ’e mai te mea e fa’ata’a ’ē rātou ia rātou i te mau tauturura’a ato’a nō rāpae mai, e riro ïa rātou i te hōro’a mai ia rātou iho mai te au i tō rātou ihora mau hina’aro.

17 I teienei, ’ua mā’iti rātou i te tahi atu ā ta’ata fa’atere nō rātou iho, ’o Zemenariha tōna i’oa ; nō reira nā Zemenariha i fa’aue ’ia fa’atupuhia teie harura’a.

18 Inaha rā, e mea maita’i teie nō te mau ’āti Nephi ; nō te mea ’aita roa e ti’a i te feiā ’eiā haru ’ia tāpe’a ha’amaoro noa atu ā i te ha’a’atira’a i te mau ’āti Nephi nō te fa’atupu i te tahi fifi, nō te mea ’ua ha’aputu rahi rātou i te mā’a nā rātou.

19 ’E nō te mea ho’i e mea iti roa te mā’a a te feiā ’eiā haru ; inaha ho’i, ’aita tā rātou e mā’a, maori rā ’o te ’i’o ’ānimara ana’e ’o tei roa’a ia rātou i roto i te mēdēbara.

20 ’E i muri a’era, e mea iti roa te ’ānimara ’ōviri i roto i te mēdēbara, ’e nō reira ho’i ’ua fātata roa te feiā ’eiā haru i te pohe nō te poia.

21 ’E ’ua hāhaere tāmau noa te mau ’āti Nephi nā rāpae i te ao ’e i te pō, ma te ’aro atu i tō rātou mau nu’u fa’ehau, ’e ma te taparahi ia rātou ta’ihō’ē tauatini e ta’iahuru tauatini.

22 ’E nō reira, ’ua tupu a’era te hina’aro o te mau ta’ata o Zemenariha ’ia fa’a’ore i tā rātou ’ōpuara’a, nō te pau rahi i tae mai i ni’a ia rātou i te pō ’e i te ao ato’a ho’i.

23 ’E i muri a’era, ’ua fa’aue atu ra Zemenariha i tōna mau ta’ata ia ’ōtohe mai rātou mai te vāhi i haruhia, ’e ’ia haere atu i te mau tufa’a hope’a roa nō te fenua i te pae apato’erau.

24 ’E i teienei, nō te mea ’ua ’ite Gidigidoni i tā rātou ’ōpuara’a, ’e nō te mea ’ua ’ite ’oia i tō rātou paruparu nō te mā’a ’ore, ’e te pau rahi o te mau ta’ata i taparahihia i rotopū ia rātou, nō reira ’ua tono atu ra ’oia i tōna mau nu’u fa’ehau i te pō, ’e ’ua tāpū i te ’ē’a nō tō rātou ’ōtohera’a, ’e ’ua tu’u atu ra i tōna mau nu’u fa’ehau i te ’ē’a nō tō rātou ’ōtohera’a.

25 ’E ’ua rave rātou i te reira i te pō, ’e ’ua haere noa rātou e ma’iri atu i te feiā ’eiā haru, ’e ’ia ao a’era, ’a ha’amata ai te feiā ’eiā haru i te haere atu, ’ua ’arohia mai rātou e te mau nu’u fa’ehau o te mau ’āti Nephi i mua ’e i muri ato’a ho’i.

26 ’E te feiā ’eiā haru i te pae apato’a, ’ua tāpū-fa’ata’a-’ē-hia ïa i tō rātou mau vāhi ’ōtohera’a. ’E ’ua ravehia teie mau mea ato’a nā roto i te fa’auera’a a Gidigidoni.

27 ’E e rave rahi tauatini ’o tei hōro’a mai ia rātou iho ’ei feiā mau-’āuri nā te mau ’āti Nephi, ’e te toe’a o rātou ra, ’ua taparahihia ïa.

28 ’E ’ua ravehia tō rātou ta’ata fa’atere, ’o Zemenariha, ’e ’ua tārīhia i ni’a i te hō’ē tumu rā’au, ’oia ïa, i ni’a roa i te tumu rā’au ē tae noa atu ’ua pohe roa ’oia. ’E i tō rātou tārīra’a iāna ē tae roa atu ’ua pohe roa ’oia, ’ua tāpū ihora rātou i te tumu rā’au ’ia ma’iri i raro i te repo, ’e ’ua pi’i atu ra rātou ma te reo pūai, i te nā-’ō-ra’a ē :

29 ’Ia fa’aherehere te Fatu i tōna ra mau ta’ata i roto i te parauti’a ’e te ’ā’au mo’a, ’e ’ia ha’ama’irihia rātou pā’āto’a i raro i te repo, rātou ’o tē tītau ’ia taparahi nō te hina’aro ti’a ’ore i te mana ’e te mau pupu ’ohipa huna ; mai teie nei ta’ata i ma’iri i raro i te repo.

30 ’E ’ua ’oa’oa rātou ’e ’ua ti’aoro fa’ahou atu ra ma te reo hō’ē, i te nā-’ō-ra’a ē : ’Ia pāruru mai te Atua nō Aberahama, ’e te Atua nō Isaaka, ’e te Atua nō Iakoba i teie nei feiā i roto i te parauti’a, ’a tāmau noa ai rātou i te ti’aoro atu i te i’oa o tō rātou ra Atua nō te pārurura’a.

31 ’E i muri a’era, ’ua tāhō’ē rātou pā’āto’a i te hīmenera’a ’e i te ’āruera’a i tō rātou Atua nō te mea rahi tāna i rave nō rātou ra, nō te fa’ahereherera’a ia rātou ’ia ’ore rātou ’ia ma’iri atu i roto i te rima o tō rātou ra mau ’enemi.

32 ’Oia ïa, ’ua ti’aoro atu rātou, i te nā-’ō-ra’a ē : Hosana i te Atua Teitei Roa. ’E ’ua ti’aoro rātou i te nā-’ō-ra’a ē : ’Ia fa’ahanahanahia te i’oa o te Fatu te Atua Manahope, ’oia te Atua Teitei Roa ra.

33 ’E ’ua ’ī roa tō rātou ’ā’au i te ’oa’oa, ē tae noa atu ’ua tahe noa tō rātou mau roimata nō te maita’i rahi o te Atua, i te fa’aorara’a ia rātou i te rima o tō rātou mau ’enemi ; ’e ’ua ’ite rātou ē, nō tā rātou tātarahapara’a ’e tō rātou ha’eha’a i fa’aorahia ai rātou i te pohe mure ’ore ra.