1 ’Oia mau, ’oia mau, tē parau atu nei au, ’ua hina’aro vau ’ia hōro’a ’outou i te mau tao’a aroha nā te feiā veve ; ’a ara rā ’o te hōro’a ’outou i tā ’outou mau tao’a aroha i mua i te ta’ata, ’ia hi’ohia mai e rātou ; ’e ’ia nā reira ’outou ra, ’aore roa ïa tā ’outou e utu’a maita’i nō ’ō mai i tō ’outou Metua i te ao ra.

2 Nō reira, ’ia hōro’a ’oe i tā ’oe tao’a aroha, ’eiaha e fa’a’oto i te pū i mua ia ’oe, mai tā te feiā ha’avare i nā reira i roto i te mau sunago ’e i roto i te mau aroā, ’ia ha’amaita’ihia rātou e te ta’ata nei. ’Oia mau tē parau atu nei au ia ’outou na, ’ua noa’a ïa tā rātou utu’a.

3 ’Āre’a rā, ’ia hōro’a ’oe i tā ’oe tao’a aroha, ’eiaha tō rima ’aui ’ia ’ite i tā tō rima ’atau e rave ra.

4 ’Ia ravehia tā ’oe mau hōro’ara’a tao’a aroha nā roto i te mo’emo’e ; ’e nā tō Metua iho ’o tei ’ite mai i te reira nā roto i te mo’emo’e, e hōro’a fa’a’ite mai i tā ’oe utu’a.

5 ’E ’ia pure ’oe ra, ’eiaha ’oe e rave mai tā te feiā ha’avare ra, e mea au ho’i nā rātou ’ia pure, ma te ti’a noa i roto i te mau sunago ’e i roto i te mau poro aroā ra, ’ia hi’ohia mai rātou ’e te mau ta’ata. ’Oia mau tē parau atu nei au ia ’outou na, ’ua noa’a ïa tā rātou utu’a.

6 ’Āre’a rā ’ia pure ’oe ra, ’a haere atu i roto i tō ’oe piha, ’e ’a ’ōpani māite i tō ’oe ’ōpani ’a pure atu ai i tō ’oe Metua i roto i te vāhi mo’emo’e ; ’e nā tō ’oe Metua ’o tē ’ite mai ra nā roto i te vāhi mo’emo’e e hōro’a fa’a’ite mai i tā ’oe utu’a.

7 ’E ’ia pure ’outou ra, ’eiaha e fa’ahiti pinepine noa i te mau parau ri’i faufa’a ’ore, mai tā te feiā ’ētene ra ; ’o tei mana’o ē, e fa’aro’ohia mai rātou nā roto i te rahi o tā rātou mau parau.

8 ’Eiaha roa ’outou ’ia riro mai ia rātou ra, ’e ’ua ’ite ho’i tō ’outou Metua i te mau mea e au ia ’outou, hou ’outou i ani atu ai iāna.

9 E nā ’o ’outou ’ia pure : E tō mātou Metua i te ao ra, ’ia ra’a tō ’oe i’oa.

10 ’Ia ha’apa’ohia tō ’oe hina’aro i te fenua nei, mai tei te ao ato’a na.

11 E fa’a’ore mai i tā mātou hara, mai ia mātou ato’a e fa’a’ore i tei hara ia mātou nei.

12 ’E ’eiaha e fa’aru’e ia mātou ’ia ro’o-noa-hia e te ati, e fa’aora rā ia mātou i te ’ino.

13 Nō ’oe ho’i te hau, ’e te mana, ’e te hanahana, ē a muri noa atu. ’Āmene.

14 ’E ’ia fa’a’ore ho’i ’outou i tā te mau ta’ata ra mau hapa, e fa’a’ore ato’a mai tō ’outou Metua i te ao ra i tā ’outou.

15 ’Ia ’ore rā ’outou ’ia fa’a’ore i tā te mau ta’ata ra mau hapa, e ’ore ato’a tō ’outou Metua e fa’a’ore i tā ’outou mau hapa.

16 ’Oia fa’ahou, ’ia ha’apae ’outou i te mā’a, ’eiaha mai tā te feiā ha’avare, e fa’arumaruma ra i te mata, ’e tei fa’ahuru ’ē i tō rātou mata ’ia ’ite te ta’ata ē tē ha’apae ra rātou i te mā’a. ’Oia mau tē parau atu nei au ia ’outou na, ’ua noa’a ïa tā rātou utu’a.

17 ’Āre’a rā ’ia ha’apae ’oe i te mā’a, ’a tāhinu i tō ’oe upo’o, ’e ’a horoi i tō ’oe mata.

18 ’Ia ’ore tā ’oe ha’apaera’a mā’a ’ia ’itea e te ta’ata, e tō Metua rā i te vāhi mo’emo’e ; e nā tō Metua ’o tē ’ite mai ra nā te vāhi mo’emo’e e hōro’a fa’a’iete mai i tā ’oe utu’a.

19 ’Eiaha e ha’apu’e noa i te tao’a nā ’outou i teie nei ao, i te vāhi e pau ai i te huhu ’e te pē, i te vāhi e tomohia ai ’e e ’eiāhia ai e te feiā ’eiā.

20 ’A ha’apu’e rā i te tao’a nā ’outou i ni’a i te ra’i, i te vāhi e ’ore ai e pau i te huhu ’e te pē, e ’ore ho’i te feiā ’eiā e tomo i reira ’a ’eiā ai.

21 Te vāhi ho’i tei reira tā ’outou tao’a ra, tei reira ato’a ïa tō ’outou ’ā’au.

22 Te māramarama o te tino ra ’o te mata ïa ; nō reira, ’ia maita’i tō ’oe mata ra, e ’ī ïa tō ’oe tino tā’āto’a i te māramarama.

23 ’Āre’a rā ’ia vi’ivi’i tō ’oe mata ra, e ’ī ïa tō ’oe tino tā’āto’a i te pōiri. Nō reira, ’ia riro taua māramarama ra i roto ia ’oe ’ei pōiri, e aha ïa te rahi o taua pōiri ra !

24 ’Aita roa e ti’a i te hō’ē ta’ata ’ia tāvini e piti fatu ; e riro ’oia i te au ’ore atu i te hō’ē ’e i te hina’aro atu i te tahi, ’e ’aore rā i te au atu i te hō’ē ’e i te fa’aru’e atu i te tahi. ’Aita roa ho’i e ti’a ia ’outou ’ia tāvini i te Atua ’e ia Mamona.

25 ’E i teienei, i muri a’era, ’ia oti a’era tā Iesu paraura’a atu i taua mau parau nei, ’ua hi’o atu ra ’oia i te tino hō’ē ’ahuru ’e ma piti i mā’itihia e ana ra, ’e ’ua nā ’ō atu ra ia rātou : ’A ha’amana’o i te mau parau tā’u i parau iho nei. Inaha ho’i, ’o ’outou nei tei mā’itihia e au ’ia tāvini i teie nei feiā. Nō reira tē parau atu nei au ia ’outou na, ’eiaha e tapitapi tō ’outou mana’o nō ni’a i tō ’outou orara’a, i tā ’outou e ’amu, ’e ’aore rā i tā ’outou e inu ; ’eiaha ato’a nō ni’a i tō ’outou tino, i te ’ahu ’o tā ’outou e ’ō’omo. E ’ere ānei ’ua hau atu te ora i te mā’a, ’e te tino i te ’ahu ?

26 ’A hi’o na i te mau manu o te reva ; ’aore rātou e ueue, ’aore ho’i rātou e ’ō’oti, e ’aore ho’i a rātou fare ha’apu’era’a mā’a ; terā rā nā tō ’outou Metua i te ao ra i fa’a’amu ia rātou. ’aore ānei ïa ’outou i fāna’o rahi atu ā ia rātou ?

27 ’O vai ho’i tō ’outou e mana’o ra e ti’a iāna ’ia fa’aroa atu i tōna tino ’ia hō’ē a’e kubiti fa’ahou ?

28 ’E nō te aha ho’i tō ’outou mana’o i tapitapi ai i te ’ahu ? ’A feruri na i te mau lili o te ’āua e mea nāhea tō rātou tupura’a ; ’aore ho’i rātou e ’ohipa ra, ’e ’aore ho’i rātou e nino ra.

29 ’E terā rā tē parau atu nei au ia ’outou na, e mai ia Solomona, i roto i tōna hanahana tā’āto’a, ’aita roa ïa tōna ’ahu i au i te nehenehe i tō te hō’ē o rātou nei.

30 Nō reira, mai te mea e nā reira te Atua i te fa’a’ahu i te matie o te ’āua, ’o tē vai nei i teie mahana, e ananahi ra ’a hurihia atu ai i roto i te umu, ’oia ato’a e nā reira ’oia i te fa’a’ahu ia ’outou, mai te mea e ’ere tō ’outou i te fa’aro’o iti.

31 Nō reira ’eiaha e tapitapi tō ’outou mana’o, i te nā-’ō-ra’a ē : E aha tā mātou e ’amu ? ’e ’aore rā, E aha tā mātou e inu ? ’e ’aore rā, E aha tō mātou ’ahu ’ia ’ahu ?

32 ’Ua ’ite ho’i tō ’outou Metua i te ao ra ē, ’ua ti’a roa ’ia noa’a teie mau mea ato’a ia ’outou.

33 ’A ’imi na rā ’outou nā mua roa i te bāsileia o te Atua ’e te parauti’a nāna ; ’e e ’āmuihia mai teie mau mea ato’a ia ’outou na.

34 Nō reira ’eiaha e tapitapi tō ’outou mana’o i tō ananahi ra, nā ananahi ho’i e feruri i te mau mea nōna iho. ’Ua nava’i tō te hō’ē mahana iho fifi i te ha’ape’ape’a atu ā i te mea e tupu a muri iho.