Chiwedzerwa A

CheVabereki—Kugadzirira Vana Vako kuti Varambe Vari Mugwara reChibvumirano raMwari kweUpenyu Hwose

Nokuda kwokuti Vanokuda, vanovimba newe, uye vanoziva kwaniso yako, Baba Vokudenga vakakupa mukana wokubatsira vana vako kupinda nokufambira mberi nemugwara rechibvumirano Ravo, gwara rinoenda kuupenyu hwokusingaperi (ona Dzidziso neZvibvumirano 68:25–28). Izvi zvinosanganisira kuvabatsira kugadzirira kuita nokuchengeta zvibvumirano zvinoera, sezvakaita zvibvumirano zverubhabhatidzo uye nezvibvumirano zvinoitwa mutemberi. Kuburikidza nezvibvumirano izvi, vana vako vanozokwanisa kuzvibatanidza nemufaro kuMuponesi, Jesu Kristu.

Kune nzira dzakawanda dzokugadzirira vana vako nadzo kurwendo urwu pagwara rechibvumirano, uye Baba Vokudenga vanozokubatsira kuwana nzira yakanakisisa yokuvabatsira nayo. Apo paunenge uchitsvaka femero, chengeta mupfungwa kuti hadzisi dzidzo dzose dzinoitika munguva yezvidzidzo zvakarongwa. Chokwadi ndechokuti, chikamu cheizvo zvinoita kuti kudzidza kwekumba kuve nesimba guru kudaro ndechemukana wokudzidza nemuenzaniso uye kuburikidza nenguva dzokudzidzisa diki, dzakareruka—urwo rudzi runongoitika mukufamba kweupenyu hwezuva nezuva. Sezvazviri kuti kutevera gwara rechibvumirano muitiro wenguva dzose, weupenyu hwose, ndizvowo zvazviri nekudzidza pamusoro pegwara rechibvumirano. (Ona “Home and Family,” Teaching in the Savior’s Way [2022], 30–31.)

Pazasi pane mamwe mazano angangotungamirira kune imwezve kurudziro. Unokwanisa kuwana mamwe mazano akawanda ekudzidzisa vana vezera rePuraimairi “muChiwedzerwa B: ChePuraimari—Kugadzirira Vana kuti Varambe Vari Mugwara reChibvumirano raMwari kweUpenyu Hwose.”

Rubhabhatidzo neRusimbiso

Nifai akadzidzisa kuti “musuo uyo watinofanira kupinda nawo” mugwara rechibvumirano ndewe “rutendeuko norubhabhatidzo nemvura” (2 Nifai 31:17 Kuedza kwako kubatsira vana vako kugadzirira rubhabhatidzo nesimbiso kunokwanisa kumisa tsoka dzavo zvakasimba pagwara iroro. Kuedza uku kunotanga nekudzidzisa pamusoro perutendo muna Jesu Kristu uye rutendeuko. Kunosanganisirawo kudzidzisa pamusoro pamavandudziro atinoita zvibvumirano zverubhabhatidzo zvedu kuburikidza nokutora sakaramende vhiki yoga yoga.

Nifai akadzidzisa kuti “musuo uyo watinofanira kupinda nawo” mugwara rechibvumirano ndewe “rutendeuko norubhabhatidzo nemvura” (2 Nifai 31:17

Hechino chitsauko chegwaro dzvene chinokwanisa kukubatsira: 2 Nifai 31.

• Apo pose paunova nechiitiko chinosimbisa rutendo rwako muna Baba Vokudenga naJesu Kristu, chigoverane nemwana wako. Mubatsire kunzwisisa kuti rutendo chimwe chinhu chinokwanisa kuramba chichisimba nemuupenyu hwose. Ndezvipi zvimwe zvinhu mwana wako zvaanokwanisa kuita kuti akudziridze rutendo rwakanyanya kusimba muna Kristu asati abhabhatidzwa?

• Apo mwana wako paanoita sarudzo isiri kwayo, taura nemufaro pamusoro pechipo cherutendeuko. Uye apo iwe paunoita sarudzo isiri kwayo, govera mufaro unouya apo paunotendeuka. Pupura kuti nokuda kwokuti Jesu Kristu akatamburira nokufira zvivi zvedu, tinokwanisa kutendeuka zuva nezuva, toregererwa, uye togamuchira simba rokushanduka. Apo mwana wako paanotsvaka ruregerero, regerera wakasungunuka uye nemufaro.

• Taurira mwana wako pamusoro perubhabhatidzo rwako. Ratidza mifananidzo uye govera ndangariro. Taura pamusoro pemanzwiro awakaita, kuti kuchengeta zvibvumirano zverubhabhatidzo zvako kwakakubatsira sei kusvika pakuziva Jesu Kristu zvirinani, uye kuti zvibvumirano zvako zvinoramba zvichiropafadza upenyu hwako sei. Kurudzira mwana wako kubvunza mibvunzo.

• Apo pakunenge kuine rubhabhatidzo mumhuri yako kana muwadhi mako, enda nemwana wako kunoruona. Taurai pamwechete pamusoro peizvo iwe nemwana wako zvamaona nekunzwa. Kana zvichikwanisika, taurai nemunhu ari kubhabhatidzwa uye mobvunza mibvunzo yakaita seinotevera: “Wakaita sarudzo iyi sei? Wakagadzirira sei?”

• Apo pose paunocherechedza mwana wako achiita chimwe chinhu chaakavimbisa kuita, ipa rumbidzo yemwoyo wose. Mutaurire kuti kuchengeta mhiko kunotibatsira kugadzirira kuchengeta zvibvumirano zvatinoita apo patinobhabhatidzwa. Chii chatinovimbisa Mwari apo patinobhabhatidzwa? Chii chaVanotivimbisa? (Ona Mosaya 18:8–10, 13.)

• Taura pamusoro pokuti kusimbiswa nokuva nhengo yeChechi yaVatendi vaMazuva Ekupedzisira kwakakuropafadza sei. Semuenzaniso, wakaswedera sei pedyosa naBaba Vokudenga uye naJesu Kristu apo pawaishandira vamwe uye apo vamwe pavaikushandira? Batsira mwana wako kufunga nzira dzekushandira uye nokusimbisa vamwe senhengo yeChechi. Mubatsirewo kunzwa uye kuziva mufaro uyo unouya kubva mukushandira.

• Apo iwe nemwana wako pamunova nechiitiko chinoera pamwechete (sezvakaita kuchechi, apo pamunenge muchiverenga magwaro matsvene, kana apo pamunenge muchishandira mumwe munhu), mutaurire pamusoro pemanzwiro kana maonero ezvepamweya aunawo. Koka mwana wako kugovera manzwiro aanoita. Cherechedza nzira dzakasiyana siyana idzo Mweya dzaunokwanisa kutaura nadzo kuvanhu, kusanganisira nzira dzaUnotaura nadzo kwauri iwe pachako. Batsira mwana wako kuziva uye nokugoverana newe nguva idzo dzaangange achinzwa femero yeMweya Mutsvene.

• ­Onai pamwechete mashoma emavhidhiyo ari mumuunganidzwa wemuGospel Library anonzi “Hear Him” Taurai pamwechete pamusoro penzira dzakasiyana siyana idzo varanda vaIshe dzavanonzwa nadzo inzwi Ravo. Koka mwana wako kuti adhirowe mufananidzo kana kuita vhidhiyo pamusoro pemanzwiro aanoita inzwi reMuponesi.

• Ita kuti sakaramende ive chiitiko chinoera uye chinomufaro mumhuri yako. Goverana nemwana wako manangisiro aunoita pfungwa pana Jesu Kristu panguva yesakaramende. Batsira mwana wako kuita chirongwa chokuratidza kuti sakaramende inoera kwaari Semuenzaniso, kuteerera kumashoko eminamato yesakaramende kunokwanisa kutiyeuchidza nezve zvibvumirano zverubhabhatidzo.

• ­­ ­­ ­(Onawo muunganidzwa “Preparing for Baptism” muchikamu chevana cheGospel Library.)

Simba reHupirisita, Mvumo, uye Makiyi

Hupirisita imvumo nesimba raMwari iro kuburikidza naro, Vanoropafadza vana Vavo. Hupirisita hwaMwari huri pasi nhasi muChechi yaJesu Kristu yaVatendi vaMazuva Ekupedzisira. Nhengo dzose dzeChechi dzinochengeta zvibvumirano zvadzo—madzimai, varume, uye vana—vanoropafadzwa nesimba rehupirisita hwaMwari mudzimba dzavo kuti vazvisimbise ivo pachavo uye nemhuri dzavo (General Handbook: Serving in The Church of Jesus Christ of Latter-day Saints, 3.6, Gospel Library). Simba iri rinozobatsira nhengo mukuita basa raMwari reruponeso uye rokusimudzirwa kumusoro-soro muupenyu hwavo pachavo nemumhuri (ona General Handbook, 2.2).

Apo varume namadzimai pavanoshandira mudaidzo dzeChechi, vanoita kudaro nemvumo yehupirisita, vari pasi penhungamiro yaavo vane makiyi ehupirisita. Vana vose vaBaba Vokudenga—vanakomana Vavo navanasikana Vavo—vanozoropafadzwa apo pavanosvika pakunzwisisa hupirisita zvirinani.

Tinogamuchira zvisungo kuburikidza nemvumo yehupirisita. “Nhengo dzeChechi dzechirume dzakakodzera dzinogamuchira mvumo yehupirisita kuburikidza nokupuwa hupirisita uye kugadzwa kuzvigaro zvehupirisita” (General Handbook, 3.4). Avo vane zvigaro zvehupirisita vanokwanisa kubvumirwa nemumwe munhu ane makiyi ehupirisita kuti vaite zvisungo zvehupirisita.

Kuti udzidze zvimwe zvakawanda pamusoro pehupirisita, ona Russell M. Nelson, “Upfumi hweZvepamweya,” Liahona, Mbudzi 2019, 76–79; Russell M. Nelson, “The Price of Priesthood Power,” Liahona, Chivabvu 2016, 66–69; “Priesthood Principles,” chitsauko 3 muGeneral Handbook.

• Ita kuti zvisungo zvehupirisita zvive chikamu chenguva dzose cheupenyu hwemhuri yako. Semuenzaniso, batsira mwana wako kugadzirira pamweya sakaramende vhiki yoga yoga. Kurudzira mwana wako kutsvaka maropafadzo ehupirisita apo paanenge achirwara kana kuti achida nyaradzo kana nhungamiro. Ita kuti ive tsika yako kutaura nzira idzo Ishe dzavarikuropafadza nadzo mhuri yako kuburikidza nesimba rehupirisita.

• Apo pamunoverenga magwaro matsvene pamwechete, tsvakai mikana yokukurukura kuti Mwari vanoropafadza sei vanhu kuburikidza nesimba Ravo. Govera zviitiko zvako pachako zveapo Mwari pavakakuropafadza kuburikidza nehupirisita Hwavo. Kuti uwane mienzaniso yemaropafadzo atinogamuchira kubva kuna Mwari kuburikidza nehupirisita, ona General Handbook, 3.2, 3.5.

• Dzidzisa mwana wako kuti mushure merubhabhatidzo, anokwanisa kugamuchira simba rehupirisita kuburikidza nokuchengeta chibvumirano cherubhabhatidzo. ­Wongororai pamwechete shoko raMutungamiri Russell M. Nelson “Upfumi hweZvepamweya” (Liohona, Mbudzi 2019, 76–79). Taurira mwana wako maunziro akaita zvisungo zvehupirisita simba raMwari muupenyu hwako. Kuti uwane mudorongodzwa wedzimwe dzenzira idzo dzatinoropafadzwa nadzo nesimba rehupirisita, ona General Handbook, 3.5.

• Kurukurai mubvunzo unoti “Muranda waIshe munhu akaita sei?” Verengai pamwechete Dzidziso neZvibvumirano 121:36–42, uye motsvaka mhinduro. Apo pose paunoona mwana wako (kana mumwe munhu) achishandisa mumwe wemisimboti kana hunhu huri mundima idzi, zvitaure.

• Apo iwe kana mwana wako pamunoshandisa makiyi kukiinura mukova kana kumutsa motokari, tora chinguva kuenzanisa makiyi iwayo kumakiyi ane vatungamiri vehupirisita. (Kuti uwane tsananguro yemakiyi ehupirisita, ona General Handbook, 3.4.1). Chii “chatinokiinurirwa” kana “kumutsirwa” nemakiyi ehupirisita? Onawo Gary E. Stevenson, “Where Are the Keys and Authority of the Priesthood?,” Liahona, Chivabvu 2016, 29–32; “Where Are the Keys?” (vhidhiyo), Gospel Library.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

• Apo paunotsaurwa kudaidzo, koka mwana wako kuti avepo, kana zvichikwanisika. Rega mwana wako akuone uchizadzikisa daidzo yako. Ungangotsvakawo nzira dzakakodzera dzaanokwanisa kukubatsira nadzo. Tsanangura manzwiro aunoita simba raMwari mudaidzo yako.

Kubhabhatidzirwa noKusimbisirwa Madziteteguru

Matemberi chikamu chechirongwa chaBaba Vokudenga chevana Vavo. Muimba yaIshe, tinoita zvibvumirano zvinoera naBaba Vokudenga apo patinotora chinhanho muzvisungo zvinoera, izvo zvose zvinonongedzera kuna Jesu Kristu. Baba Vokudenga vakapa nzira yokuti vana Vavo vose vaite zvibvumirano uye vatore chinhanho muzvisungo, kusanganisira avo vasina kuzvigamuchira muupenyu hwuno. Pakutanga kwegore raanosvitsa makore gumi nemaviri ekuzvarwa, anenge akura zvakakwana kuti abhabhatidzwe mutemberi kuitira madziteteguru akafa (onawo 1 Vakorinte 15:29).

• Enda kuimba yaIshe nguva zhinji sokubvumira kunoita mamiriro ezvinhu ako. Taura nemwana wako pamusoro pokuti sei uri kuenda uye kuti temberi inokubatsira sei kunzwa kuva pedyosa naBaba Vokudenga naJesu Kristu.

• Wongororai nokukurukura pamwechete mibvunzo yekodzero yokupinda mutemberi. Unokwanisa kuiwana ­pamapeji 36–37 eFor the Strength of Youth: A Guide to Making Choices (2022). Taura nemwana wako pamusoro peizvo zvinoitika mubvunzurudzo yekodzero yokupinda mutemberi. Govera kuti sei kuva nekodzero yokupinda mutemberi kwakakosha kwauri.

• Verengai pamwechete Maraki 4:6. Taurai pamusoro pokuti mwoyo yenyu inokwanisa kutendeukira sei kumadziteteguru enyu. Dzidzai zvimwe zvakawanda pamusoro pamadziteteguru enyu kuburikidza nekuwongorora nhoroondo yemhuri yenyu pamwechete pawebhusaiti inoti FamilySearch.org. Tsvakai madziteteguru ayo anofanira kubhabhatidzwa uye nokusimbiswa. Nyanzvi yezvetemberi nenhoorondo yemhuri yewadhi inokwanisa kukubatsira.

• ­Wongororai pamwechete zvimwe zvezvinyorwa zviri mumuunganidzwa une musoro wenyaya unoti “Temple” muchikamu chevana cheGospel Library. (Onawo “Preparing Your Child for Temple Baptisms and Confirmations” pawebhusaiti inoti ChurchofJesusChrist.org.)

Kugamuchira Ropafadzo raPatiriyaki

Ropafadzo rapatiriyaki rinokwanisa kuva manyuko enhungamiro, nyaradzo, uye kurudziro. Rine rairo yako pachako inobva kuna Baba Vokudenga kwatiri uye rinotibatsira kunzwisisa hunhu hwedu hwokusingaperi nechinangwa chedu chokusingaperi. Batsira mwana wako kugadzirira kugamuchira ropafadzo rapatiriyaki kuburikidza nokumudzidzisa kukosha uye nechimiro chinoera chemaropafadzo apatiriyaki.

Kuti udzidze zvimwe zvakawanda, ona Topics and Questions, “Patriarchal Blessings,” Gospel Library; Julie B. Beck, “You Have a Noble Birthright,” Liahona, Chivabvu 2006, 106–8.

• Goverana nemwana wako chiitiko chako chokugamuchira ropafadzo rapatiriyaki. Unokwanisa kugovera zvinhu zvakaita sokuti wakagadzirira sei kuti urigamuchire, rakubatsira sei kuti uswedere pedyo naMwari, uye kuti Vanoramba vachikutungamirira sei kuburikidza neropafadzo iri. Unokwanisawo kukoka mwana wako kuti ataure nedzimwe nhengo dzemhuri idzo dzakagamuchira maropafadzo apatiriyaki adzo.

• Wongororai pamwechete shoko raGosa Randall K. Bennett rinoti “Your Patriarchal Blessing—Inspired Direction from Heavenly Father” neshoko raGosa Kazuhiko Yamashita rinoti “When to Receive Your Patriarchal Blessing” (Liahona, Chivabvu 2023, 42–43, 88–90). Goveranai izvo zvamunodzidza kubva kumashoko aya pamusoro pokuti sei Baba Vokudenga vachida kuti tigamuchire maropafadzo apatiriyaki. ­Kuti udzidze pamusoro pomutoo wokugamuchira ropafadzo rapatiriyaki, ona General Handbook, 18.17.

• Kana uine madziteteguru akagamuchira maropafadzo apatiriyaki, zvingangova zvinokurudzira kuverenga mamwe awo nemwana wako. Kuti ukumbire maropafadzo amadziteteguru ayo akafa, enda kuwebusaiti ChurchofJesusChrist.org, uye wodzvanya Tools iri kukona yekumusoro nechokurudyi rwesikirini, uye wosarudza Patriarchal Blessing.

• Mushure mokunge mwana wako agamuchira ropafadzo rapatiriyaki, koka nhengo dzemhuri dzipi zvadzo dzaivapo kuti dzinyore pasi manzwiro adzo uye kuti dziagoverane nemwana wako.

Kugamuchira Endaumendi

Mwari vanoda kupa, kana kuropafadza, vana Vavo vose “nesimba rinobva kumusoro” (Dzidziso neZvibvumirano 95:8). Tinoenda kutemberi kunogamuchira endaumendi yedu pachedu kamwechete chete, asi zvibvumirano zvatinoita naMwari uye simba rezvepamweya raVanotipa sechikamu cheendaumendi iyi zvinokwanisa kutiropafadza zuva roga roga reupenyu hwedu.

• Turika mufananidzo wetemberi mumba mako. Taurira mwana wako pamusoro pemanzwiro aunova nawo muimba yaIshe. Taura nguva zhinji pamusoro perudo rwako kuna Ishe neimba Yavo uye zvibvumirano zvawakaita ikoko. Tsvaka mikana yokuenda kutemberi nemwana wako kunoita rubhabhatidzo nerusimbiso rwemadziteteguru avo.

• Wongororai pamwechete temples.ChurchofJesusChrist.org. ­Verengai pamwechete zvinyorwa zvakaita sezvinoti “About the Temple Endowment” uye “Prepare for the House of the Lord.” Rega mwana wako abvunze mibvunzo ipi zvayo yaainayo pamusoro petemberi. ­Kuti uwane nhungamiro pamusoro peizvo zvaunokwanisa kutaura pamusoro pazvo kunze kwetemberi, ona shoko raGosa David A. Bednar rinoti “Prepared to Obtain Every Needful Thing” (Liahona, Chivabvu 2019, 101–4; ona kunyanya chikamu chinomusoro wenyaya unoti “Home-Centered and Church-Supported Learning and Temple Preparation”).

• Apo iwe nemwana wako pamunotora chinhanho mune zvimwe zvisungo kana kuva mucherechedzi mazviri (sezvakaita sakaramende kana ropafadzo rekuporeswa), tora chinguva kukurukura chiratidzo chiripo muchisungo chacho. Zviratidzo izvi zvinomiririra chii? Zvinopupura sei nezvaJesu Kristu? Izvi zvinokwanisa kubatsira mwana wako kugadzirira kufungisisa pamusoro pezvinomiririrwa nezvisungo zvemutemberi, izvowo zvinopupura nezvaJesu Kristu.

• Batsira mwana wako kuti acherechedze machengetero aari kuita chibvumirano cherubhabhatidzo chakatsanangurwa muna Mosaya 18:8–10, 13. Batsirawo mwana wako kucherechedza maropafadzirwo aari kuitwa naIshe. Vaka chivimbo chemwana wako mukwaniso yake yokuchengeta zvibvumirano.

• Taura pachena uye nguva dzose pamusoro pokuti zvibvumirano zvemutemberi zvinotungamira sei sarudzo dzako uye nokukubatsira kuswedera pedyo naJesu Kristu. Unokwanisa kushandisa General Handbook, 27.2, kuwongorora zvibvumirano zvatinoita mutemberi. Kana wakagamuchira endaumendi, taurira vana vako pamusoro pokuti magamendi emutemberi anokubatsira sei kurangarira zvibvumirano zvako naJesu Kristu (ona “Sacred Temple Clothing” [vhidhiyo], Gospel Library).

Sacred Temple Clothing

From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Kushandira Hushumiri

Gosa David A. Bednar vakadzidzisa kuti: “Chinhu chimwechete chakakoshesesa chaunokwanisa kuita kuti ugadzirire daidzo yokushandira ndechokuva mushumiri nguva refu usati waenda kuhushumiri. … Chakakosha hachisi kuenda kuhushumiri; asi panokudaro, chakakosha ndechokuva mushumiri uye nokushandira nemuupenyu hwedu hwose nemwoyo wedu wose, nokugwinya kwedu kwose, nepfungwa dzedu dzose, uye nesimba redu rose. … Uri kugadzirira basa rehushumiri roupenyu hwose” (“Becoming a Missionary,” Liahona, Mbudzi 2005. 45–46). Zviitiko zvine mwana wako mukuva mushumiri zvinozomuropafadza nokusingaperi, kwete chete kwechinhanho chenguva yaanenge achishandira semushumiri.

Kuti udzidze zvimwe zvakawanda, ona Russell M. Nelson, “Preaching the Gospel of Peace,” Liahona, Chivabvu 2022, 6–7; M. Russell Ballard, “Missionary Service Blessed My Life Forever,” Liahona, Chivabvu 2022, 8–10; “Missionary Preparation: Adjusting to Missionary Life,” Gospel Library.

• Ratidza muenzaniso wokugovera vhangeri nenzira dzamazuva ose. Nguva dzose ngwarira mikana yokugoverana nevamwe manzwiro ako pamusoro paBaba Vokudenga neMuponesi uye namaropafadzo aunogamuchira kubva kuvhangeri rakadzorerwa reMuponesi uye senhengo yeChechi Yavo. Koka vamwe kuti vabatane nemhuri yako muzviitwa zvinoenderana neChechi uye nemhuri.

• Tsvaka mikana yokuti mhuri yako ishande nevashumiri. Vakoke kuti vadzidzise shamwari dzenyu, kana kuti vabvumire kuti vadzidzisire vanhu mumba menyu. Bvunza vashumiri pamusoro pezviitiko zvavari kusangana nazvo uye kuti kushandira muhushumiri kuri kuvabatsira sei kuswedera pedyo naJesu Kristu. Vabvunzewo izvo zvavakaita (kana zvavanoshuvira kuti dai vakaita) pakugadzirira kuva vashumiri.

• Kana wakashandira muhushumiri, taura pachena uye kazhinji pamusoro pezviitiko zvako. Kana kuti koka shamwari kana nhengo dzemhuri dzakashandira muhushumiri kuti vataure pamusoro pezviitiko zvavo. Unokwanisawo kutaura pamusoro penzira dzawakagoverana nadzo vhangeri navamwe nemuupenyu hwako hwose. Batsira mwana wako kufunga nezvenzira dzaanokwanisa kugovera nadzo vhangeri.

• Ipa mwana wako mikana yokudzidzisa mhuri yako misimboti yevhangeri. Mwana wako anokwanisawo kudzidzira kugoverana zvitendero zvake navamwe. Semuenzaniso, unokwanisa kukurukura mibvunzo yakaita sokuti “Tinozosuma Bhuku raMormoni sei kune mumwe munhu asati ambonzwa nezvaro?” kana kuti “Tinozotsanangura sei kudikanwa kweMuponesi kune mumwe munhu asiri Mukristu?”

• Batsira mwana wako kuva akasununguka kutaura navanhu. Ndedzipi dzimwe nzira dzakanaka dzokutanga nadzo hurukuro? Kurudzira mwana wako kudzidza mateerero okuita kune izvo zvinotaurwa navamwe, kunzwisisa zviri mumwoyo yavo, uye kugovera zvokwadi zvevhangeri zvinokwanisa kuropafadza upenyu hwavo.

• Tsvaka mikana yokuti mwana wako adzidze pamusoro pedzimwe tsika nezvimwe zvitendero. Mubatsire kuziva nokuremekedza misimboti yakanaka uye yechokwadi muzvitendero zvavamwe.

Kugamuchira Chisungo Chokusunganidzwa

Mutemberi, murume nemukadzi vanokwanisa kuchatiswa nokusingaperi. Izvi zvinoitika muchisungo chinodaidzwa kuti “kusunganidzwa.” Kunyangwe zvazvo chisungo ichi chingava chiri kure nemakore mazhinji kumwanasika kana mwanakomana wako, zvinhu zvidiki, zvakareruka, uye zvenguva dzose zvamunoita pamwechete munguva yamakore iwawo zvinokwanisa kumubatsira kugadzirira ropafadzo iri.

• Verengai pamwechete “Mhuri: Chiziviso kuNyika” muRaibhurari yeVhangeri. Chiziviso ichi chinodzidzisa chii pamusoro pemufaro muupenyu hwemhuri uye pamusoro pemichato inobudirira? Nemwana wako, sarudzai mumwe wemisimboti yakadorongodzwa muchiziviso ichi wokunzvera. Munokwanisa kutsvaka zvinyorwa zvitsvene zvinoenderana nemusimboti iwoyo muNhungamiro kuMagwaro Matsvene. Munokwanisa kumisa zvinangwa zvokushandisa musimboti iwoyo zvakanyanya kuzara mumhuri yenyu. Apo pamunoshanda pazvinangwa zvenyu, kurukurai pamwechete shanduro iyo kurarama musimboti iwoyo yainova nayo paupenyu hwemhuri.

• ­Nemwana wako, verengai shoko raMutungamiri Dieter F. Uchtdorf rinoti “In Praise of Those Who Save” (Liahona, Chivabvu 2015, 77–80). ­Apo paunosvika pachikamu chine musoro wenyaya unoti “A Society of Disposables,” ungangotsvaka zvinhu mumba mako izvo zvinokwanisa kurashwa mushure mokushandiswa uye zvimwe zvinhu zvisingakwanisi kurashwa. ­Taurai pamusoro pamabatiro amunoita zvinhu apo pamunenge muchida kuti zvigare kwenguva yakareba. ­Izvi zvinotaura chii pamusoro pamabatiro atinofanira kuita muchato uye nehukama hwemumhuri? ­Chii chimwe chatinodzidza kubva pashoko raMutungamiri Uchtdorf pamusoro pokuti Muponesi anokwanisa kutibatsira sei kuvaka michato nemhuri dzakasimba?

• Iva wakasununguka kutaurira mwana wako pamusoro pezvinhu izvo iwe nemukadzi kana nemurume wako zvamuri kudzidza pamusoro pokuva nemuchato wokusingaperi wakamisirwa panaKristu uye nzira idzo dzamuri kuedza nadzo kuzvinatsurudza. Kana iwe nemurume kana nemukadzi wako makasunganidzwa mutemberi, ratidzai mwana wenyu kuburikidza nemuenzaniso maedzero amuri kuita kuchengeta zvibvumirano zvenyu naIshe. Taurira mwana wako maedzero amunoita kuita kuti Baba Vokudenga neMuponesi vave nangiso yeukama hwenyu uye mabatsiriro aVanokuitai. (onawo Ulisses Soares, “In Partnership with the Lord,” Liahona, Mbudzi 2022, 42–45).

• Apo sarudzo dzemhuri padzinofanira kuitwa, itai matare nehurukuro dzemhuri. Itai chokwadi chokuti pfungwa dzenhengo dzose dzemhuri dzinonzwikwa uye dzinokosheswa. Shandisai hurukuro idzi semukana wokuumba nhaurirano yakanaka uye tsitsi muukama hwemhuri, kunyangwe panguva iyo yokuti haasi munhu wose anenge achiona zvinhu nenzira imwecheteyo. (Ona M. Russell Ballard, “Family Councils,” Liahona, Chivabvu 2016, 63–65.)

• Apo papanenge paine kusawirirana kana rupesano mumhuri, ratidzai mwoyo murefu uye mutsa. Batsira mwana wako kuona kuti kugadzirisa rupesano nemunzira dzakafanana nedzaKristu kunokwanisa kumubatsira sei kugadzirira muchato unemufaro. Verengai pamwechete Dzidziso neZvibvumirano 121:41–42, uye motaura pamusoro pekuti misimboti iri mundima idzi inokwanisa kushandiswa sei mumuchato.