Faaopoopoga I

Mo le Peraimeri—Faatonuga mo le Taimi o Pesepesega ma le Polokalama a Tamaiti i le Sauniga Faamanatuga

O musika paia o se meafaigaluega mamana lea e fesoasoani ai i tamaiti ia aoao e uiga i le fuafuaga o le fiafia a le Tama Faalelagi ma upumoni faaleaoaoga faavae o le talalelei a Iesu Keriso. Ao pepese tamaiti e uiga i mataupu faavae o le talalelei, o le a molimau atu le Agaga Paia e uiga i lo latou moni. O upu ma fati o le a tumau i mafaufau ma loto o tamaiti i o latou olaga atoa.

Saili le fesoasoani a le Agaga ao e sauni e aoao atu le talalelei e ala atu i musika. Faasoa atu lau molimau e uiga i upumoni o loo outou pepese ai. Fesoasoani i tamaiti ia iloa pe faapefea ona fesootai le musika i mea o loo latou aoaoina ma aafiaga i le fale ma i vasega a le Peraimeri.

Taiala mo le Polokalama o le Sauniga Faamanatuga

I lalo o le taitaiga a le epikopo, o le polokalama a tamaiti i le sauniga faamanatuga e masani lava ona faia i le kuata lona fa o le tausaga. I le avea ai ma au peresitene o le Peraimeri ma le taitai musika, e galulue faatasi ma le fesoasoani o le au epikopo o loo vaaia le Peraimeri e fuafua le polokalama.

E tatau ona faataga e le polokalama ia tamaiti e tuuina atu mea sa latou aoaoina ma o latou aiga mai le Mataupu Faavae ma Feagaiga i le aiga ma i le Peraimeri, e aofia ai pese o le Peraimeri sa latou usuina i le faagasologa o le tausaga. A o e fuafuaina le polokalama, mafaufau i ni auala e mafai ai ona fesoasoani i le faapotopotoga ia taulai atu i le Faaola ma Ana aoaoga.

O Iunite e toalaiti le aofai o tamaiti atonu e mafai ona mafaufau i ni auala e mafai ai ona auai tagata o le aiga faatasi ma a latou fanau. O se tasi o le au epikopo e mafai ona faaiuina le sauniga i se saunoaga puupuu.

A o e saunia le polokalama, ia manatua taiala nei:

• O faataitaiga e le tatau ona alu ai se taimi le talafeagai mai vasega o le Peraimeri po o aiga.

• O mea faitino, teuga, ma aoaoga e faia i ala o faasalalauga e le talafeagai mo le sauniga faamanatuga.

Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 12.2.1.2, Gospel Library.

Faatonuga mo le Taimi o Pesepesega

5 minute (au peresitene o le Peraimeri): Tatalo amata, mau po o se mataupu faavae o le faatuatua, ma se lauga e tasi

20 minute (taitai musika): Taimi o pesepesega

O le au peresitene ma le taitai musika o le Peraimeri e filifilia pese mo masina taitasi e toe faamalosia ai mataupu faavae o loo aoaoina e tamaiti i totonu o a latou vasega ma i le aiga. O se lisi o pese e faamalosia ai nei mataupu faavae o loo faaaofia atu i lenei taiala.

Ao e aoao atu pese i tamaiti, valaaulia i latou e faasoa mai mea ua uma ona latou aoaoina e uiga i tala ma mataupu faavae faaleaoaoga ua aoao atu e pese. Valaaulia tamaiti e faasoa mai o latou manatu ma lagona e uiga i upumoni o loo maua i pese.

O le Tusipese a Tamaiti o le punaoa autu lea mo musika i le Peraimeri. O viiga mai le tusipese ma pese mai le Uo e talafeagai foi. O le faaaogaina o nisi lava musika i le Peraimeri e tatau ona faamaonia e le au epikopo (tagai i le Tusitaulima Aoao, 12.3.4).

Musika mo le Taimi o Pesepesega

Ianuari

• “Mulimuli i le Perofeta,” Tusipese a Tamaiti, 58

• “Saili, Mafaufau Loloto, ma Tatalo,” Tusipese a Tamaiti, 66

Fepuari

• “Ia Fai Le Mea Tonu,” Tusipese a Tamaiti, 80

• “O Le Tatalo a le Tamaitiiti,” Tusipese a Tamaiti, 6–7

Mati

• “Every Star Is Different,” Children’s Songbook, 142

• “Pe A Ou Papatiso,”Tusipese a Tamaiti, 53

Aperila

• “Pe A Ia Toe Afio Mai,” Tusipese a Tamaiti, 46–47

• “Pe Na Toe Soifua Moni Mai ea Iesu?,” Tusipese a Tamaiti, 45.

Me

• “‘Foai,’ O Si Auvai Lea,” Tusipese a Tamaiti, 116

• “Susulu Pea,” Tusipese a Tamaiti, 96.

Iuni

• “O Le Agaga Paia,” Tusipese a Tamaiti, 56

• “Ou Te Fia Avea Nei ma Faifeautalai,” Tusipese a Tamaiti, 90

Iulai

• “Tu Mo Le Mea Tonu,” Tusipese a Tamaiti, 81

• “Na Ia Auina Mai Lona Alo,” Tusipese a Tamaiti, 20–21

Aokuso

• “O Loo Ou Taumafai e Avea e Pei o Iesu,” Tusipese a Tamaiti, 40–41

• “Le Alofa o Lo’u Faaola,” Tusipese a Tamaiti, 42–43

Setema

• “Ou Te Fia Vaai i le Malumalu,” Tusipese a Tamaiti, 99

• “To Think about Jesus,” Children’s Songbook, 71

Oketopa

• “Talafaasolopito--O Lea Ou Te Faia,” Tusipese a Tamaiti, 100

• “O Le Ekalesia a Iesu Keriso,” Tusipese a Tamaiti, 48

Novema

• “Tausi Poloaiga,” Tusipese a Tamaiti, 68

• “Ina Ia Avea Ma Se Paionia,” Tusipese a Tamaiti, 138

Tesema

• “O A’u o se Atalii o le Atua,” Tusipese a Tamaiti, 2–3

• “Peteleema e, le Aai,” Viiga, nu. 122.

Faaaogaina o Musika e Aoao Atu ai Aoaoga Faavae

O le taimi o pesepesega ua faamoemoe e fesoasoani ai i tamaiti e aoao ai upumoni o le talalelei. E mafai ona musuia oe e manatu nei ao e fuafuaina ni auala e aoao atu ai mataupu faavae o le talalelei o loo maua i viiga ma pese o le Peraimeri.

Faitau mau e fesootai i ai. Mo le tele o pese i le Tusipese a Tamaiti ma le tusi o viiga, o loo lisiina atu ai ni mau faasino e fesootai i ai. Fesoasoani i tamaiti e faitau nisi o nei fuaitau, ma talanoa e uiga i le auala e fesootai ai mau i le pese. E mafai foi ona e lisiina nisi o mau faasino i luga o le laupapa ma valaaulia tamaiti e faatusatusa ia mau faasino taitasi i se pese po o se fuaiupu mai se pese.

Faatumu le avanoa. Tusi se fuaiupu o le pese i luga o le laupapa ma ni nai upu autu o loo misi. Ona fai lea i tamaiti e usu le pese, faalogologo mo upu ia e faatumu ai ia avanoa. Ao latou faatumuina ia avanoa taitasi, talanoa po o a ni mataupu faavae o le talalelei na e aoaoina mai upu na misi.

Molimau atu. Molimau puupuu atu i tamaiti e uiga i upumoni o le talalelei o loo maua i pese o le Peraimeri. Fesoasoani i tamaiti ina ia malamalama o le usuina o pese o se tasi lea o auala e mafai ai ona latou tuuina atu se molimau ma lagonaina ai le Agaga.

Tu atu o se molimau. Valaaulia tamaiti e auauai ona tutu ma faasoa atu ni mea sa latou aoaoina mai le pese o loo latou usuina po o o latou lagona e uiga i upumoni na aoao mai i le pese. Fai atu ia i latou po o le a so latou lagona ao latou usuina le pese, ma fesoasoani atu ia i latou ia iloa le uunaiga a le Agaga Paia.

Faaaoga ata. Fai atu i tamaiti e fesoasoani ia te oe e sue pe fai ni ata e o faatasi ma upu taua po o fasifuaitau o i le pese. Valaaulia i latou e faasoa mai pe faapefea ona fesootai le ata i le pese ma le mea o loo aoao mai e le pese. Mo se faataʻitaʻiga, afai o e aoaoina le pese “Pe A Ia Toe Afio Mai” (Tusipese a Tamaiti, 46–47), e mafai ona e faia ni ata i totonu o le potu e faʻaalia ai upu taua mai le pese (pei o agelu, kiona, ma le fetu). Fai atu i tamaiti e ao mai ata ma uu i luga i le faasologa sa’o a o tou usuina faatasi le pese.

Faasoa se lesona faitino. E mafai ona e faaaogaina se mea faitino e uunaia ai le talanoaga e uiga i se pese. Mo se faataitaiga, pe a usuina le pese “‘Foai,’ O Si Auvai Lea” (Tusipese a Tamaiti, 116), e mafai ona e faaali atu i tamaiti se ata o mea e pei o se vaitafe, mutia, timuga, ma fugalaau. O lenei mea e mafai ona taitai atu ai i se talanoaga e uiga i le auala e mafai ai e nai faatinoga laiti o le auauna atu ona faamanuiaina ai isi i ni auala taua.

Valaaulia le faasoa o aafiaga faaletagata lava ia. Fesoasoani atu i tamaiti e fesootai mataupu faavae na aoaoina i le pese ma aafiaga sa latou mauaina i na mataupu faavae. Mo se faataitaiga, ao lei usuina le pese “Ou Te Fia Vaai i le Malumalu” (Tusipese a Tamaiti, 99), e mafai ona e fai atu i tamaiti e sii i luga o latou lima pe afai na latou vaai i se malumalu. Valaaulia i latou e mafaufau pe faapefea ni o latou lagona pe a vaai atu i se malumalu a o latou pepese.

Fai fesili. E tele naua fesili e mafai ona e fai atu a o outou usuina ni pese. Mo se faataitaiga, e mafai ona e fesili i tamaiti po o le a se mea sa latou aoaoina mai fuaiupu taitasi o le pese. E mafai foi ona e fai atu ia i latou e mafaufau i ni fesili o loo taliina e le pese. E mafai e le faia o lenei mea ona taitai atu i se talanoaga e uiga i upumoni na aoao mai i lenei pese.

Faaaoga ni taga faigofie o lima. Valaaulia tamaiti e mafaufau i ni taga faigofie o lima ma fesoasoani atu ia i latou ina ia manatua upu ma savali o se pese. Mo se faataitaiga, a e usuina le “Saili, Mafaufau Loloto ma Tatalo” (Tusipese a Tamaiti, 66), e mafai ona e valaaulia tamaiti e faasino i o latou mata a o latou usuina le pese e uiga i le suesueina o tusitusiga paia, faasino i o latou ulu a o latou usuina le pese e uiga i le mafaufau loloto, ma piilima o latou lima a o latou usuina le pese e uiga i le tatalo.