Appendix D

N̄an Doulul ko an Priesthood eo an Aron im Kūlaaj ko an Doulul an Jiron̄ ro—Kobban Kweilo̧k eo

Iien Kweilo̧k:

Kōjekiik (membōr in kūlaaj eo ak būreejtōnji eo an doulul eo):

Kōppeļo̧k

Al (n̄e ekkar):

Jar:

Āliji Tiim eo an Doulul eo an Jiron̄ ro ak Doulul eo an Priesthood eo an Aron.

Kapilōk doon

Tōl jān armej eo ej kōjekiik kweilo̧k eo, kūlaaj ak doulul eo rej joļo̧k 5 n̄an 10 minit n̄an kōmeļeļeik doon kōn eddo ko aer kōn jerbal in lo̧mo̧o̧r eo an Anij im mour ijo eutiejtata. Juon in iien em̧m̧an n̄an an kūlaaj eo ak būreejtōnji an doulul eo kōnono kōn menin kōnono ko ilo kweilo̧k ko an būreejtōnji ak kweilo̧k ko an ward ko̧o̧njeļ eo an jodikdik ro.

Armej eo ej kōjekiik eaikuj bar kōjerbal juon ak elōn̄ iaan kajjitōk kein:

Mour kōn gospel eo

• Ta en̄jake ko raar kōkajoorļo̧k naan in kam̧ool ko ad kōn Jisōs Kraist im gospel in An?

• Ta eo jej kōm̧m̧ane n̄an epakeļo̧k Rilo̧mo̧o̧r? Elmen ad kajjieon̄ erom̧ āinwōt E?

• Elmen ad en̄jake tōl eo an Irooj ilo mour ko ad?

Lale armej ro rej pād ilo aikuj

• Wōn ro jaar en̄jake n̄an leļo̧k jipan̄ ak jerbal? Ta ijjitōn̄ ko jaar būki jān bisoprik ro n̄an jipan̄ eo ej pād ilo aikuj?

• Ta apan̄ ko ro uwaan kūlaaj eo ad ak doulul eo rej iooni? Elmen ad jipan̄ doon ilo men ko jej dipuki?

• Em̧ōj ke an juon armej em̧m̧akūt tok n̄an ward eo ad ak kar kobatok n̄an Kabun̄ in? Elmen ad jipan̄ er en̄jake karuwainene?

Karuwaineneik aolep n̄an bōk gospel eo

• Ta eo jemaron̄ kōm̧m̧ane n̄an jipan̄ ro jet en̄jake iakwe eo an Anij?

• Ta m̧akūtkūt ko me rej pojen bōk jikier me jemaron̄ karuwaineneik ro m̧ōttad n̄an pād ie?

• Ta karōk ko n̄an kwaļo̧k gospel eo em̧ōj kar kōnono kake ilo ward kweilo̧k in ko̧o̧njeļ eo an jodikdik ro? Ewi wāween an kūlaaj eo ak doulul eo ad bōk koņaer?

Kobaik baam̧le ko n̄an indeeo

• Ta jet iaan wāween ko jemaron̄ em̧m̧anļo̧k ad ekkeijel ippān ro uwaan baam̧le eo, ro jibūd im jim̧m̧aad im ro rilikid?

• Ta eo jenaaj kōm̧m̧ane n̄an lo āt ko etan ro jibūd im jim̧m̧aad ro etto rej aikuj kain̄i ko an tampeļ? Ta eo jemaron̄ kōm̧m̧ane n̄an jipan̄ doon lo āt ko etan ro jibūd im jim̧m̧aad etto?

• Elmen ad maron̄ bōk eļapļo̧k kuņaad ilo jerbal in tampeļ—kajjojo armej im āinwōt juon kūlaaj ak doulul?

Katak ippān doon

Juon ritōl rūtto ak juon membōr in doulul eo ak kūlaaj eo ej tōl kōmeļeļe unin tōl eo an Itok, Ļoor Eō ilo wiik in. Rej kōjerbal ļōmņak in ekkatak ko ilo Itok, Ļoor Eō—N̄an M̧weeo im Kabun̄ in. Ļōmņak in ekkatak eo ippān kakkōļļe in ej ekkeijel ippān jemenere im eļap an em̧m̧an n̄an jodikdik ro. Ijoke, jabdewōt iaan ļōmņak ko an ekkatak remaron̄ in jerbal. M̧ōttan kweilo̧k in ekkā an bōk 35 n̄an 45 minit.

Ikkilōk

Armej eo ej kōjekiik kweilo̧k eo:

• Kam̧ool kōn pedped in katak ko kar kwaļo̧ki.

• Kōnono elmen an kūlaaj eo ak doulul eo naaj kōm̧m̧ane ta eo raar ekkatak—āinwōt juon kurup ak armej.

Jar: