Atam ao Ewa, iroun Douglas Fryer

Beberuare 3–9

2 Nibwaai 1–5

“Ti maiuakina te Kukurei”

A kona ni kauka mataroan te kaotioti n ae onoti koroboki aika tabu. Ngkai ko wareka 2 Nibwaai 1-5, ko kona n kunea bwa iai te bwai ae onoti ae tangiria te Uea bwa e na rereiniko.

Korea Am Namakin

Ngkana ko ataia bwa e a uakaan tokin maium, tera te kabanea ni marooro ae ko tangiria ni tibwauaia nakoia naake ko rang tangiriia? Ngke te burabeti are Riaai e namakinna bwa e a kaan tokin maiuna, e bootiia natina te kabanea n tai n taetae ni burabeti ao ni tibwauai koaua man te euangkerio ake e mateakin ma aomata ake e mateakin. E reirei te Inaomata, te ongotaeka, Bwakan Atam ao Ewa, te kamaiuaki rinanon Iesu Kristo; ao te Kimwareirei. Tiaki n kabane natina a butimwaea ana kabanea n koaua, ma naake a butimwaei—n ikotaki ma mirion ake a warekia n te bong aei—a kunea n ana kakoaua reirei ibukin te maiu n te aroaro “maiuakinan te kukurei” (2 Nibwaai 5:27).

Iango ibukin te Kamatebwai i bon Iroum ni Koroboki aika a Tabu

2 Nibwaai 2

I inaomata n rinea te maiu ae akea tokina.

Unimwaane D. Todd Christofferson e taku “Ana Kantaninga te Atua bwa Natina a na karaoi rinerine ni kaineti ma te inaomata n rinerine are e a tia n anganiia. … Bon Ana baire ao Nanona bwa e na iai te kabanea ni kakaawaki iroura are te kona ni karaoi ara rinerine n oin maiura” (“Free Forever, to Act for Themselves,” Ensign ke Riaona, Nob. 2014, 16). N ana anga reirei Riaai ibukin inaomatam n rinerine, e katebenakoi aaro aika kakaawaki ake a karika riain te rinerine ao n anganiira te kona n roko n arora aika a katautauaki aika tabu, n ikotaki ma aikai:

1. Te Ataibwai ni kaokoron te raoiroi ma te buakaka (2 Nibwaai 2:5)

2. Te tua are a anganaki aomata (2 Nibwaai 2:5)

3. Rinerine aika a kakaitara man anai nano (2 Nibwaai 2:11)

4. Te kona ni mwakuri (2 Nibwaai 2:16)

Ngkai ko wareka 2 Nibwaai 2, tera ae ko reiakinna ibukin aron nako inaomatam n rinerine ma aia reitaki imarenaia? Tera ae e na riki nakon inaomatara n rinerine ngkana e bua aroaro nako aikai teuana ke e raka riki? Tera ae ko reiakinna ibukin inaomatam n rinerine man ana taeka Riaai?

2 Nibwaai 2:22–29

Te Bwaka ao Ana Mwakuri ni Kamaiu Iesu Kristo bon mwakoro aika kakaawaki n ana Kainibaire Tamara are i Karawa.

E mwaiti aomata aika a taraa Bwakan Atam ao Ewa bwa te kananokawaki. Ma, n ana anga reirei Riaai ibukin te Bwaka e kaotia bwa bukin tera bwa bon anne te mwakoro ae kakaawaki n ana kainibaire Tamara ibukin rikirakera ae akea tokina. Ngkai ko wareware man kiibu aikai, taraia bwa e aera ngkai e riai n riki te Bwaka ibukira—-Natin Tamara are i Karawa—n rikirake. E kanga ana Mwakuri ni Kamaiu te Tia Kamaiu n kamaiura man te Bwaka?

Taraa naba Mote 5:9–12; 6:51–62; “Bwakan Atam ao Ewa,” Gospel Topics, topics.ChurchofJesusChrist.org.

2 Nibwaai 3:6–24

E a kaman rineaki Iotebwa Timiti bwa e na kaoka te euangkerio.

Kabanean mwakoron 2 Nibwaai 3 iai inanona te taetae ni burabeti are e anga Iotebwa mai Aikubita ibukin te Tia Mamata n taai aika a na roko are e na titebo ma arana (tarai kibu14-15)—Iotebwa Timiti. E mwaiti naba bwai ake a kona n taekinna ibukin Taben Iotebwa. Tera ae taekina ni kibu 6-24 bwa Iotebwa Timiti, te “Tia Mamata ae rineaki,” bwa e na kakabwaiaia ana aomata te Atua? Te anga raa ae e rang manena iai ana mwakuri Iotebwa Timiti nakoim?

Teuana te mwakoro ae kakaawaki n taben Iotebwa Timiti bon karekean rokon koroboki ake ibukin kanoan Iotebwa, ake iai inanon ana Boki Moomon. Tera ae ko reiakinna man te mwakoro aei n aron kakaawakin ana Boki Moomon?

Taara naba Ana Rairairi Iotebwa Timiti, Karikan Bwaai 50:24–38 (n te abentekiti n te Bwaibwara).

Ana Burabeti te Uea, iroun David Lindsley

2 Nibwaai 4:15–35

I kona n rairaki nakon te Atua inanon mamaarau.

E a tibwa bua naba taman Nibwaai. Te katabeaki ibukin kairan ana utu e tiku i aona. E namakina te katobibiaki n te kariiri ao e bwara nanona ibukin ana bure. E ngae ngke e kaokoro ae ko rinanona ma Nibwaai, ko kona n reitaki ma tabeua ana iango ao ana namakin are e koreaki n 2 Nibwaai 4:15-35. Tera ae buoka Nibwaai n rawawatana? E na kanga ni buokiira ana kaeka Nibwaai nakon ana kaangaanga ni manga kaitarai karawawatakira?

2 Nibwaai 5

Te kukurei e kuneaki mani maiuakinan te euangkerio.

Ko na kanga ni kabwarabwara te Kukurei? E koreia Nibwaai bwa ana aomata a “maiuakina te kukure” (2 Nibwaai 5:27). Ko kona n tarai rinerine ake Nibwaai ao ana aomata a karaoi are e kairia nakon te kukurei—-kawai ake a boutokaia imarenaia ao aia utu, tera ae a moanibwaia n aia kaawa, ao a mwaiti riki. Tera ae ko reiakinna ae e na kona ni buokiko n karikirakea te maiu ae kakukurei, n ai aroia ana aomata Nibwaai?

2 Nibwaai 5:20–21

Tera te maraia are e toka i aoia Reimwanaite?

N ana tai Nibwaai te maraia are irouia Reimwanaite bon te “teweaki nako mai matan [te Uea] … ibukin aia bure” (2 Nibwaai 5:20–21). Nanona bwa Tamnein te Uea e kitana maiuia. Imwina ngke Reimwanaite a butimwaea ana euangkerio Iesu Kristo, “aikoa manga iraki n ana kamaraia te Atua.”(Aramwa 23:18).

E taekinna naba Ana Boki Moomon bwa te kanikina are te kun ae bwatabwata e roko iaoia Reimwanaite imwin maenakoia Nibwaite mai buakoia. Aron ao kaotin te kanikina aio e tuai bwanin iai te mataata. Te kanikina e kaokoroia Reimwainate ma Nibwaite. Imwina, ngke a kaai Nibwaite ao Reimwanaite n rinanon tain te buakaka ao te raoiroi, te kanikina e aikoa bwainaki bwa kaotan aki kororaoia Reimwanaite imatan te Atua.

Burabeti a kamataoaa n ara bong bwa te kun ae bwatabwata bon tiaki kanikinaean te aki tangiraki ke te maraia. Te Ekaretia e butimwaea ana reirei Nibwaai are te Uea “akea ae totokoia ngkana e nakoina, ae bwatabwata ke ae mainaina, te toro ke ae inaomata, te mwaane ke te aine” (2 Nibwaai 26:33). E katanoataa Beretitenti Russell M. Nelson: “Te Uea e a tia n katerea Ana reirei ae kakaawaki iaon te kaboraoaki irouia Natina. … Te kakaokoro n te katei, taetae, anuan te aomata, baronga, ao te aba e aaki kakaawaki ngkana aomata aika kakaonimaki a rinnako ni kawain te berita ao n nakon ara Tia Kabooira ae tangiraki” (“President Nelson Remarks at Worldwide Priesthood Celebration” [Tuun 1, 2018], newsroom.ChurchofJesusChrist.org).

Taraa naba “Till We All Come in the Unity of the Faith” (witeo, ChurchofJesusChrist.org).

Iango ibukin Kamatebwaian Koroboki aika Tabu n utu ao ni Bootakin te Utu n te Tairiki

Ngkai ko wareware man koroboki aika tabu ma am utu, te Tamnei e na buokiko n ataia bwa tera reirei aika ko na kamataatai ao ni maroroakin ibukin tobwaan ana kainano am utu. Aikai tabeua iango.

2 Nibwaai 1:13–25

Tera ae ti reiakina man kiibu aikai ibukin ana kantaninga ae korakora te karo ae kororaoi ibukin natina te mwaane ke te aine?

2 Nibwaai 3:6

Ikotaki ni wareka “Tia Mamata” n te Bwaibwara Rikitionari. E kanga n riki Iotebwa Timiti bwa ngaia te Tia Mamata? Bukin tera ti karabwarabwa ibukin te mwakuri are e karaoia Iotebwa Timiti? (taraa 2 Nibwaai 3:6–24).

2 Nibwaai 4:20–25

Ngkai kam ikotaki ni wareka 2 Nibwaai 4:20-25 toki teutana imwin kiibu nako ao kaoiia kain te utu bwa a na tibwatibwa ngkana iai aia taneiai ke aia namakin n ai aron are e kabwarabwara Nibwaai. Tera ae e a tia ni karaoia te Atua ibukin ara utu?

2 Nibwaai 5

Tera tabeua kawai aika am utu a “maiuakina te kukurei”? Ngkai ami utu a wareware 2 Nibwaai 5, kam kona ni maroroakin baike a tabe ibukina Nibwaite: aia utu (te kibu 6), taian tua (te kibu 10), koroboki aika tabu (te kibu 12), te reirei (te kibu 15), tembora (te kibu 16), te mwakuri (te kibu 17), ao wewete n te Ekaretia (te kibu 26). Teuana te kawai ae ti kona ni karaoa aei bon kakaean kabootau ake a tei ibukin baikai ao ni marooro bwa ti na kanga ni kaotia , n ai aroia Nibwaite, ae a kabonganai baikai naba.

Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.

Kanakoraoan Ara Anga reirei

Taratara raoi. Ngkana ko kaatua am taratara nakon baike a riki n maiuia natim, kona kunei taai n anga reirei aika tamaroa. Aia taeka natim ke aia titiraki ake a titiraki iai a kona naba ni riki bwa taai n anga reirei. (Taraa Reirei n Ana Kawai te Tia Kamaiu,16.)

Riaai ma Ana Botanaomata a roko n te Aonaaba ae Boou, iroun Clark Kelley Price