“31 Aokuso–6 Setema. Helamana 13–16: ‘Tala Lelei e Olioli Tele Ai,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“31 Aokuso–6 Setema,” Sau, Mulimuli Mai ia te Au—Mo Tagata Taitoatasi ma Aiga: 2020
Samuelu le sa Lamana i luga o le Papuipui, saunia e Arnold Friberg
31 Aokuso–6 Setema
Helamana 13–16
“Tala Lelei e Olioli Tele Ai”
A o tusifaamaumauina ou lagona uunai i lenei vaiaso, mafaufau i auala e atinae ai ma faamalosia e mataupu faavae o loo i le Helamana 13–16 isi mea sa e aoaoina i tusitusiga paia.
Tusifaamaumau Ou Lagona Uunai
O le taimi muamua na taumafai ai Samuelu le sa Lamana e faasoa atu le “tala lelei” i Saraemila (Helamana 13:7), sa teena ma tuliesea o ia e sa Nifae loto maa’a. Atonu e te faapea atu, sa pei na latou fausia faataamilo se papuipui mautu i o latou loto ma taofia ai i latou mai le taliaina o le savali a Samuelu. Sa malamalama Samuelu i le taua o le savali na ia folafolaina atu ma faaalia le faatuatua e ala i le mulimuli i le poloaiga a le Atua “e tatau ona ia toe foi, ma vavalo atu” (Helamana 13:3). E pei lava ona sa faia e Samuelu, tatou te fetaiai uma lava ma papupuni a o tatou “saunia le ala o le Alii” (Helamana 14:9) ma taumafai e mulimuli i Ana perofeta. Ma e pei o Samuelu, tatou te molimau atu foi e uiga ia Iesu Keriso, “o le a mautinoa ona oo mai,” ma valaaulia tagata uma ia “talitonu i lona suafa” (Helamana 13:6; 14:13). E le o tagata uma o le a faalogo, ma atonu e tetee malosi ia isi. Ae o i latou o e talitonu i lenei savali ma faatuatua ia Keriso, latou te iloaina e moni lava o se “tala lelei o le olioli tele” (Helamana 16:14).
Manatu mo Suesuega Faaletagata Lava Ia o Tusitusiga Paia
E tuuina mai e le Alii ia lapataiga e ala mai i Ana perofeta.
I tusitusiga paia, o nisi taimi e faatusatusa ai perofeta i tagatavaai i luga o se papuipui po o se ‘olo o e lapatai mai e uiga i mea matautia (tagai Isaia 62:6; Esekielu 33:1–7).
Na aoao mai Peresitene M. Russell Ballard, “I le gasologa o seneturi, e faataunuu ai e perofeta lo latou tiute pe a latou lapatai atu i tagata e uiga i le mea matautia o loo i o latou luma atu. Ua noatia Aposetolo a le Alii i le tiute e leoleo, lapatai, ma aapa atu e fesoasoani ia i latou o loo sailia ni tali i fesili o le olaga” (“O Le Atua o Loo i le Foeuli,” Ensign po o le Liahona, Nov. 2015, 25).
A o e suesue ma mafaufau loloto i le Helamana 13, e mafai ona e faailogaina le tele o lapataiga na tuuina atu e Samuelu. Mo se faataitaiga, o le a se mea na ia aoao mai e uiga i le salamo? e uiga i le lotomaualalo ma le oa? E ono faapefea ona faatatau nei lapataiga ia te oe? O a ni lapataiga na tuuina mai lata mai nei e perofeta o aso nei, ma o le a se mea e te manatu e tatau ona e faia e uiga i na lapataiga?
O le perofeta na te faasinoa atu i tatou ia Iesu Keriso.
E alofa mutimutivale le Alii ia i latou o e salamo.
O le mea muamua lava, sa auina atu Samuelu ia sa Nifae e faasoa atu le tala lelei o le olioli o le afio mai o le Faaola (tagai Helamana 13:7). Ona sa latou teena o ia, o lea na ia toe foi atu ai ma ni lapataiga malolosi e uiga i faamasinoga a le Atua. Peitai o na lapataiga sa aofia ai i taimi uma se valaaulia mutimutialofa ia salamo; vaavaai mo nei valaaulia i le Helamana 13–15 atoa (tagai faapitoa i le Helamana 13:6, 11; 14:15–19; 15:7–8). E faapefea ona faatatau nei valaaulia ia te oe? O le a le mea ua e aoao mai i nei fuaiupu e uiga i le salamo? O anafea na e lagonaina ai le alofa mutimutivale o le Atua lea e sau mai i le salamo?
O faailoga ma mea e ofo ai e mafai ona faamalosia ai le faatuatua o i latou o e e le faamaaa o latou loto.
I le Helamana 14, na faamatala ai e Samuelu le mafuaaga na tuuina mai ai e le Alii ia faailoga o le soifua mai ma le maliu o le Faaola: “I le faamoemoe ia mafai ona outou talitonu ai i lona suafa” (Helamana 14:12). A o e suesue i le Helamana 14, ia maitau faailoga o le soifua mai o le Faaola o loo i fuaiupu 1–8 ma faailoga o Lona maliu i fuaiupu 20–28. Aisea e te manatu o le a avea ai nei faailoga o ni auala lelei tele e faailo mai ai le soifua mai ma le maliu o Iesu Keriso?
E mafai ona e mafaufau i ni faailoga ua tuuina mai e le Alii e fesoasoani ina ia e talitonu ai ia te Ia? Mo se faataitaiga, ua valoia e perofeta ia faailoga o le a faaali mai a o lumanai le Afio Mai Faalua o le Faaola (tagai “Faailoga o Taimi,” Taiala i Tusitusiga Paia, scriptures.ChurchofJesusChrist.org). Pe ua faataunuuina se tasi o nei faailoga i o tatou aso? O isi faailoga e tau atu i le faatuatua ia Iesu Keriso atonu e sili atu ona patino ma tau le matautia? Faaalu se taimi e mafaufau loloto ai i auala ua e molimauina ai Lona aao i lou olaga.
O le a se lapataiga ua tuuina mai i le Helamana 16:13–23e uiga i faailoga? E mafai faapefea ona e alofia uiga faaalia o tagata na faamatalaina i nei fuaiupu?
Tagai foi Alema 30:43–52; Ronald A. Rasband, “E Ala i le Mamanu Faalelagi,” Ensign po o le Liahona, Nov. 2017, 55–57.
O le mulimuli i fautuaga a le perofeta e aumaia latalata atili ai a’u i le Alii.
Na aoao mai Elder Neil L. Andersen: “Ua ou iloa ai a ou suesueina ma le agaga tatalo ia upu a le perofeta a le Atua ma faaogatusaina faaleagaga ma le faaeteete, ma le onosai lo’u loto i ana aoaoga musuia, e faateleina lava i taimi uma lo’u faatuatua i le Alii o Iesu Keriso. Afai tatou te filifili e faataatia ese ana fautuaga ma manatu e sili atu lo tatou iloa, o le a pagatia lo tatou faatuatua ma puaoa ai la tatou vaaiga e faavavau” (“O Le Perofeta a le Atua,” Ensign po o le Liahona, Me 2018, 26–27). O faapefea ona faamaonia e upu ma amioga a sa Nifae o loo i le Helamana 16 le mea na aoao mai e Elder Andersen? O a ni tautinoga patino e te manatu e tatau ona e faia e faatatau i perofeta a le Alii ma a latou savali?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
Helamana 13:3–4
O le a se mea o musuia ai lou aiga e uiga i le tali a Samuelu i le poloai a le Alii i le Helamana 13:3–4? I le taimi o le suesuega a lou aiga i le vaiaso lenei, atonu e mafai ona e faamalosiau i tagata o le aiga e faasoa mai ni lagona uunai e “oo mai i [o latou] loto.”
Helamana 13:38
O le manatu e faapea, e mafai ona maua le fiafia “i le fai o le amioletonu” ua taatele i o tatou aso. O a ni auala ua aumaia ai e le ola i le talalelei le fiafia moni ia i tatou?
Helamana 15:3
E faapefea ona faaalia e le aoaiga a le Atua ia Lona alofa mo i tatou? Valaaulia tagata o le aiga e ole atu ma le faamaualalo i le Alii mo mea e mafai ona latou faia ia alualu ai i luma.
Helamana 15:5-8
O le a se mea ua tatou aoaoina e uiga i le liuaina mai ia sa Lamana o loo faamatalaina i nei fuaiupu? E mafai faapefea ona tatou mulimuli i a latou faataitaiga?
Helamana 16:1–3
Mata o le a fiafia lou aiga e faatino le tala ia Samuelu le sa Lamana? A uma ona faitau le tala, atonu e mafai ona feauauai tagata o le aiga e tutu i luga o se nofoa ma faitau nisi o valoaga a Samuelu ae faafoliga ia isi tagata o le aiga o loo tafana atu ni au pe tauai atu ni maa. E mafai ona fesoasoani lenei mea e malamalama ai lou aiga i lagona atonu na oo ia Samuelu ma sa Nifae. Atonu foi e fiafia tamaiti laiti e tusi ni ata o le tala. E mafai faapefea ona tatou faapei o Samuelu ma faasoa atu le talalelei i isi e ui lava i o tatou popolega?
Mo nisi manatu mo le aoaoina o tamaiti, tagai i le otootoga i le vaiaso lenei i le Sau, Mulimuli Mai ia te Au—Mo le Peraimeri.
Faaleleia o Suesuega Faaletagata Lava ia
Tagai mo ni mamanu. O se mamanu o se faataitaiga po o se atatosi e mafai ona faaaogaina o se taiala mo le ausiaina o se galuega fai. I tusitusiga paia tatou te maua ai mamanu o loo faaalia ai le ala e ausia ai e le Alii Lana galuega, e pei o le auina mai o Ana auauna e lapatai i tagata.
© The Book of Mormon for Young Readers, Samuelu le sa Lamana saunia e Briana Shawcroft