O Samuelu le sa Lamana o loo aoao atu i luga o le puipui

Samuel the Lamanite on the Wall, saunia e Arnold Friberg

31 Aokuso–6 Setema

Helamana 13–16

“Tala Fiafia o le Olioli Tele”

Saunia e aoao atu e ala i le faitauina o le Helamana 13-16 ma mafaufau po o a gaoioiga o le a sili ona fesoasoani i tamaiti e aoao ai upumoni i nei mataupu.

Tusi Faamaumau Ou Lagona Uunai

aikona e fefaasoaai

Valaaulia le Fefaasoaai

Faaali atu se ata o Samuelu le sa Lamana, ma valaaulia tamaiti e faasoa mai se mea latou te iloa e uiga ia te ia. Mo se faataitaiga, e mafai ona latou talanoa e uiga i le tala ia Samuelu o loo aoao atu i luga o le puipui po o faailoga na ia fai mai o le a tupu pe a fanau mai Iesu?

aikona o le aoao atu

Aoao atu le Aoaoga Faavae: Tamaiti Laiti

Helamana 13:2–5

E mafai ona tautala le Agaga i o tatou loto.

Ina ua poloaiina Samuelu le sa Lamana e talai atu i sa Nifae, sa fesoasoani le Tama Faalelagi ia te ia e iloa i lona loto le mea e tatau ona ia fai atu ai.

Gaoioiga e Mafai Ona Fai

• Aoao atu i tamaiti ao tatou talanoa le tasi i le isi e faaaoga ai upu, o le Agaga Paia e mafai ona fesootai e ala i lagona i o tatou loto. Valaaulia i latou e uu o latou lima i luga o o latou fatu i taimi taitasi e te faitau ai i le upu “loto” i le Helamana 13:2–5. Fesoasoani ia i latou e teuteuina ni fasi pepa i le siepi o se fatu ia fai mai, “E fetalai mai le Agaga ia te a’u i loʻu loto.”

• Tau atu i tamaiti afai latou te papatiso ma faamauina, o le a latou maua le meaalofa o le Agaga Paia e fesoasoani ai ia latou iloa le mea e finagalo le Tama Faalelagi latou te faia ma ta’u atu. Fesoasoani ia i latou e mafaufau i mea atonu e taʻu atu e le Agaga Paia ia i latou, ma valaaulia i latou e faasoa mai mea e mafai ona latou faia e mulimuli ai i Ana musumusuga.

Helamana 14:2-7, 20-25

Ua aoao mai perofeta e uiga ia Iesu Keriso.

O le tala ia Samuelu le sa Lamana o se avanoa sili e aoao ai tamaiti o loo aoao mai perofeta uma e uiga ia Iesu Keriso.

Gaoioiga e Mafai Ona Fai

• Faaali atu le ata o Samuelu le sa Lamana i le otootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga, ma tau atu i tamaiti, i ni upu faigofie, e uiga i lona aafiaga i le Helamana 13–16. E mafai foi ona e faaaogaina le “Mataupu 40: O Samuelu le Sa Lamana O Loo Ta’uta’u Atu E Uiga Ia Iesu Keriso” (Tala o le Tusi a Mamona 111--13, po o le vitio talafeagai i luga o le ChurchofJesusChrist.org). Tuu atu i tamaiti e fetufaai mea latou te iloa e uiga ia Samuelu le sa Lamana.

• Usu faatasi le “Samuel Tells of the Baby Jesus” po o le fuaiupu lona fitu o le “Tala o le Tusi a Mamona” (Tusipese a Tamaiti, 118-19, 62). Faasoa atu se mea e te fiafia i ai e uiga ia Samuelu, ma tuu atu i tamaiti e fetufaai mai mea latou te fiafia ai e uiga i lana tala.

• Nana ata i totonu o le potu lea e fai ma sui o faailoga na valoia e Samuelu i totonu o le Helamana 14:2–7 ma le 20–25. Faitau se fuaitau e faamatalaina ai se tasi o faailoga, ma fai atu i tamaiti e sue le ata o lena faailoga. Faamalamalama atu o nei faailoga na fesoasoani i tagata sa Nifae ia iloa e uiga ia Iesu Keriso. Ia molimau atu faapea, e pei o Samuelu, o perofeta uma lava e molimau ia Iesu Keriso.

Peresitene Russell M. Nelson

Ua faasino i tatou e le perofeta ia Iesu Keriso.

Helamana 16:1–6

E faamanuiaina a’u pe a ou mulimuli i le perofeta.

Ua tuuina mai e le Tama Faalelagi ia i tatou se perofeta e fesoasoani ia i tatou ia iloa Lona finagalo ma mulimuli i Lana fuafuaga. E faamanuiaina i tatou ao tatou faalogologo i upu a le perofeta ma usiusitai.

Gaoioiga e Mafai Ona Fai

• Fesoasoani i tamaiti e fausia se tamai puipui i poloka po o tusi. I le faaaoga ai o se meataalo laitiiti po o se pepe taalo e fai ma sui o Samuelu, ia auauai tamaiti e fesoasoani ia “Samuelu” e a’e i le puipui e aoao tagata e uiga ia Iesu Keriso. (Tagai foi i le itulau o gaoioiga o lenei vaiaso.) Faasoa atu fuaitau mai le Helamana 16: 1 ma le 5 e faamatala ai o nisi tagata na talitonu ia Samuelu ma na papatisoina. Faaaoga fuaitau mai le Helamana 16: 2 ma le 6 e faaali atu ai e le talitonu isi ma sa feita ia Samuelu. Molimau atu o tagata e mulimuli i le perofeta ua faamanuiaina.

• Faaali atu se ata o le Faaola, ma fai atu i se tamaitiiti e fai ma sui o le perofeta ma taitaia isi tamaiti i le potu ao latou usuina ni nai fuaiupu o le “Mulimuli i le Perofeta” (Tusipese a tamaiti,58) po o se isi pese e faatatau i perofeta. Ona fai atu lea i le tamaitiiti o loo fai ma sui o le perofeta e taitaia tamaiti i le ata o le Faaola. Molimau atu afai tatou te mulimuli i le perofeta, o le a ia taitai atu i tatou ia Iesu Keriso. Faasoa atu nisi o mea na aoao mai e lo tatou perofeta e uiga ia Iesu talu ai nei. E mafai faapefea ona tatou mulimuli i lana fautuaga?

aikona o le aoao atu

Aoao atu le Aoaoga Faavae: Tamaiti Matutua

Helamana 13:2–4

E mafai ona tautala le Agaga i o tatou loto.

E i ai se aso, o tamaiti o loo e aoaoina o le a manaomia ona iloa pe faapefea ona faia le mea na faia e Samuelu: faasoa atu le savali ua tuu e le Alii i o latou loto.

Gaoioiga e Mafai Ona Fai

• Faaali atu se ata o Samuelu le sa Lamana (e pei o le ata o loo i le Sau, Mulimuli Mai ia Te Au—Mo Tagata Taitoatasi ma Aiga), ma fesili atu i tamaiti pe na faapefea ona iloa e Samuelu le mea e fai atu ao ia talai mai le pa o le aai. Valaaulia i latou e suesue le Helamana 13:2--4 mo se tali. Faamatala e uiga i se taimi na fesoasoani ai le Agaga Paia ia e iloa i lou loto le mea na finagalo le Atua e te faia pe tau atu. Fai atu i tamaiti e faasoa mai soo se aafiaga faapena na latou oo i ai.

• Faaali atu se ata o le perofeta soifua o saunoa i se konafesi aoao. Tau atu i tamaiti e fetalai le Atua i le perofeta i le mea e taʻu mai ia i tatou, e pei lava ona Ia faailoa atu ia Samuelu le mea e ta’u atu i sa Nifae. Talanoa faʻatasi e uiga i mea na fai mai le perofeta na musuia ai oe poʻo tamaiti.

Helamana 14:2–28

Ua aoao mai perofeta e uiga ia Iesu Keriso.

O le faamoemoega o le savali a Samuelu o le molimau lea ia Iesu Keriso ma valaaulia tagata e salamo ma o mai ia te Ia. O o tatou perofeta i aso nei e tutusa le latou matafaioi.

Gaoioiga e Mafai Ona Fai

• Valaaulia le afa o tamaiti e faitau le Helamana 14:2–6 ma tusi ni ata o faailoga o le fanau mai o Iesu. Valaaulia le isi afa o le vasega e faitau le Helamana 14: 20-28 ma tusi ata o faailoga o le maliu o Iesu. Ona fai atu lea i vaega taitasi e faasoa mai mea na latou tusia. Faitau faatasi le Helamana 14:11-12, ma fai atu i tamaiti e faalogo pe aisea na valoia ai e Samuelu nei faailoga. E faapefea ona tatou aoao e uiga ia Iesu Keriso i aso nei?

• Faamalamalama atu e pei lava ona aoao e Samuelu le sa Lamana e uiga ia Iesu Keriso, e faapena foi ona faia e perofeta soifua i aso nei. Faasoa se faamatalaga mai se savali talu ai nei o le konafesi na molimau ai le perofeta soifua ia Keriso. Fai atu i tamaiti e faasoa mai mea na aoaoina ai i latou e le perofeta e uiga ia Iesu Keriso.

Helamana 16:1–6

E faamanuiaina a’u pe a ou mulimuli i le perofeta.

Ua tuuina mai e le Tama Faalelagi ia i tatou se perofeta e fesoasoani ia i tatou ia iloa Lona finagalo ma mulimuli i Lana fuafuaga. E faamanuiaina i tatou ao tatou faalogo ma usiusitai i upu a le perofeta.

Gaoioiga e Mafai Ona Fai

• Faitau leotele le Helamana 16: 1 ma le 5, ma fai atu i tamaiti e tutu i luga pe a latou faalogo i se mea na faia e tagata ina ua latou talitonu i upu a Samuelu. Ona faitau lea o fuaiupu 2 ma le 6, ma fai atu i tamaiti e nonofo i lalo pe a latou faalogo i se mea na faia e tagata pe a latou le talitonu. E faapefea ona tatou faʻaalia tatou te talitonu i upu a le perofeta soifua?

• Faaali atu se ata o le perofeta soifua, ma fai i tamaiti e faasoa mai mea latou te iloa e uiga ia te ia. Faasoa atu pe faʻapefea ona e taumafai e mulimuli i ana aʻoaʻoga ma pe faʻapefea ona e manuia i le faia o lena mea.

aikona o le aoaoina

Fautuaina le Aoaoina i le Aiga

Valaaulia tamaiti e aoao e uiga i se mea na fai mai ai le perofeta ma faasoa atu i le vasega i le vaiaso a sau.

Faaleleia o Lo Tatou Aoao Atu

Fautuaina tamaiti e fai fesili. “Taumafai e tagai atu i [fesili a tamaiti] o ni avanoa, ae le o se faalavelave po o ni faalavefau i lau lesona. … O nei fesili e tuuina atu ia te oe ni malamalamaaga taua e uiga i mea o loo mafaufau i ai tamaiti, o a popolega o ia i latou, ma pe faapefea ona latou tali atu i mea o loo latou aoaoina.” (tagai foi Aoao Atu i le Ala a le Faaola, 25–26).

itulau o gaoioiga: E mafai ona ou mulimuli i le perofeta