O A’u o le Malamalama o le Lalolagi, saunia e James Fullmer

14--20 Setema

3 Nifae 8--11

“Tutulai ia ma O Mai ia te A’u”

Faitau le 3 Nifae 8--11 ma le mafaufau i tamaiti o loo e aoaoina. O manatu i lenei otootoga e mafai ona fesoasoani e taiala lau sauniuniga.

Tusi Faamaumau Ou Lagona Uunai

Valaaulia le Fefaasoaai

Faaali atu se ata o Iesu Keriso o faaali atu i Amerika, e pei o le ata i le otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga. Valaaulia tamaiti e faasino mai auiliiliga i le ata ma faasoa atu se mea latou te iloa e uiga i le tala o loo faaalia.

Aoao atu le Aoaoga Faavae: Tamaiti Laiti

3 Nifae 8--11

Ua valaaulia a’u e Iesu Keriso ou te alu atu ia te Ia.

Atonu e le mafai ona e faasoa atu i tamaiti uma auiliiliga o le faaali mai o le Faaola i tagata o Nifae, ae mafai ona e fesoasoani ia i latou ia lagona le alofa na Ia faaalia i tagata i le 3 Nifae 8--11.

Gaoioiga e Mafai Ona Fai

• Taʻu atu i tamaiti e uiga i afa ma le pogisa o loo faamatalaina i le 3 Nifae 8, ia faaeteete ia aua le faafefe pe faaita i latou. E mafai ona e faaaoga le “Mataupu 42: O Faailoga O le Faasatauroina O Keriso” (Tala o le Tusi a Mamona, 117–19, po o le vitio talafeagai i luga o le ChurchofJesusChrist.org). Fai atu i tamaiti pe o le a so latou lagona pe afai latou te i ai i na afa ma le pogisa. Faamatala atu o afa ma le pogisa o faailoga ia na maliu Iesu, ma faaali atu se ata o le Faasatauroga (tagai Tusi Ata o le Talalelei, nu. 57). Faitau le 3 Nifae 9:13. O le a le mea na fetalai Iesu o le a Ia faia mo i latou o e ua salamo? Fesoasoani i tamaiti ia malamalama o le upu “faamaloloina” i lenei fuaiupu o lona uiga o le a faamagaloina e Iesu i latou.

• Faaali atu le ata mai le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga ao e faamatalaina i ni au lava upu le faaali atu o le Faaola toetu i sa Nifae ma sa Lamana. Faitau fuaitau puupuu mai le 3 Nifae 11 o le a fesoasoani latou te lagona ai le paia o lenei mea na tupu. Valaaulia i latou e moeiini o latou mata ma mafaufau pe o a ni o latou lagona pe a latou vaai ia Iesu. Pe faaali le minute muamua o le vitio “My Joy Is Full” (ChurchofJesusChrist.org). Tau atu i tamaiti pe o le a sou lagona pe a e faitau ma mafaufau loloto i nei mea tutupu. Molimau atu e finagalo Iesu tatou te o mai uma ia te Ia ma lagona Lona alofa. Faamaea ma tamaiti le itulau o gaoioiga.

3 Nifae 10:4--6

E puipuia e Iesu Ona tagata e pei o se matuamoa e puipui i ana tama’i moa.

O le faatusa o se matuamoa o loo aoina ana tama’i moa e mafai ona aoao atu i tamaiti e uiga i le mafanafana ma le puipuiga e ofoina mai e le Faaola pe afai tatou te o mai ia te Ia.

Gaoioiga e Mafai Ona Fai

• Faaali atu se ata o se matuamoa o tausia ana tama’i moa. Faitau le 3 Nifae 10:6, ma taʻu atu i tamaiti le ala e valaau ai se matuamoa i ana tama’i moa ma puipuia i lalo o ona apaʻau pe a iai se mea matautia. Ia talanoaina pe faapefea ona pei Iesu o le matuamoa ma e pei i tatou o tama’i moa. E faʻapefea ona tatou o mai ia te Ia ina ia maua le saogalemu?

• Tuu se ata o Iesu i luga o se puipui. Valaaulia tamaiti e savavali faataamilo i le potu aoga ao e faitauina leotele le 3 Nifae 10:4 . Tau atu ia i latou e agai atu i le ata o Iesu pe a latou faalogo i upu “faapotopotoina” pe “ofaofatai.” Toe fai lenei gaoioiga ao e faitau i le fuaiupu 5 ma le 6. Faasoa ma tamaiti pe na faapefea ona e sau i le Faaola mo le saogalemu, ma molimau atu o le a Ia puipuia i tatou mai mea matautia faaleagaga ao tatou tausia Ana poloaiga.

3 Nifae 11:21--26

E finagalo Iesu Keriso ou te papatiso.

O tamaiti o loo e aoaoina o loo sauni e papatiso. O aoaoga a Keriso i nei fuaitau e mafai ona fesoasoani latou te iloa ai le taua o le papatisoga.

Gaoioiga e Mafai Ona Fai

• Faitau le 3 Nifae 11:21--26, ma valaaulia tamaiti e tutu i luga i taimi uma lava latou te faalogoina ai le upu “papatiso.” Faamalamalama atu sa aoaoina i tatou e Iesu i le auala saʻo e papatiso ai. Faaali se ata o se tamaitiiti o papatiso (tagai Tusi Ata o le Talalelei, nu.104). Afai na vaai muamua tamaiti i se papatisoga, valaaulia i latou e faamatala mai mea na latou vaaia. O ai na faia le papatisoga, ma na faapefea ona ia faia?

• A’o le’i oo i le taimi o le vasega, valaaulia se tama o se tasi o tamaiti e auai i lau vasega ma faasoa atu i tamaiti pe aisea e taua ai le papatisoina o i tatou e ala i le faatofuina e se tasi o umia le perisitua. E mafai foi ona ia faamatala atu i tamaiti le mea o le a tupu pe a papatisoina i latou ma faamanuiaga o le a latou mauaina. Uunaia o ia e faaaoga le 3 Nifae 11: 23-26 i lana faamatalaga.

Aoao atu le Aoaoga Faavae: Tamaiti Matutua

3 Nifae 8--11

A ou i ai i le pogisa, e mafai ona avea Iesu Keriso ma o’u malamalama.

O le tasi savali mamana o nei mataupu, o Iesu Keriso o le malamalama o le lalolagi, ma e mafai ona avea o Ia ma malamalama i o tatou olaga.

Gaoioiga e Mafai Ona Fai

• Faitau faatasi le 3 Nifae 8:5–7, 11–23, ma le 10:9–13 (a manaomia, faapogisa le moli a o e faitau). Taofi le faitau i nisi taimi ma fesili atu i tamaiti pe o le a se lagona e oo ia te oe ina ia e iloa ai nei mea na tutupu. Faitau faatasi ma tamaiti nisi o upu na fetalai atu ai Iesu Keriso i tagata ao latou i ai i le pogisa (tagai 3 Nifae 9:13–14, 18). Aisea na taʻua ai e Iesu Keriso o Ia lava o le Malamalama o le Lalolagi? O le a le mea na valaaulia ai e Iesu tagata, ma i tatou, e faia ina ia avea o Ia ma o tatou malamalama? (tagai 3 Nifae 9:20–22).

• Faaali atu i tamaiti se faafanua o le lalolagi, ma fesoasoani ia latou saili Ierusalema ma Amerika. Faamatala atu o le faatafunaga o loo faamatalaina i le 3 Nifae 8 o se faailoga i tagata i Amerika o Iesu Keriso na faasatauroina i Ierusalema. Faitau faatasi le 3 Nifae 11:1--15, ma fai i tamaiti e taʻu atu ia te oe pe a latou maua se mea i nei fuaiupu e fesoasoani latou te lagona ai le alofa o le Atua. Faasoa atu le fuaiupu 37, ma molimau atu e alofa le Faaola i tamaiti uma. Tuuina atu lau molimau e uiga i le moni o mea o loʻo e faitauina.

One by One, saunia e Walter Rane

3 Nifae 11:1–8

E mafai ona ou aoao e iloa le siufofoga o le Atua i loʻu olaga.

I le taimi muamua e leʻi malamalama tagata i le leo na latou faʻalogo ai mai le lagi. O le a se mea e mafai ona aʻoaʻoina e tamaiti mai lenei tala e uiga i le mauaina o faaaliga?

Gaoioiga e Mafai Ona Fai

• Faitau le 3 Nifae 11:1--4 ma tamaiti, taofi e fai fesili e pei o le “Aisea e te manatu ai e le mafai e tagata ona malamalama i le leo?” Ona fai atu lea ia i latou e faitau fuaiupu 5-7 e saili ai po o le a le mea na faia e tagata na fesoasoani ai ia i latou ia malamalama i le leo i o latou loto. E faʻapefea ona tatou taumafai e faʻalogo i le Atua pe a fetalai mai o Ia i o tatou loto e ala i le Agaga Paia?

• Ia taina lemu se lipine o se viiga po o se pese a tamaiti ina ia faigata ona lagona. Fesili atu i tamaiti pe mafai ona latou malamalama i upu o le pese. Ona fesoasoani lea i tamaiti e saili le 3 Nifae 11:3 mo se faamatalaga o le siufofoga mai le lagi. Aisea e le saunoa mai ai le Atua ia i tatou i se siufofoga “leotele” pe “malosi”? O a mea e mafai ona tatou faia e lagona atili ai o Ia?

Fautuaina le Aoaoina i le Aiga

Valaaulia tamaiti e ta’u atu i se tasi se asiasiga a Iesu i Amerika-pe afai e mafai, o se tasi e le iloa lea vaega.

Faaleleia o Lo Tatou Aoao Atu

Taulimaina faalavefau i le alofa. “O isi taimi e amio ai se tamaitiiti i ni auala e faalavelave ai i le aotauina o isi i le vasega. A tupu lenei mea, ia onosai, alofa, ma malamalama e uiga i luitau o loo feagai ma lea tamaitiiti. … Afai o le tamaitiiti o loo faalavelave e i ai ni manaoga faapitoa, talanoa i se tagata tomai o manaoga faapitoa a le uarota po o le siteki pe asiasi i le disabilities.ChurchofJesusChrist.org ina ia e iloa ai pe faapefea ona sili atu ona taulimaina na manaoga” (Aoao Atu i le Ala a le Faaola,26).