Ua faailoa mai e Iesu le Au Aposetolo e Toasefululua

Nifae Tolu: Lenei Toasefululua o e Ua Ou Filifilia, saunia e Gary L. Kapp

21-27 Setema

3 Nifae 12-16

“O Au o le Tulafono, ma le Malamalama”

A o e suesueina le 3 Nifae 12-16, vaavaai mo upumoni o le a aoga i tamaiti o loo e aoaoina. O lenei otootoga ua taʻu mai ai nisi o upumoni, ae mafai e le Agaga ona faasino oe i isi.

Tusi Faamaumau Ou Lagona Uunai

aikona e fefaasoaai

Valaaulia le Fefaasoaai

Tufa faataamilo se ata o Iesu. Tuu atu i tamaiti e feauauai i le uuina o le ata ma fetufaai mai se mea na aoao mai e Iesu, e pei o se mea na latou aoaoina i le fale i lenei vaiaso.

aikona o le aoao atu

Aoao atu le Aoaoga Faavae: Tamaiti Laiti

3 Nifae 12:14–16

E mafai ona avea au ma faataitaiga lelei i isi.

O nisi taimi atonu e le iloa e tamaiti le tele o a latou faataitaiga e mafai ona faamanuiaina ai isi. Faʻaaoga nei fuaiupu e faʻamalosia ai i latou ina ia susulu atu lo latou malamalama.

Gaoioiga e Mafai Ona Fai

• Tau atu i tamaiti o le 3 Nifae 12:14-16 o loo faatatau ia i latou, ona faitau leotele lea. Soo se taimi lava e te faitau ai “oe” po o le “outou,” faasino i tamaiti, ma fai atu ia i latou e faasino ia i latou lava.

• Faaali atu i tamaiti se moli uila, ma valaaulia se tasi o i latou e ki ia ola. Faamalamalama atu pe a tatou mulimuli i le Faaola, e pei lava o le ola o se moli lea e mafai ona fesoasoani i isi ia mulimuli foi ia te Ia. Ona ufiufi lea pe natia le moli, ma fai atu i tamaiti e taʻu mai nisi o mea e mafai ona latou faia e avea ai ma faataitaiga lelei i isi. O taimi uma latou te faia ai, ia latou faaalia le malamalama (tagaʻi foi i le itulau o gaoioiga o lenei vaiaso).

• Usu faatasi se pese o aoao mai ai pe faapefea ona maua le fiafia, e pei o le “Susulu Pea” po o le “E Pei A‘u o se Fetu” (Tusipese a Tamaiti 96, 84). Tau atu i tamaiti le malamalama e te vaaia ia i latou pe a latou faia “galuega lelei,” ma faamatala pe faapefea ona fesoasoani lo latou malamalama ma faataitaiga i isi ma musuia oe e fai foi galuega lelei.

3 Nifae 14:7

E tali mai le Tama Faalelagi i a’u tatalo.

O lenei fuaiupu e mafai ona fesoasoani i tamaiti ia malamalama o le a faafofoga ma tali mai le Atua i a latou tatalo.

Gaoioiga e Mafai Ona Fai

• Ao e faitau i le 3 Nifae 14:7, valaaulia tamaiti e fai taga e sui tulaga i valaaulia taitasi a le Faaola i lenei fuaiupu. Mo se faʻataʻitaʻiga, e mafai ona sii i luga o latou lima (fesili), faia ni meavaai i o latou lima (saili), pe faia se taga tuʻituʻi (tuʻituʻi). Fesoasoani i tamaiti e mafaufau i mea e mafai ona latou fai atu ai ma ole atu i a latou tatalo. Faamalamalama atu e mafai ona tatou tau atu i le Tama Faalelagi soo se mea, ma o le a Ia faafofoga mai aua e alofa o Ia ia i tatou.

• Valaaulia tamaiti e faaali atu ia te oe mea latou te faia ma o latou lima, mata, ma ulu pe a latou tatalo. Faaaoga se pese e pei o le “Matou Te Ifo Atu” e fesoasoani (Tusipese a Tamaiti,18). O ai tatou te talanoa i ai pe a tatou tatalo? Tuuina atu lau molimau e faafofogaina e le Tama Faalelagi a tatou tatalo.

3 Nifae 14:24–27

E finagalo le Faaola ia ou faalogo ma faia mea na Ia aoao mai.

Tau na o le faalogo i fetalaiga a le Faaola e le lava. E na o i latou o e ola i Ana aoaoga e mafai ona tetee atu i afa o le olaga.

Gaoioiga e Mafai Ona Fai

• Usu faatasi le “Tagata Poto ma le Tagata Valea” (Tusipese a Tamaiti,132) pe faitau le 3 Nifae 14:24–27. Fesoasoani i tamaiti e sui o latou igoa mo “le tagata poto” ao latou pepese. Aisea na tu mau ai le fale o le tagata poto i le taimi o le afa? Iloilo le fuaiupu e 24 e faamamafaina ai na ia faalogo ma faia le mea na fetalai ai le Faaola.

• Faaali atu i tamaiti se ma’a ma sina oneone. Fai atu ia i latou e tusi i le papa pe a e faamatalaina se filifiliga e mulimuli i le Faaola ma tusi i le oneone pe a e faamatalaina se filifiliga e le mulimuli ia te Ia. Molimau atu afai tatou te faia le mea na fai mai ai le Faaola, tatou te malolosi e pei o se fale ua fausia i luga o se maa.

aikona o le aoao atu

Aoao atu le Aoaoga Faavae: Tamaiti Matutua

3 Nifae 12:6

E tatau ona ou fia ‘ai ma fia inu i le amiotonu.

E mafai e tagata uma ona malamalama i le fia ‘ai ma le fia inu; na fetalai ai le Faaola e uiga i nei lagona e aoao ai i tatou pe faapefea o tatou lagona e uiga i le sailia o le amiotonu.

Gaoioiga e Mafai Ona Fai

• A aunoa ma le faatagaina o isi tamaiti e faalogo, fai atu i se tamaitiiti e faafoliga e ‘ai pe inu, ma tuu atu i isi tamaiti e mate mai le mea o loo ia faia. E faʻapefea lagona pe a ‘ai i meaʻai lelei pe inu i le vai mama? E faapefea ona tatou faafaileleina o tatou agaga? Valaaulia tamaiti e faitau le 3 Nifae 12:6 e saili po o le a le mea o finagalo le Faaola ia tatou “fia ai ma fia feinu ai.” E faʻapefea ona tatou faʻaali atu tatou te mananao i le amiotonu e pei ona tatou mananao ai i meaʻai ma vai inu?

• Aumai ni ata o meaai ma vai inu, ma faailoga taʻitasi ma mau faasino e pei o le Salamo 119:103; Ioane 6:35; 2 Nifae 32:3; Enosa 1:4; po o le 3 Nifae 20:8. Fai atu i tamaiti e faitau ia fuaitau ma faamatala mea latou te aoao mai e uiga i mea e mafai ona tatou faia e faaali atu ai tatou te fia ‘ai ma fia inu i le amiotonu. Faasoa atu ni aafiaga na e lagonaina “faatumuina i le Agaga Paia,” ma valaaulia tamaiti e faasoa mai o latou aafiaga.

3 Nifae 13:1–8, 16–18

E tatau ona ou faia mea lelei mo mafuaaga tatau.

O nei fuaiupu o loo faailoa mai ai o galuega lelei e le lava-o a tatou galuega e tatau ona musuia e le alofa mo le Atua ma se manao e auauna atu ia te Ia.

Gaoioiga e Mafai Ona Fai

• Fai atu i tamaiti taitasi e suesue i le 3 Nifae 13:1–4, 5–8, po o le 16–18 ma faailoa galuega lelei o loo taʻua i nei fuaiupu (faamatala o le faia o “alofa” o lona uiga o le foai atu i e matitiva). Aisea na fetalai mai ai le Faaola ia aua ne’i pei o nisi o tagata o loo faia nei mea?

• Tuu atu i tamaiti taitoatasi se fasipepa o tusia ai se faatinoga amiotonu (pe tuu atu ia i latou e mafaufau i a latou lava faataitaiga). Fai atu ia i latou e mafaufau i mafuaaga lelei ma mafuaʻaga leaga mo le faia o na mea. Uunai i latou ia faia pea mea lelei mo mafuaaga tatau.

3 Nifae 14:21–27; 15:1

O le saogalemu faaleagaga e sau mai le faalogo ma le faia o mea o loo aoao mai e le Faaola.

O “timu” ma “lologa” e oʻo mai ia i tatou uma i le olaga, ae e mafai ona tatou manumalo i faʻafitauli pe afai tatou te faʻalogo ma faia mea o loʻo aʻoaʻo mai e Iesu.

Gaoioiga e Mafai Ona Fai

• Faitau faatasi o se vasega le 3 Nifae 14: 21-27 ma le 15:1, ma fai atu i tamaiti e tutu i luga i taimi uma lava e te faitauina ai le upu “faia.” Aisea e faamamafaina ai e le Faaola le faia o Ana fetalaiga, ae le na o le faalogo pe manatua? Valaaulia tamaiti e tusi se ata o fuaiupu 24–25 ma tusi i luga o le ma’a “Iesu” ma se mea na aoao mai e Iesu tatou te faia. Usu faatasi le ”O Le Tagata Poto ma le Tagata Valea” (Tusipese a Tamaiti,132)

• Valaaulia tamaiti e tutu i luga, ma fai atu ia i latou e mafaufau faapea o le tasi vae e faatusa i le faalogo i upu a le Faaola ae o le isi e faatusa i le faia o i latou. Valaaulia i latou e sii le vae “faia” ma tu faapaleni i luga o le vae “faalogo.” O le a le mea e tupu pe afai e agi mai se matagi malosi i totonu o le potu? Faaaoga lenei faataitaiga e faamalamalama ai pe aisea e saogalemu ai le faia o mea e fetalai mai ai le Faaola ae le na o le faalogo i Ana upu.

aikona o le aoaoina

Fautuaina le Aoaoina i le Aiga

Valaaulia tamaiti e filifili se mea se tasi na latou aoaoina e uiga i aoaoga a Iesu i le aso ma fuafua pe faapefea ona latou faatinoina. E faʻapefea ona fesoasoani a latou amioga ia i latou e avea ma se malamalama mo o latou aiga ma uo?

Faaleleia o Lo Tatou Aoao Atu

Fetuunai ia gaoioiga ina ia fetaui ma manaoga. Aua e te vaai i nei otootoga o ni faatonuga e tatau ona e mulimuli ai. Nai lo lena, ia faʻaaogaina e avea o se punavai o manatu e faʻaalia ai au lava musumusuga aʻo e mafaufau loloto i manaoga o tamaiti o loʻo e aoaoina. I nisi tulaga, atonu e te lagona le musuia e fetuunai se gaoioiga mo tamaiti laiti e aoao atu i tamaiti matutua, po o le isi itu.

itulau o gaoioiga: E mafai ona avea au o se faataitaiga lelei i isi