Nifae o loo tatalo i le olo o se togalaau

Ata o Nifae i le olo o se togalaau, saunia e Jerry Thompson

24--30 Aokuso

Helamana 7–12

“Ia Manatua le Alii”

A o e faitauina le Helamana 7-12, mafaufau pe mafai faapefea e tala ma mataupu faavae o loo i nei mataupu ona faamanuiaina tamaiti o loo e aoaoina. O manatu i lenei otootoga e mafai ona faaopoopo i musumusuga e te mauaina.

Tusi Faamaumau Ou Lagona Uunai

aikona e fefaasoaai

Valaaulia le Fefaasoaai

Fesili atu i tamaiti po o a mea latou te iloa e uiga i le perofeta o Nifae, le atalii o Helamana (tagai Helamana 7--12). Afai e manaomia, faamatala le eseesega i le va o lenei perofeta e igoa ia Nifae ma le perofeta e igoa ia Nifae i le amataga o le Tusi a Mamona.

aikona o le aoao atu

Aoao atu le Aoaoga Faavae: Tamaiti Laiti

Helamana 7:20

E finagalo le Alii ou te manatua Ia.

Sa mafaufau Nifae pe na faapefea ona liliuese ona tagata mai le Atua ma galo o Ia. E mafai faapefea ona e fesoasoani i tamaiti e aoao ni auala latou te manatua ai le Tama Faalelagi ma Iesu?

Gaoioiga e Mafai Ona Fai

• Faasoa atu i tamaiti se aafiaga na galo ai ia te oe se mea taua. Fesili atu ia i latou pe na i ai se mea na galo ia i latou. Faitau ia i latou le Helamana 7:20, ma faamatala atu na filifili tagata Sa Nifae e faagalo le Atua. Na manao le perofeta o Nifae latou te manatuaina le Atua. Aumai ata i totonu o se ato e fai ma auala e mafai ona manatua ai e tamaiti le Tama Faalelagi ma Iesu. Tuu atu i tamaiti e auauai i le filifilia o se ata ma fetufaai pe mafai faapefea ona tatou manatua le Atua i aso uma.

• Fesoasoani i tamaiti e faamaea le itulau o gaoioiga o lenei vaiaso.

Helamana 8:13–23

E molimau perofeta ia Iesu Keriso.

Na molimau Nifae o le a afio mai Iesu Keriso, ma sa ia valaaulia ona tagata ia salamo ma mulimuli ia te Ia. Faaaoga nei mataupu e aoao ai tamaiti o perofeta o loo molimau ia Iesu Keriso.

Gaoioiga e Mafai Ona Faia

• Faaali atu se ata o Iesu Keriso, ma tau atu i tamaiti o perofeta e pei o Nifae ua valaaulia i tatou e mulimuli ia Iesu. Faitau upu nei e uiga i perofeta mai le Helamana 8:22: “Sa latou molimau mai e uiga i le afio mai o Keriso, ma sa tulimatai i luma, ma olioli i lona aso.” Fetufaai ma tamaiti se mea na saunoa ai lo tatou perofeta soifua e uiga i le Faaola.

• Usu faatasi se pese e faatatau i perofeta, e pei o le “Mulimuli i le Perofeta” (Tusipese a Tamaiti,58). Filifili se fasi fuaitau autu mai le pese, ma tusi se upu se tasi mai le fasi fuaitau i luga o ni pepa tulagavae [paper footprints]. Tuu tulagavae i luga o le foloa e tau atu i se ata o le Faaola. Valaaulia tamaiti e mulimuli i le ala o tulagavae, ma fesoasoani ia i latou e faitau ia upu.

Helamana 10:11–12

O le a ou usitai i lo’u Tama Faalelagi.

O le faataitaiga a Nifae o le usiusitai e mafai ona musuia tamaiti o loo e aoaoina ina ia usiusitai i le Alii.

Gaoioiga e Mafai Ona Fai

• Faitau le Helamana 10:2, 11–12, ma fesoasoani i tamaiti ia malamalama na usiusitai Nifae i le Atua. Valaaulia tamaiti e faatino le mea na faia e Nifae. Mo se faʻataʻitaʻiga, fai atu ia i latou e savavali agai i le isi itu o le potu (pei o latou o atu i le fale), taofi, liliu, ma savavali agai i le isi itu o le potu (pei o latou toe foi atu e aʻoaʻo tagata). Fesoasoani ia i latou ina ia latou iloa na manao Nifae e usitai i le Alii e ui lava na ia faia se mea faigata.

• Fesoasoani i tamaiti ia malamalama o nisi taimi e finagalo ai le Tama Faalelagi tatou te faia se mea e ese mai le mea tatou te mananao e fai, ae mafai ona tatou usiusitai ia te Ia e pei o Nifae. Faasoa atu faamatalaga e pei o “O nisi taimi ou te fia ita, ae finagalo le Tama Faalelagi ou te … ,” ma tuu atu i tamaiti e faauma ia faamatalaga. Uunai tamaiti ia manatua e taofi ma mafaufau e uiga i le mea e finagalo le Tama Faalelagi latou te faia ona faia lea.

aikona o le aoao atu

Aoao atu le Aoaoga Faavae: Tamaiti Matutua

Helamana 7–11

O le a ou saogalemu faaleagaga pe a ou mulimuli i le perofeta.

Na aoao mai Peresitene James E. Faust: “O lo tatou saogalemu ua taatia lea i lo tatou uai atu i mea e fai mai ai [le Peresitene o le Ekalesia] ma mulimuli i ana fautuaga” (“Continuous Revelation,” Ensign, Nov. 1989, 10).

Gaoioiga e Mafai Ona Fai

• Valaaulia tamaiti e fai se lisi i luga o le laupapa o mea e faia e le perofeta (tagai “Perofeta,” Taiala i Tusitusiga Paia, scriptures.ChurchofJesusChrist.org). Fesoasoani ia i latou e saili le Helamana 7:1–2, 27–29; 8:22–23; ma le 10:3–4, 6–7 e vaai ai pe na faapefea ona faia e Nifae nisi o vaega i le latou lisi. O anafea na tatou vaaia ai le tatou perofeta i le aso o faia nei vaega? Faasoa atu lau molimau o le perofeta soifua. Ina ia faaalia le taua o perofeta, faaali le minute muamua o le vitio “Watchman on the Tower” (ChurchofJesusChrist.org).

• Faitau faatasi le Helamana 11:3–7 (pe toe iloilo “Mataupu 39: Ua Maua e Nifae le Mana Tele,” Tala o le Tusi a Mamona, 108--10, po o le vitio talafeagai i luga o le ChurchofJesusChrist.org). Fai atu i tamaiti e faalogo mo mea na tutupu i tagata na le faalogo i le perofeta. O le a se mea e tupu pe a tatou le faʻalogo i le perofeta? E faapefea ona faamanuiaina i tatou pe a tatou mulimuli ia te Ia? Faasoa atu se mea na aoao mai e lo tatou perofeta, ma uunaia tamaiti e mulimuli i ana aoaoga.

Helamana 7:20–21

E finagalo le Alii ou te manatua o Ia.

O tamaiti o loo e aoaoina o le a feagai ma mea faalavefau e ono mafua ai ona latou faagaloina le Tama Faalelagi ma Iesu Keriso. E faʻapefea ona e faʻamalosia tamaiti e faʻaalu se taimi i mea faaleagaga?

Gaoioiga e Mafai Ona Fai

• Faitau faatasi le Helamana 7:20--21, ma fesili i tamaiti pe o le a le uiga o le faʻagaloina o le Atua. Faamalamalama atu o le upu faagaloina e mafai foi ona faauigaina o le “lafoai” pe “le amanaiaina.” Faaali atu se ata o le Faaola, ma valaaulia tamaiti e tusi ni mea atonu latou te faaaluina le tele o le taimi e faia ai lena mea e ono mafua ai ona latou faagaloina le Alii. Tuu a latou ata i luma o le ata o Iesu. Fai atu i tamaiti e mafaufau i mea e mafai ona latou faia i aso taitasi e manatua ai le Tama Faalelagi ma Iesu. A o latou fefaasoaai o latou manatu, aveese ata taitasi sei vagana ua faaalia le ata o le Faaola.

• Valaaulia tamaiti e faauma le itulau o gaoioiga o lenei vaiaso.

Helamana 10

Pe a ou mafaufau loloto i afioga a le Atua, e mafai ona ou mauaina faaaliga.

Pe o iloa ea e tamaiti o loo e aoaoina le uiga o le mafaufau loloto? Fesoasoani ia latou malamalama na faamanuiaina Nifae i faaaliga ina ua ia mafaufau loloto i mea na faaali atu e le Alii ia te ia.

Gaoioiga e Mafai Ona Fai

• Fesoasoani i tamaiti ia malamalama i le uiga o le mafaufau loloto (tagai “Ponder,” Taiala i Tusitusiga Paia, scriptures.ChurchofJesusChrist.org). Valaaulia i latou e mafaufau i isi upu e faamatala ai le uiga o le mafaufau loloto . Ona fai atu lea ia i latou e faitau le Helamana 10: 1-3 ma sui le upu mafaufau loloto i upu na latou mafaufau i ai. O le a le mea na tupu ina ua mafaufau loloto Nifae i tusitusiga paia? (tagai Helamana 10:3--7). Faasoa atu se taimi na e mauaina ai se faaaliga ina ua uma ona e mafaufau loloto i se mau po o se faaaliga i aso nei po o se aafiaga faaleagaga.

• Tuu atu se taimi i tamaiti e faitau ai le Helamana 10, pe faitau faatasi, ma uunaia i latou e sue se fuaiupu latou te mananao e mafaufau loloto i ai i le vaiaso a sau. Valaaulia i latou e tusi le fuaiupu na latou filifilia i se pepa po o se kata ma tuu i se mea e faamanatu ai ia i latou e mafaufau loloto i lena fuaiupu i le vaiaso a sau. I se vasega i le lumanai, tuu atu ia i latou se taimi e faasoa mai ai mea na latou aoaoina ao latou mafaufau loloto i le fuaiupu.

aikona o le aoaoina

Fautuaina le Aoaoina i le Aiga

Uunai tamaiti e fetufaai ma o latou aiga mea latou te fuafua e fai e manatua ai le Tama Faalelagi ma Iesu Keriso i aso uma. E mafai foi ona latou valaaulia o latou aiga e auai faatasi ma i latou i a latou sini.

Faaleleia o Lo Tatou Aoao Atu

Tuuina atu ni valaaulia e faaaloalogia ai le faitalia. Afai e te valaauliaina tamaiti e faatino mea na e aoaoina ai i latou, mafaufau i auala e faamamaluina ai a latou filifiliga saoloto ao latou faʻaaogaina mea ua latou aʻoaʻoina. Mo se faataitaiga, a maea se lesona e uiga i le Faaola, e mafai ona e fesili, “O le a se mea e te faia e manatua ai le Faaola i lenei vaiaso?”

itulau o gaoioiga: E finagalo le Alii ou te manatua Ia