fitafita talavou e lua afe

Fitafita Talavou e Lua Afe, saunia e Arnold Friberg

10--16 Aokuso

Alema 53--63

“Faasaoina i Lona Mana Faavavega”

A’o e faitau i le Alema 53--63, mafaufau pe faapefea ona e faatinoina tala i nei mataupu mo tamaiti ma fesoasoani ia i latou e aoao ia mataupu faavae o le talalelei o loo aoao mai e tala.

Tusi Faamaumau Ou Lagona Uunai

aikona e fefaasoaai

Valaaulia le Fefaasoaai

Ina ia saunia tamaiti e aoao mai le Alema 53-63, valaaulia i latou e faasoa mai mea latou te manatua e uiga i Aneti-Nifae-Liae (tagai Alema 23--24). Ina ia fesoasoani, faaali se ata na e faaaogaina e aoao ai le tala, pe faamanatu ia i latou se gaoioiga na latou faia i le vasega.

aikona o le aoao atu

Aoao atu le Aoaoga Faavae: Tamaiti Laiti

Alema 53:20–21; 56:27, 47–48

E mafai ona ou faamaoni i le Atua e pei o le autau talavou.

O le autau talavou a Helamana (o lona uiga o le “laitiiti”) e mafai ona avea ma faʻataʻitaʻiga lelei mo tamaiti o lau vasega. Uunai tamaiti e taumafai e pei o i latou.

Gaoioiga e Mafai Ona Fai

• Valaaulia se tamaitiiti e uu i luga le ata i le otootoga o lenei vaiaso mai le Sau, Mulimuli Mai ia te A’u—Mo Tagata Taitoatasi ma Aiga ao e aoteleina le tala i le autau talavou a Helamana. E mafai foi ona e faaaogaina le “Mataupu 34: O Helamana ma Fitafita Talavou e 2,000” (Tala o le Tusi a Mamona, 93--94, po o le vitio talafeagai i le ChurchofJesusChrist.org). Tuu atu i tamaiti e fetufaai mai mea latou te iloa ma fiafia e uiga i le tala o le autau talavou e 2,000.

• Valaaulia se teine ma se tama e fai ma sui o tina ma tamā o fitafita talavou. A’o e faitau i le Alema 56:27 ma le 47--48, ia tuu atu nei mea i tamaiti e taofi e fai ma sui o auala na fesoasoani ai tina ma tama i le taua, e pei o se taga meaai e fai ma sui o “aiaiga” o tama na auina mai ma tusitusiga paia e fai ma sui o aoaoga a tina. Fai atu i tamaiti e faasoa mai mea ua tuuina atu e o latou matua mo i latou pe aoaoina foi i latou.

• Faitau Alema 53:20-21, ma fesoasoani i tamaiti ia malamalama i uiga o upu e pei o le lototoa, lototele, malosi ma le faamaoni . Faamatala pe faapefea ona faaalia e le autau talavou nei uiga. Fai ni pine igoa faigofie mo tamaiti e faitau, “Pe a ou , ua pei au o se fitafita talavou!” Fesoasoani i tamaiti e faatumu le avanoa i se uiga latou te filifilia mai le Alema 53:20–21.

• Fesoasoani i tamaiti e faamaea le itulau o gaoioiga o lenei vaiaso. Fesoasoani ia i latou e mafaufau i auala e mafai ona avea ai i latou e pei o le autau a Helamana. Usu faatasi le “Matou Te Aumaia Le Upu Moni I Le Lalolagi” (Tusipese a Tamaiti, 92--93).

Alema 58:32–41

Pe a ou popole, e mafai ona ou talitonu i le Atua.

Ina ua feagai o ia ma ana autau i taimi faigata, sa faatuatuaina e Helamana le Alii. O le a se mea e mafai e tamaiti o loʻo e aoaoina ona aʻoaʻoina mai lana faʻataʻitaʻiga?

Gaoioiga e Mafai Ona Fai

• Tusi se foliga faauu i luga o le laupapa, ma talanoa e uiga i le popolega o Helamana ona o lana ‘autau na le lava ni meaai po o ni alii e totoe e tau ai (tagai Alema 58:32--41). Fai i tamaiti e faasoa mai taimi na latou popole ai. Faitau le Alema 58:37 (pe fesoasoani i se tamaitiiti e faitauina), ma fesoasoani i tamaiti e sui foliga i luga o le laupapa i se foliga ataata e faaali atu ai le lagona o Helamana ona sa ia faalagolago i le Atua. O a mea e mafai ona tatou faia pe a tatou lagona le popole? Usu faatasi le “Ataata” (Tusipese a Tamaiti, 128).

• Tusi i luga o ni fasi pepa nisi o mea e ono popole ai tamaiti. Tuu atu i tamaiti e auauai i le filifilia o se pepa mo oe e faitau ai, ma valaaulia tamaiti e faasoa mai pe faapefea ona fesoasoani le Atua ia i latou i nei popolega taitasi. Fetufaai se mea na tupu na fesoasoani ai le Atua ia te oe ina ua e popole.

aikona o le aoao atu

Aoao atu le Aoaoga Faavae: Tamaiti Matutua

Alema 56:45–48; 57:21, 25–27; 58:39–40

E mafai ona ou faamaoni i le Atua e pei o le autau talavou.

O a upumoni mai le tala o le autau talavou a Helamana (o lona uiga “taulealea”) e mafai ona fesoasoani i tamaiti i luitau o feagai ma i latou?

Gaoioiga e Mafai Ona Fai

• Valaaulia tamaiti e faasoa mai mea latou te iloa e uiga i le autau talavou. E mafai foi ona e faaaogaina le “Mataupu 34: O Helamana ma Fitafita Talavou e 2,000” (Tala o le Tusi a Mamona, 93--94, po o le vitio talafeagai i le ChurchofJesusChrist.org). Tuu atu i tamaiti e fetufaai mai mea latou te faamemelo i ai e uiga i fitafita.

• Faitau faatasi le Alema 56:45–48; 57:21, 25–27; ma le 58:39–40. Valaaulia tamaiti e saili upu ma fuaitau mai nei fuaiupu o loo faamatalaina ai le autau talavou. O le a le uiga o nei upu ma fuaitau? E mafai faapefea ona tatou faapei o le autau talavou?

• Faitau le Alema 56:46--48 i tamaiti, ma valaaulia i latou e faalogo mo mea na aoaoina e tina o le autau talavou i a latou fanau e uiga i le faatuatua. E faapefea ona fesoasoani matua i aso nei i a latou fanau ina ia maua le faatuatua? Aisea e taua ai i fanau le mulimuli i aoaoga amiotonu a o latou matua ma taitai o le Ekalesia i le “ala saʻo”? (Alema 57:21).

tina o aoaoina lona atalii

Fatu o le Faatuatua, saunia e Jay Ward

Alema 53:10–17; 56:27

E mafai ona ou tausia a’u feagaiga.

Sa osia e le autau talavou ma o latou matua feagaiga na latou faataunuuina ma le faamaoni. E mafai ona e faʻaaoga lenei tala e aʻoaʻo ai tamaiti e uiga i le taua o feagaiga.

Gaoioiga e Mafai Ona Fai

• Vaevae tamaiti i ni vaega se tolu: tasi e fai ma sui o Helamana, o le isi e avea ma sui o le nuu o Amona, ma lona tolu e fai ma sui o atalii o le nuu o Amona. Faitau faatasi le Alema 53:10--17 , ma tuu atu i vaega e fefaasoaai pe faapefea e tagata o latou fai ma sui ona faia ma tausia feagaiga. Faasoa atu lau molimau e faamanuiaina i tatou e le Tama Faalelagi pe a tatou tausia a tatou feagaiga.

• Tusi i luga o le laupapa fasi fuaitau mai le Mosaea 18: 8-10 po o le Mataupu Faavae ma Feagaiga 20:37 e faamatala ai mea tatou te osi feagaiga e fai pe a tatou papatiso. Tusi foi isi fuaitau e le fesootai i feagaiga. Fai atu i tamaiti e lio mea ua tatou osi feagaiga e fai (ia latou faaaoga tusitusiga paia pe a manaomia). E faapefea ona faamanuiaina i tatou pe a tatou tausia a tatou feagaiga? Uunai tamaiti e tusi i lalo mea ua latou osi feagaiga ma le Atua e fai ma tuu a latou lisi i se mea e mafai ona latou vaai soo i ai.

• Valaaulia se tamaitiiti e faitau le Alema 56:27. Na faapefea ona fesoasoani tama i o latou atalii e aunoa ma le solia o a latou feagaiga e aua le tau? O ai e lagolagoina i tatou i le tausia o a tatou feagaiga?

Alema 61:3–14

E mafai ona ou filifili e aua le ita.

Na tuuaia pepelo e Moronae Paʻorana, ae nai lo le ita, na fai atu ai Paorana, “Ou te … olioli i le tele o lou loto.” (Alema 61:9).

Gaoioiga e Mafai Ona Fai

• Valaaulia tamaiti e mafaufau e uiga i se taimi na tuuaia ai i latou i le faia o se mea na latou le faia. Tau atu ia i latou pe na faapefea ona tupu lenei mea ia Paʻorana (tagai Alema 60--61). E mafai ona e faʻaaoga le “Mataupu 35: O Kapeteni Moronae ma Paorana” (Tala o le Tusi a Mamona, 95--97, po o le vitio talafeagai i luga o le ChurchofJesusChrist.org). Ina ia iloa pe na faapefea ona tali atu Paʻorana, ia auauai i le faitauina o fuaiupu mai le Alema 61:3-14. O le a le mea na faia e Paʻorana ina ua molia o ia e Moronae? O le a se mea ua tatou aoaoina e uiga i le faamagalo atu mai le faataitaiga a Paʻorana? E faʻapefea ona tatou pei o ia?

• Tusi i luga o le laupapa O le a se mea e tatau ona ou faia pe a ita se tasi ia te au? Valaaulia tamaiti e feauauaʻi e tusi ni tali i luga o le laupapa. Na faapefea ona tali e Paʻorana lenei fesili? Fai i tamaiti e tusi nei tali i se tusi ia i latou lava e mafai ona latou faitau pe a ita se tasi ia i latou.

aikona o le aoaoina

Fautuaina le Aoaoina i le Aiga

Uunai tamaiti e fetufaai ma o latou aiga se tasi auala latou te mananao e avea ai faapei o le autau talavou. E mafai foi ona latou faafetai i o latou matua mo le aoaoina o i latou e pei o tina o le autau talavou.

Faaleleia o Lo Tatou Aoao Atu

Faagauai tamaiti i talanoaga faaletalalelei. O le suia o le potuaoga e mafai i nisi taimi ona fesoasoani i tamaiti ia sili atu ona auai i talanoaga faaletalalelei. Mo se faataitaiga, e mafai ona e valaauliaina i nisi taimi tamaiti e nonofo i se liʻo i luga o le fola nai lo o latou nofoa.

itulau o gaoioiga: E mafai ona ou faamaoni i le Atua