For the Blessings of Liberty, saunia e Scott M. Snow

3--9 Aokuso

Alema 43--52

“Tutumau Mausali i le Faatuatua ia Keriso”

Ao e fuafuaina gaoioiga, e mafai ona e maua ni manatu iinei i fautuaga mo le aoaoina o tamaiti laiti ma tamaiti matutua atu.

Tusi Faamaumau Ou Lagona Uunai

Valaaulia le Fefaasoaai

Fai atu i tamaiti e faasoa mai mea latou te manatua e uiga i nisi o tagata ma tala i le Alema 43--52, e pei o le Taitaiau Sili o Moronae po o le tagavai o le saolotoga. Ina ia fesoasoani ia i latou e manatua, faaali ata mai le Tala o le Tusi a Mamona, o le Tusi Ata o le Talalelei, po o le Sau, Mulimuli Mai ia te Au—Mo Tagata Taitoatasi ma Aiga.

Aoao atu le Aoaoga Faavae: Tamaiti Laiti

Alema 43:17–21; 48:7–8; 49:1–5; 50:1–6

E mafai ona ou maua le puipuiga faaleagaga i le talalelei.

Ina ia puipuia tagata sa Nifaē mai ia sa Lamanā, na saunia e Moronae ona tagata i ni ofutau ma olo. O ana taumafaiga e aoaoina ai i tatou i le auala e mafai ona tatou maua ai le saogalemu faaleagaga.

Gaoioiga e Mafai Ona Fai

• Tau atu i tamaiti sina mea itiiti e uiga i le taua i le va o sa Nifae ma sa Lamana (tagai i le Alema 43), ma faamamafa atu o sa Nifae na ofuina ni ofutau e puipuia ai i latou lava. E mafai ona e faaaogaina le “Mataupu 31: Ua Faato’ilaloina e Kapeteni Moronae ia Saraemina” (Tala o le Tusi a Mamona, 85--88, po o le vitio talafeagai i le ChurchofJesusChrist.org). Faitau le Alema 43:19, ma valaaulia tamaiti e faasino i vaega o o latou tino ao latou faalogo i ai i le mau.

• Faamalamalama atu e pei lava o sa Nifae i se taua faaletino, ua tatou i ai i se taua faaleagaga e faasaga ia Satani, o lē e le manao ia tatou tausia poloaiga a le Atua. Tusi se tamaitiiti i luga o le laupapa, ma fesoasoani i tamaiti e mafaufau i mea e puipuia ai i tatou faaleagaga ao puipuia e le ofutau o tatou tino (mo se faataitaiga, tatalo, faitau tusitusiga paia, po o le tausia o poloaiga). O taimi uma e taʻua ai se mea, tusi se fasi ofutau i le tamaitiiti i luga o le laupapa.

Defense of a Nephite City, saunia e Minerva K. Teichert

Alema 46:11–16; 48:11–13, 16–17

E mafai ona ou faamaoni e pei o le Taitaiau Moronae.

O Moronae o se faataitaiga maoae o le faatuatua, lototoa, ma le auauna atu. Mafaufau pe mafai faapefea ona e musuia tamaiti e mulimuli i lana faataitaiga.

Gaoioiga e Mafai Ona Fai

• Faaali atu le ata o Moronae i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Faamatala atu i tamaiti e uiga i le tagavai o le saolotoga ma le mea na tusia ai i luga, faaaoga fuaitau mai le Alema 46:11--16. E mafai ona e faaaogaina le “Mataupu 32: O Kapeteni Moronae ma le Tagavai o le Saolotoga” (Tala o le Tusi a Mamona, 89--90, po o le vitio talafeagai i le ChurchofJesusChrist.org). Tuu atu i tamaiti e fesoasoani e faamatala le tala i le tele e mafai ai. Faamanino atu na faaaoga e Moronae le tagavai o le saolotoga e fesoasoani ai i tagata sa Nifae ia manatua le mea na taua ia i latou.

• Fesoasoani i tamaiti e fai se tagavai o le saolotoga mo i latou lava poʻo mo lau vasega. Amata i le fesoasoani ia i latou e mafaufau i mea latou te talitonu i ai po o mea e finagalo le Tama Faalelagi latou te manatua. Tuu atu ia i latou e tusi ni ata o nei mea i luga o se fasi pepa lapoa, pe mafai foi ona e aumaia ni ata mo i latou e faapipii i le pepa.

• Fai atu i tamaiti e taʻu atu ia te oe e uiga i nisi tagata latou te mananao ia avea faapei ma pe aisea latou te mananao ai e pei o i latou. Ona faasoa atu lea ia i latou nisi o upu mai le Alema 48: 11-13 lea e faamatala ai Moronae, ma valaaulia i latou e mate po o ai o loo faamatala mai e nei upu. Faaali atu se ata o Moronae, ma talanoa e uiga i auala e mafai ai ona tatou faapei o Ia.

Aoao atu le Aoaoga Faavae: Tamaiti Matutua

Alema 43:17–21; 48:7–8; 49:1–5; 50:1–6

E mafai ona ou maua le puipuiga faaleagaga i le talalelei.

O le lalolagi e tele mea matautia faaleagaga, ae e tele naua mea e mafai ona aoaoina e tamaiti mai sa Nifae e uiga i auala e puipuia ai i latou lava.

Gaoioiga e Mafai Ona Fai

• Valaaulia tamaiti taitasi e faitau le leoa se tasi o fuaiupu nei o loo faamatala mai ai le ala na saunia ai sa Nifae mo le taua e faasaga ia sa Lamana: Alema 43:19; 48:8; 49:1–5; ma le 50:2–4. Fai atu i tamaiti e faasoa mai mea na latou aoaoina (ofoina atu le fesoasoani pe a manaʻomia). Faamalamalama atu o loo tatou i ai i se taua faaleagaga e tetee atu ia Satani, ma e tatau ona tatou puipuia i tatou lava faaleagaga, e pei lava ona puipuia e sa Nifae i latou lava faaletino mai sa Lamana. O a ituaiga o ofutau faaleagaga po o olo e mafai ona tatou fausia e puipuia ai i tatou mai i a tatou taua faaleagaga?

• Fesoasoani i tamaiti e fai se talita mai se fasipepa lapoa po o se pepa malo, ma fai atu ia i latou e tusi i luga mea e puipuia ai i tatou faaleagaga. Tuu atu i tamaiti taitoatasi se fasi pepa, ma valaaulia tamaiti e tusi se mea leaga e ono faaosoosoina ai i tatou e Satani e fai (e pei o le pepelo, gaoi, pe le agalelei). Fai atu ia i latou e numinumi faalapotopoto a latou pepa pei o ni polo ma togi i luga o le talita e faailoa ai pe mafai faapefea e le talalelei ona puipuia i tatou mai ia Satani (tagai foi Efeso 6:16).

Alema 46:11–16; 48:11–13, 16–17

E mafai ona ou faamaoni e pei o le Taitaiau Moronae.

O Moronae o se soo faamaoni ma le malosi o Iesu Keriso, o le na musuia tagata sa Nifae e ola i le talalelei (tagai Alema 48:17). O le a se mea e mafai e tamaiti o lau vasega ona aʻoaʻoina mai lana faʻataʻitaʻiga?

Gaoioiga e Mafai Ona Fai

• Faitau faatasi le Alema 46:11-16. O le a le mea na manao Moronae ia manatua e sa Nifae? (tagai fuaiupu12). Na faapefea ona ia fesoasoani ia latou manatua nei mea? Fai i tamaiti e lisi nisi o mea e finagalo le Tama Faalelagi tatou te manatuaina. Tuu atu i tamaiti e fai a latou lava “tagavai o le saolotoga” ma fuaitau po o ata o le a fesoasoani latou te manatua ai nei mea.

• Fai atu i se tamaitiiti e faitau le Alema 48:17. Ina ia fesoasoani i tamaiti ia malamalama pe aisea ua valaaulia ai i tatou e avea faapei o Moronae, valaaulia i latou e suesue le Alema 48:11–13, 16. Fai atu ia i latou e sue upu ma fasi fuaitau e fesoasoani tatou te malamalama ai pe aisea na avea ai Moronae o se soo maoae o Iesu Keriso. Ao latou faasoa mai mea ua latou maua, uunaia i latou e mafaufau i ni mea patino e mafai ona latou faia ina ia avea atili ai faapei o Moronae.

Alema 47:4–19

E faaosoosoina ma faaseseina i tatou e Satani i sina mea itiiti.

E manaomia e tamaiti ona iloa o le a taumafai Satani e faaosooso i tatou e faia ni agasala laiti ina ia mafai ai ona taitai atu i tatou i agasala sili atu.

Gaoioiga e Mafai Ona Fai

• Faitau faatasi fuaiupu filifilia mai le Alema 47:4--19, ma faamatala atu i tamaiti pe na faapefea ona maua e Amalekia le puleaina o le autau a Leoneti, e ui lava o tagata o le autau sa “tumau i o latou mafaufau” o le a le faamalosia i latou e tau ma sa Nifae. O le a se mea se manu e tupu pe ana fai atu Amalekia ia Leoneti i le mea na ia fuafua e fai mai le amataga? O le a se mea ua aoao mai e nei fuaiupu ia i tatou e uiga i le taumafai o Satani e faasese i tatou?

• Faaali atu se ata o se fale e tausia lelei ma se fale ua le amanaiaina, pe faaali atu se ata o se togalaau maloloina ma se togalaau ua tumu i vao. Tuu atu i tamaiti e talanoa e uiga i mea latou te vaaia i ata ma auala e ono tutupu ai nei suiga i le aluga o taimi. O le a se mea mata na mafai ona faia e le e ona le fale poʻo le togalaau e taofia ai lenei mea? Faamalamalama atu e mafai ona faasolosolo malie ona agasala tagata, pe afai latou te le teena faaosoosoga a Satani e faia ni agasala laiti (e pei o le le faamaoni po o le matamata i ponokalafi) ona faateleina ai lea o agasala. O a nisi o mea leaga e tatau ona tatou teena le faia i o tatou olaga?

Fautuaina le Aoaoina i le Aiga

Fai atu i tamaiti taitoatasi e taʻu mai se mea se tasi na ia faʻalogo pe lagona i le aso ma e manaʻo e faʻasoa ma se tagata o le aiga. Uunaia i latou e mulimuli i a latou fuafuaga.

Faaleleia o Lo Tatou Aoao Atu

Fesoasoani i tamaiti ia atia’e le loto toa [confidence]. O nisi tamaiti atonu latou te le lagona le mafai ona latou aoaoina le talalelei na o latou lava. O se tasi o auala e fausia ai lo latou talitonuga o le viia o i latou pe a latou auai i le vasega.