“Nobiembre 9–15. Ether 1–5: ‘Ray-abenyo Dayta Belo ti Kaawan Pammati,’” Umaykayo Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Nobiembre 9–15. Ether 1–5,” Umaykayo, Sumurot Kaniak—Para kadagiti Indibidual ken Pamilia: 2020
Dagiti Jaredite a Pumampanaw iti Babel, ni Albin Veselka
Nobiembre 9–15
Ether 1–5
“Ray-abenyo Dayta Belo ti Kaawan ti Pammati”
Ti libro ti Ether ti kasuratan dagiti Jaredite, a simmangpet iti naikari a daga adun a siglo kasakbayan dagiti Nephite. Pinaregta ti Dios ni Moroni a mangiraman iti kasuratan ni Ether iti Libro ni Mormon gapu ta adda pakainaigan daytoy iti panawentayo. Kasano a mariknam nga adda pakainaigan daytoy iti biagmo?
Isuratmo dagiti Impresionmo
Idinto a pudno a dagiti wagas ti Dios ket nangatngato ngem dagiti wagastayo, nasken a tungpalentayo a kanayon ti pagayatanna, allukoyennatayo pay nga agpanunot ken agtignay para iti bagbagitayo. Dayta ti maysa a leksion a nasursuro ni Jared ken ti kabsatna. Kas pagarigan, ti kapanunotan iti panagdaliasat iti baro a daga a “naisalsalumina iti amin a daga” kasla nangrugin iti panunot ni Jared, ket ti Apo “naasian kenkuana” ket inkarina a mangpatgan iti kiddawna, a kunkunana, “Ket kasta ti aramidek kenka gapu iti daytoy naunday a panawen a yaararawmo kaniak” (kitaen iti Ether 1:38–43). Ket idi naamiris ti kabsat ni Jared no kasano ti kinasipnget ti uneg dagiti bilog a mangipan kadakuada iti naikari a daga, inawis ti Apo isuna a mangisingasing iti pangrisut, nga agdamdamag iti saludsod a masansan a datayo ti agdamag Kenkuana: “Ania ti kayatmo nga aramidek?”(Ether 2:23). Kasla iparangarang ti mensahe a nasken a ditayo namnamaen a bilinennatayo ti Dios iti amin a banag. Maibinglaytayo Kenkuana dagiti bukodtayo a kapanunotan ken pampanunoten, ket dumngegto Isuna kadatayo ken itedna ti pammasingkedna wenno ketdi bagbagaannatayo. No maminsan ti maysa laeng a banag a mangisina kadatayo kadagiti bendision a birbirokentayo ket ti bukodtayo a “belo ti kinaawan ti pammati,” ket no mabalintayo a “ray-aben dayta a belo” (Ether 4:15), mabalin a maklaattayo iti no ania ti pagayatan ti Apo nga aramiden para kadatayo.
Dagiti Kapanunotan para iti Bukod a Panagadal iti Nasantuan a Kasuratan
Bayat ti panangyararawko iti Apo, maaddaanto iti asi kaniak.
Isalaysay ti Ether 1:33–43 ti tallo a kararag ti kabsat ni Jared. Ania ti masursurom manipud iti sungbat ti Apo iti tunggal maysa kadagitoy a kararag? Mangpanunotka iti maysa a panawen idi napadasam ti kaasi ti Apo idi immararawka Kenkuana iti kararag. Mabalinmo nga isurat daytoy a padas ket ibinglay daytoy iti maysa a tao a mabalin nga agkasapulan a dumngeg iti pammaneknekmo.
Makaawatak iti paltiing para iti biagko.
Kinuna ni Presidente Russell M. Nelson: “Ipakaasik kadakayo a padur-asenyo koma ti naespirituan a kabaelanyo nga umawat iti paltiing. … Pilienyo nga aramiden ti naespirituan a trabaho a kasapulan tapno masagrap ti sagut ti Espiritu Santo ken mangngegan ti timek ti Espiritu nga ad-adda a masansan ken nalawlawag” (“Revelation for the Church, Revelation for Our Lives,” Ensign wenno Liahona, Mayo 2018, 96).
Bayat ti panagadalmo iti Ether 2; 3:1–6; ken 4:7–15; ania dagiti kinapudno a masarakam a mangtulong kenka tapno maawatam no kasano ti agkalikagum a maaddaan iti bukod a paltiing? Mabalinmo a markaan iti maysa a maris dagiti saludsod wenno pakaseknan nga adda iti kabsat ni Jared ken no ania ti inaramidna maipapan kadagitoy, ken iti sabali a maris mabalinmo a markaan no kasano a tinulongan isuna ti Apo ken ti panangipakaammona iti pagayatanna. Ania ti makaawis iti riknam maipapan iti wagas ti kabsat ni Jared a nakisarita iti Apo, ket ania ti masursurom manipud iti daytoy maipapan iti no kasano a padur-asen ti kabaelan nga umawat iti paltiing iti biagmo?
Isagananakto ti Apo a mangballasiw iti daytoy “dakkel a taawko.”
Tapno makapan iti naikari a daga, naipasango dagiti Jaredite iti kadakkelan a tubeng: panangballasiw iti “dakkel a taaw” (Ether 2:25). Ti ragup ti balikas a “dakkel a taaw” ket mabalin nga umisu a pangiladawan no ania dagiti pannubok ken karit a marikriknatayo no dadduma. Ket no dadduma, a kas iti kasasaad dagiti Jaredite, ti panangballasiw it bukodtayo a “dakkel a taaw” ti kakaisuna laeng a wagas a pakaitungpalan iti pagayatan ti Dios para kadatayo. Adda kadi makitam a pangipadaan iti biagmo iti Ether 2:16–25? Kasano nga insagananaka ti Apo para kadagiti karitmo? Ania ti mabalin nga idawdawatna kenka nga aramiden ita nga agsagana para iti no ania ti kasapulan nga ipaaramidna kenka iti masakbayan?
Naparsuaak iti ladawan ti Dios.
Iti Bantay ti Shelem, adu ti nasursuro ti kabsat ni Jared maipapan iti Dios ken maipapan iti bagina. Ania ti masursurom manipud iti Ether 3 maipapan iti naespirituan ken pisikal a kinatao ti Dios? Kasano a matulongannaka dagitoy a kinapudno a makaawat iti nadiosan a pakabigbigam ken potensialmo?
Annaknatayo amin ti Dios.
Daydi kadi kabsat ni Jared ti immuna a tao a nakakita iti Apo?
Impakita ti Dios ti Bagina kadagiti dadduma a propeta sakbay ti kabsat ni Jared (kas pagarigan, kitaen iti Moises 7:4, 59), iti kasta apay insao idi ti Apo kenkuana, “Saanak pay a nagpakita iti tao”? (Ether 3:15). Inted ni Elder Jeffrey R. Holland daytoy mabalin a panangilawlawag: “Kasasao ni Cristo ti kabsat ni Jared, ‘Saanak pay a nagpakita iti tao iti kastoy a wagas, iti kaawan ti kabalinak nga agkeddeng, ket natignay laeng babaen iti pammati ti mangkita’” (Christ and the New Covenant [1997], 23).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Ether 1:34–37
Ania ti masursurotayo manipud kadagitoy a bersikulo maipapan iti panangikarkararag kadagiti dadduma? Ania dagiti dadduma pay a kinapudno maipapan iti kararag ti iladawan dagitoy a bersikulo?
Ether 2:16–3:6
Ania ti isuro kadatayo ti pagwadan ni Jared maipapan iti no kasano ti agsapul iti sungbat kadagiti problema ken saludsodtayo? Mabalin nga ibinglay dagiti miembro ti pamilia dagiti padasda idi sinapul ken inawatda dagiti sungbat manipud iti Apo.
Ether 4:11–12
Kalpasan ti panangbasam kadagitoy a bersikulo, mabalin nga isurat dagiti miembro ti pamilia ti sumagmamano a bambanag iti inaldaw a mangimpluensia iti pamiliayo (kas kadagiti sine, kanta, ay-ayam, wenno tattao) iti babassit a pedaso ti papel ket ikabil dagitoy iti maysa a mallukong. Kalpasanna mabalinda ti agsusublat a pumidut iti maysa ket ilawlawag no daytoy ket “mangallukoy [kadakuada] nga agaramid iti nasayaat” (Ether 4:12). Ania dagiti panagbalbaliw a marikna a nakaparegtaan ti pamiliam nga aramiden?
Ether 5
Mabalinmo ti mangilemmeng iti maysa a banag wenno treat iti maysa a kahon ket awisem ti maysa a miembro ti pamilia a mangkita iti uneg ket mangted kadagiti nabati pay iti pamilia kadagiti pamugtuan (clues) a mangtulong kadakuada no ania daytoy. Bayat ti panangbasayo iti Ether 5 nga aggigiddan, paglilinnawagan no apay a kasapulan nga agaramat ti Apo kadagiti saksi iti aramidna. Kasano a maiburaytayo ti pammaneknektayo iti Libro ni Mormon kadagiti dadduma?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—para iti Primary.
Panangpadur-as iti Panangisurotayo
Agbalin a kanayon a nakasagana. “Alisto nga aglabas dagiti saan a pormal a kanito iti panangisuro, isu a napateg a gundawayan dagitoy no dumtengda. … Kas pagarigan, ti maysa a tin-edyer nga addaan iti narigat a pangngeddeng nga aramiden ket mabalin a nakasagana nga agsursuro maipapan iti no kasano ti umawat iti personal a paltiing” (Panangisuro iti Wagas ti Mangisalakan, 16).
Adda Kadin Nakitam a Nalablabes Ngem iti Daytoy? ni Marcus Alan Vincent