Ti Panagtalaw dagiti Jaredite iti Babel, ni Albin Veselka

Nobiembre 9–15

Ether 1–5

“Ray-abenyo dayta Belo ti Kaawan ti Pammati”

Bayat ti panagrebyum iti no ania ti nasursurom kabayatan ti panagadalmo iti Ether 1–5, ania dagiti kinapudno a pakaawisan ti riknam a makatulong kadagiti ubbing a mangtakuat? Nalabit adda dagiti kapanunotan iti daytoy a balabala a makatulong.

Isuratmo Dagiti Impresionmo

Yawis ti Panagbibinninglay

Ipakitam ti ladawan ti kabsat a lalaki ni Jared (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Awisem dagiti ubbing a mangibinglay no ania ti ammoda maipapan kenkuana.

Isuro ti Doktrina: In-inaudi nga Ubbing

Ether 1:33–43; 2:16–25; 3:1–6

Denggen ken sungbatan ti Nailangitan nga Ama dagiti kararagko.

Iladawan ti estoria iti kabsat a lalaki ni Jared dagiti sumagmamano a wagas a pangtulongan kadatayo ti Dios no agkararagtayo.

Dagiti Mabalin nga Aktibidad

• Awisem dagiti sumagmamano a miembro ti ward a makammo iti sabali a pagsasao tapno agsarita iti sumagmamano a binatog iti dayta a pagsasao para iti klasem (wenno agpatokar iti maysa a rekording ti sabali pay a pagsasao). Pagpammarangem dagiti ubbing nga agsaritada iti sabali a pagsasao, ket ilawlawag no kasano ti kinarigat a maawatan ti tunggal maysa no saantayo nga agsasao iti maymaysa a pagsasao. Usarem daytoy a mangipakaammo iti pakaammuan maipapan iti Torre ti Babel iti Genesis 11:1–9 ken Ether 1:33. Basaen ti Ether 3:13 ken 15, ken ilawlawag no kasano a nagkararag ti kabsat a lalaki ni Jared nga isu ken dagiti gagayyem ken pamiliana ket kabaelandanto a maawatan ti tunggal maysa (kitaen iti Ether 1:34–37). Basaen ken tulongam dagiti ubbing a makaawat iti sungbat ti Apo iti kararagna iti Ether 1:35. Mabalinmo met nga usaren ti “Kapitulo 50: Pumanaw dagiti Jaredite iti Babel” (Dagiti Estoria iti Libro ni Mormon, 143–44, wenno ti maitutop a video iti ChurchofJesusChrist.org).

• Awisem dagiti ubbing nga agpammarang nga agaramid iti bilog, kas iti nailadawan iti Ether 2:16–17. Ilawlawag dagiti problema dagiti Jaredite kadagiti bilogda (kitaen iti Ether 2:19), ken saludsodem kadagiti ubbing no ania ti aramidenda maipapan kadagitoy a problema. Basaen ti Ether 2:18–19 nga isuro kadagiti ubbing no kasano nga inyasideg ti kabsat a lalaki ni Jared dagiti problemana iti Apo babaen iti kararag. Paneknekam a makapagkararagtayo a kanayon no addaantayo kadagiti saludsod wenno problema.

• Gupgopem biit ti Ether 2:19–3:6 tapno ilawlawag no kasano a simmungbat iti Apo kadagiti saludsod ti kabsat a lalaki ni Jared maipapan kadagiti bilog. Ikabil ti 16 a bato iti intero iti siled ti klase, ken awisem dagiti ubbing a bilangenda ti masarakanda. Ipakita ti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia, ken paisaritam manen ti estoria kadagiti ubbing (kitaen met iti panid ti aktibidad itoy a lawas).

Ether 3:13, 15

Naparsuaak iti ladawan ti Dios.

Idi makita ti kabsat a lalaki ni Jared ti Dios, naammuanna a “naparsua amin a tao manipud pay idi punganay a kalanglangak” (Ether 3:15).

Dagiti Mabalin nga Aktibidad

• Ipakitam ti ladawan iti Mangisalakan, ket awisem dagiti ubbing a mangitudo kadagiti nadumaduma a paset ti bagina. Ilawlawag nga idi nakita ti kabsat a lalaki ni Jared ni Jesuscristo, naammuanna nga agkakalangatayo amin a kas ken ni Jesus. Bayat ti panangitudom iti maysa a paset ti bagi iti ladawan, awisem ida a mangitudo met iti kapada a paset dagiti bukodda a bagi. Paneknekam a naparsuatayo a kalanglanga ti Nailangitan nga Amatayo ken ni Jesucristo.

• Aggigiddan nga agkansion iti maysa a kanta a mainaig iti bagbagitayo, kas iti “Head, Shoulders, Knees, and Toes” (Children’s Songbook, 275). Tulongam dagiti ubbing a mangisarita no apay nga agyamyamanda para kadagiti nadumaduma a paset dagiti bagida.

Naparsuatayo iti ladawan ti Dios.

Isuro ti Doktrina: In-inauna nga Ubbing

Ether 1:33–43; 2; 3:1–17

Makaawatak iti paltiing a makatulong kaniak.

Kasano a matulongam dagiti ubbing nga agsursuro maipapan iti paltiing manipud iti pagwadan ti kabsat a lalaki ni Jared? Ania dagiti padas a mabalinmo nga ibinglay kadagiti ubbing idi tinulongannaka ti Apo a mangsarak kadagiti solusion dagiti problemam wenno saludsodmo?

Dagiti Mabalin nga Aktibidad

• Sakbay ti klase, isuratmo ti ragup dagiti balikas a “Tumakderka, agpuligoska, ken agtugawka” iti nadumaduma a pagsasao iti maysa a bassit a papel (mabalin nga usarem ti online translator wenno ti tulong ti maysa a tao nga ammona ti sabali a pagsasao). Ikkam ti maysa a bassit a papel ti tunggal ubbing, ket awisem ida a mangpadas a mangsurot kadagiti pangiturong. Usarem daytoy tapno makatulong a mangilawlawag no ania ti nangguyugoy kadagiti kararag ti kabsat a lalaki ni Jared iti Ether 1:33–37. Aggigiddan a mangbasa kadagitoy a bersikulo, ket kiddawem kadagiti ubbing a mangikaso no kasano ti narikna ti Apo ken ni Jared ken dagiti gagayem ken pamiliana. Ania ti masursurotayo manipud iti daytoy a pakaammuan maipapan iti kararag?

• Dutokam ti tunggal ubing a mangbasa iti maysa kadagiti sumaganad a binatog, ken tulongam ida a mangsapul iti maysa a saludsod wenno problema ti kabsat a lalaki ni Jared: Ether 1:33–35; Ether 1:36–37; and Ether 2:18–20. Ania ti inaramid ti kabsat a lalaki ni Jared maipapan kadagitoy a problema wenno saludsod? Kasano a timmulong ti Apo kenkuana iti tunggal kasasaad? Awisem dagiti ubbing nga agpanunot maipapan kadagiti problema a kasapulanda ti agpatulong. Kasano a masurotda ti pagwadan ti kabsat a lalaki ni Jared a mangsapul kadagiti sungbat ti problemada? Ibinglaymo ti maysa a padas idi nagkararagka para iti tulong ket tinulongannaka ti Apo.

Ether 3:4–17

Naparsuaak iti ladawan ti Dios.

Maipasangonto dagiti ubbing a sursuruam iti adu a palso a mensahe maipapan iti Dios, iti bagida mismo, ken iti pisikal a bagida. Maysa a gundaway dagitoy bersikulo a pangisuro kadagiti agnanayon a kinapudno maipapan kadagitoy a topiko.

Dagiti Mabalin nga Aktibidad

• Basaen kadagiti ubbing ti Alma 3:6–16, ket tulongam ida a mangilistan kadagiti banag a nasursuro ti kabsat a lalaki ni Jared maipapan iti Apo manipud iti daytoy a padas. Apay a napateg a maammuantayo dagitoy a banag? Kas pagarigan, kasano a naapektuan ti wagas a panangkitatayo iti bagbagitayo a mangaammo a naparsuatayo iti ladawan ti Apo?

• Isurat ti pisikal a bagi ken naespirituan a bagi iti pisarra. Awisem dagiti ubbing a mangibinglay kadagiti kababalin iti pisikal a bagi (addaantayo iti kudil, dara, ken dadduma pay), ken isurat dagiti sungbatda iti pisarra. Aggigiddan a mangbasa iti Ether 3:4–17 ket kiddawen kadagiti ubbing a mangsapul iti no ania ti masursuroda maipapan kadagiti naespirituan a bagida. Paneknekam a “naparsua a kalanglanga ni [Jesus]” dagiti bagi ken espiritutayo (Ether 3:15).

Ether 5:2–4

Tallo a saksi ti mangpaneknek iti Libro ni Mormon.

Impadto ni Moroni a makatulong dagiti Tallo a Saksi a mangipasdek iti kinapudno ti Libro ni Mormon. Mabalinmo nga usaren daytoy a padto tapno mapabilegmo dagiti pamaneknek dagiti ubbing ken maparegtam ida nga agbalinda a saksi iti Libro ni Mormon iti bukodda a wagas.

Dagiti Mabalin nga Aktibidad

• Isurat iti pisarra dagiti sumagmamano a napateg a balikas manipud iti Ether 5:2–4, kas kadagiti pinanid, bileg, pudno, saksi, ken pammaneknek. Basaen dagitoy a bersikulo a kadua dagiti ubbing, ken awisen ida nga agsardeng no madanonyo ti maysa kadagiti balikas iti pisarra ken ilawlawag no apay a napateg dagitoy a balikas. Isurom kadagiti ubbing ti maipapan kadagiti Tallo a Saksi, mabalinmo nga ibasar iti “Chapter 7: Witnesses See the Gold Plates” (Doctrine and Covenants Stories, 31–33) and “Ti Pammaneknek dagiti Tallo a Saksi” iti Libro ni Mormon. Apay a kayat ti Dios a makita dagiti tallo a tao dagiti balitok a pinanid?

• Ibagam kadagiti ubbing no kasano a naammuam a pudno ti Libro ni Mormon. Awisem dagiti ubbing a mangibinglay no apay nga ammoda a pudno daytoy. Tulongam ida nga agpanunot kadagiti wagas a pakapagbalinanda a saksi ti Libro ni Mormon, ken allukoyem ida a mangibinglay iti pammaneknekda iti maysa a tao itoy a lawas.

Yallukoy ti Panagsursuro iti Pagtaengan

Awisem dagiti ubbing nga agpanunot iti maysa a banag a mabalinda nga agpatulong iti Nailangitan nga Ama, a kas iti inaramid ti kabsat a lalaki ni Jared. Allukoyem ida a dumawat iti tulongna babaen iti kararag.

Panangpadur-as iti Panangisurotayo

Mangisuro kabayatan dagiti aktibidad. Bayat ti panagaramid kadagiti aktibidad a kas iti panagdrowing wenno panangyobra iti panid ti aktibidad, mabalin met nga usarem ti oras a mangyuna-unay kadagiti kinapudno a maisursuro babaen kadagita nga aktibidad.