Ni Moroni nga Agsursurat kadagiti Balitok a Pinanid, ni Dale Kilborn

Nobiembre 2–8

Mormon 7–9

“Agsaritaak Kadakayo a Kasla Addakayo”

Bayat ti panangbasam ti Mormon 7–9, ibilang no ania ti kangrunaan a tarigagayam a maammuan dagiti ubbing a sursuruam. Mangaramid kadagiti plano a mangisuro kadagiti kinapudno a mariknam a mangbendisionto iti biagda.

Isuratmo Dagiti Impresionmo

Yawis ti Panagbibinninglay

Ipasam ti maysa a kopia ti Libro ni Mormon. Awisem dagiti ubbing, a no batangdan nga iggaman ti libro, ibinglayda ti maysa a banag a nasursuroda iti daytoy. No kasapulanda ti tulong, ipalagipmo kadakuada dagiti banag a nasursuroda itay nabiit iti klase.

Isuro ti Doktrina: In-inaudi nga Ubbing

Mormon 7:8–10

Agpada a paneknekan ti Libro ni Mormon ken iti Biblia ti maipapan ken ni Jesucristo.

Insuro ni Mormon a naisurat ti Libro ni Mormon a mangtulong kadatayo a mamati iti Biblia ken mamatinto iti Libro ni Mormon dagiti mamati iti Biblia.

Dagiti Mabalin nga Aktibidad

• Ipakita kadagiti ubbing ti panid ti paulo ti Libro ni Mormon, ken itudom dagiti balikas iti panid ti paulo bayat ti panangbasam iti daytoy, a mangyunay-unay iti balikas a sabali. Tulongam dagiti ubbing nga agpanunot kadagiti sabali pay a libro iti nasantuan a kasuratan a mangisuro kadatayo maipapan ken ni Jesus. Ipakitam kadakuada a ti Biblia ket addaan iti Daan a Tulag ken iti Baro a Tulag. Tulongam dagiti ubbing a mangisao iti “Daan a Tulag, Baro a Tulag” no itudom ti Biblia ken “Sabali pay a Tulag” no itudom ti Libro ni Mormon.

• I-display ti maysa a mapa iti lubong wenno ti panid ti aktibidad iti daytoy a balabala, pakairaman ti Biblia ken Libro ni Mormon. Usarem dagitoy a banag a mangisuro kadagiti ubbing a ti Biblia ket maysa a kasuratan dagiti pannursuro ni Jesus iti Jerusalem ken iti aglawlawna ket ti Libro ni Mormon ket maysa a kasuratan dagiti pannursurona kadagiti America.

• Agpili kadagiti sumagmamano a pasamak ken kinapudno a paneknekan ti Biblia ken ti Libro ni Mormon, kas iti pannakayanak, ipapatay, ken Panagungar ni Jesus. Ipakitam dagiti ladawan manipud iti Libro ti Arte ti Ebanghelio a mangiladawan kadagitoy a pasamak ken kinapudno. Kiddawem kadagiti ubbing a mangiladawan no ania ti nakitada kadagiti ladawan, ken ibagam kadakuada nga agpada ti Biblia ken ti Libro ni Mormon a mangisursuro maipapan kadagitoy a banag.

Mormon 8:3

Makapagpiliak iti rumbeng uray pay no mariknak nga agmaymaysaak.

Ni Moroni ti naudi a nalinteg a Nephite, ngem nagtalinaed isuna a napudno iti pammaneknekna. Tulongam dagiti ubbing a makasursuro manipud iti pagwadanna.

Dagiti Mabalin nga Aktibidad

• Basaem ti Mormon 8:3, a mangyunay-unay nga agmaymaysa ni Moroni, ngem tinungpalna latta dagiti bilin, pakairamanan ti bilin a mangileppas iti Libro ni Mormon. Ibinglaymo ti maysa a panawen idi nagtalinaedka a napudno uray pay no nariknam nga agmaymaysaka.

• Kalpasan ti panangilawlawagmo iti pagwadan ni Moroni, ibinglay dagiti sumagmamano a senario a nasken a mangikeddeng no agpili wenno saan ti maysa nga ubing iti rumbeng, uray pay no awan ti kumitkita. Ania koma ti inaramid ni Moroni?

• Makipagkansion kadagiti ubbing iti maysa a kanta maipapan iti panagpili iti umno, kas iti “Stand for the Right” (Children’s Songbook, 159). Apay a napateg a pilien ti umno iti amin a kanito, uray pay nga agmaymaysaka?

Mormon 9:7–21

Ti Dios isu ti “Dios dagiti milagro.”

Tulongam dagiti ubbing a makaawat a napateg dagiti milagro iti aramid ti Dios ken agaramidto ti Dios kadagiti milagro no adda pammati dagiti taona.

Dagiti Mabalin nga Aktibidad

• Ilawlawagmo a ti milagro ket maysa a banag nga aramiden ti Dios a pangipakita iti bilegna ken bendisionanna ti biagtayo (kitaen iti pangiwanwan iti Nasantuan a Kasuratan, “Milagro”). Basaem dagiti balikas ken ragup dagiti balikas manipud iti Mormon 9:11–13, 17 a mangiladawan kadagiti sumagmamano a milagro ti Dios. Tulongam dagiti ubbing nga agpanunot kadagiti sabali pay a milagro a masarakan kadagiti nasantuan a kasuratan (makatulong dagiti ladawan manipud iti Libro ti Arte ti Ebanghelio, kas iti num. 26, 40, 41, ken 83). Paneknekam a nagaramid ti Dios kadagiti milagro idi un-unana a panawen ken agaramid pay laeng Isuna kadagiti milagro iti agdama.

• Ibinglaymo ti maysa a padas idi nakakitaka kadagiti milagro iti Simbaan iti agdama wenno iti bukodmo a biag. Ibinglaymo ti pammaneknekmo a ti Dios isu ti “Dios dagiti milagro” (Mormon 9:11).

Isuro ti Doktrina: In-inauna nga Ubbing

Mormon 7:8–10

Agpada a paneknekan ti Libro ni Mormon ken iti Biblia ti maipapan ken ni Jesucristo.

Insuro ni Mormon a ti “ebanghelio ni Cristo … maisaadto iti sango[tayo]” iti agpada a Biblia ken Libro ni Mormon. Ibilangmo no kasano nga isuromto dagiti ubbing nga agpada a napateg kadatayo dagiti sagrado a libro.

Dagiti Mabalin nga Aktibidad

• Isurat ti Mormon 7:9 iti pisarra, ngem ibatim a blangko a lugar dagiti balikas a daytoy ken dagita. Isuratmo met iti pisarra ti daytoy = ti Libro ni Mormon ken dayta = ti Biblia. Awisem dagiti ubbing a mangbasa iti Mormon 7:9 iti napigsa ken usarem dagiti ragup dagiti balikas iti pisarra a pangpunno kadagiti blangko. Ania ti masursurotayo maipapan iti Biblia ken iti Libro ni Mormon manipud iti daytoy a bersikulo?

• I-display ti maysa a Libro ni Mormon ken maysa a Biblia. Ibinglaymo ti sumagmamano nga estoria manipud iti tunggal libro, nga ipakpakitam dagiti ladawan no adda a magun-od (kitaen iti Libro ti Arte ti Ebanghelio). Awisem dagiti ubbing a mangitudo iti libro a naggapuan ti estoria. Apay a kasapulantayo dagiti agpada a libro?

• Isurat ti tunggal balikas ti maikawalo a pagannurotan ti pammati iti nagsisina a papel. Ikkam ti maysa wenno dua a balikas ti tunggal ubing, ken awisem dagiti ubbing nga aggigiddan a mangikabil kadagiti balikas iti husto nga urnos. Kalpasanna kiddawem kadakuada a mangulit iti pagannurotan ti pammati iti sumagmamano a daras. Ania ti isuro daytoy kadatayo?

  

  Paneknekan ti Libro ni Mormon ti maipapan ken ni Jesucristo.

Mormon 8:1–7

Makapagpiliak iti rumbeng uray pay no mariknak nga agmaymaysaak.

Ti determinasion ni Moroni a “mangipatungpal iti bilin ti ama[na],” uray pay natayen ti amana, ket mabalin a makaparegta kadagiti ubbing nga agtungpal kadagti bilin ti Dios.

Dagiti Mabalin nga Aktibidad

• Basaem ti Mormon 8:1–7 kadagiti ubbing, ken awisem ida a mangibinglay no ania koma ti mariknada no isuda ni Moroni. Kiddawem kadagiti ubbing a kumtada manen kadagiti bersikulo 1, 3, ken 4 a mangsapul no ania ti naibilin nga aramiden ni Moroni. Kasano ti “pannakaipatungpal [ni Moroni] iti bilin ti ama[na]”? Kasano a makapagbalintayo nga ad-adda pay a kas ken ni Moroni?

• Awisem dagiti ubbing a mangisurat iti maysa a kasasaad a nasken a pagpilianda iti umno wenno biddut no awan ti maysa a kumitkita. Ikabil dagiti kapanunotan iti maysa a pagikkan, ken pagsisinublatem dagiti ubbing a mangpili iti maysa a kasasaad ken mangibinglay no ania koma ti aramidenda tapno agbalin a kas ken ni Moroni.

Mormon 8:24–26; 9:7–26

Ti Dios isu ti “Dios dagiti milagro.”

Adu a tattao iti agdama ti saan a mamati a mapaspasamak pay laeng dagiti milagro. Usarem dagiti pannursuro ni Moroni kadagitoy a bersikulo a mangisuro kadagiti ubbing a no addaantayo iti pammati, makitatayo dagiti milagro nga inaramid ti Dios iti biagtayo.

Dagiti Mabalin nga Aktibidad

• Ipakitam kadagiti ubbing ti maysa a resipe. Ania ti mapasamak no nalipatam nga ikabil ti maysa a kangrunaan a ramen? Awisem dagiti ubbing a magsukisok iti Mormon 8:24 ken 9:20–21 a mangsapul iti kangrunaan a “ramen” a nasken nga adda kadatayo sakbay a makaaramid ti Dios kadagiti milagro. Mangibinglay kadagiti pagarigan dagiti milagro—dakkel wenno bassit—a nakitam iti Simbaan wenno iti biagmo. Awisem dagiti ubbing a mangibinglay kadagiti bukodda a pagarigan.

• Bingayem dagiti ubbing iti dua a grupo. Awisem ti tunggal grupo a mangsapul kadagiti pagarigan dagiti milagro iti sumagmamano wenno amin kadagitoy a nasantuan a kasuratan: Mormon 8:24; 9:11–13, 16–18, 21–25. Ania ti maibagatayo iti maysa a tao a mangipagarup a saanen a mapaspasamak dagiti milagro? (kitaen iti Mormon 9:9, 15–21).

Yallukoy ti Panagsursuro iti Pagtaengan

Awisem dagiti ubbing a mangidawat iti maysa a miembro ti pamilia tapno mangiladawan iti milagro a nangpapigsa iti pammaneknekna.

Panangpadur-as iti Panangisurotayo

Mailasin dagiti ubbing ti impluensia ti Espiritu. Isurom kadagiti ubbing a dagiti mariknada a talna, ayat, ken bara no agsarita wenno agkantada maipapan ken ni Jesucristo ken ti ebangheliona ket aggapu iti Espiritu Santo (kitaen iti Panangisuro iti Wagas ti Mangisalakan, 11.), 11).