Ni Moroni a Mangyab-ababa kadagiti Pinanid, ni Tom Lovell

Oktubre 26–Nobiembre 1

Mormon 1–6

“Kayatko a Magutugotkayo Amin … nga Agbabawi”

Mabalin a narigat para kadagiti ubbing a naan-anay a maawatanda dagiti pasamak a nailadawan iti Mormon 1–6 ngem mabalinda pay laeng a sursuruen dagiti adalenmanipud iti pakaammuan ni Mormon iti nalinteg a panagbiag iti dakes a lubong. Kasano a mausarmo ti padasna tapno maisurom dagiti ubbing no kasano ti agtalinaed a napudno iti ebanghelio?

Isuratmo Dagiti Impresionmo

Yawis ti Panagbibinninglay

Ania ti ammo dagiti ubbing maipapan ken ni Mormon? Awisem ida a mangibinglay no ania ti ammo wenno nasursuroda kadagiti pamiliada. Mabalin a makatulong ti panangipakitaiti ladawan ni Mormon a kas iti maysa nga adda iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia .

Isuro ti Doktrina: In-inaudi nga Ubbing

Mormon 1:1–3

Makapagbalinak a nalinteg a kas ken ni Mormon.

Nupay babassit dagiti ubbing a sursuruam, mabalinda a patanoren dagiti naespirituan a kalidad ken agbiag a sililinteg.

Dagiti Mabalin nga Aktibidad

• Iasam ti Mormon 1:1–3 kadagiti ubbing, wenno usarem ti “Kapitulo 49: Ni Mormon ken dagiti Pannursurona” (Dagiti Estoria iti Libro ni Mormon, 138–42, wenno ti maitutop a video iti ChurchofJesusChrist.org). Awisem ida a dumngeg no mano ti tawen ni Mormon idi nangted kenkuana ni Ammaron iti naisangsangayan a mision. Kalpasanna kiddawem kadakuada a mangitag-ay kadagiti ramay ti imada. Tapno matulongam dagiti ubbing a mangipapan no kasano ti kinaubing ni Mormon, mangipakita iti maysa a ladawan ti maysa a tao nga agtawen iti 10. Tulongam ida a makaawat kadagiti kababalin a nakita ni Ammaron ken ni Mormon idi ubing pay , ket paneknekam a makapagbalinda met a kas ken ni Mormon bayat ti panangsurotda ken ni Jesucristo.

• Agay-ayamkayo iti maysa nga ay-ayam nga ul-uliten dagiti ubbing dagiti pangrugiann a tignay nga aramidem. Kalpasanna ipakitam ti sumagmamano a ladawan dagiti banag nga inaramid ni Jesus, ken isaritam maipapan iti no kasano a makasurottayo Kenkuana (kitaen iti Libro ti Arte ti Ebanghelio, num. 33–35, 41–42). Ilawlawag dagiti wagas a sinurot ni Mormon ni Jesucristo—kas pagarigan, babaen iti panangisuro ti ebanghelio, panangallukoy kadagiti tao nga agtungpal iti Dios, ken panagayat kadagiti dadduma.

Mormon 3:3, 9

Ikkannak ti Nailangitan nga Ama iti adu a bendision.

Makatulong dagiti pannursuro ni Mormon kadagiti ubbing a mangbigbig kadagiti bendision nga inted ti Nailangitan nga Ama kadakuada.

Dagiti Mabalin nga Aktibidad

• Ibasam kadagiti ubbing ti Mormon 3:3 ken 9 ken ilawlawagmo a saan a nabigbig dagiti Nephite a binendisionan ida ti Nailangitan nga Ama. Tulongam dagiti ubbing nga agpanunot kadagiti bendision nga inted ti Nailangitan nga Ama kadakuada. Ipakitam dagiti ladawan wenno banag tapno mangted kadakuada iti kapanunotan. Ania ti mabalintayo nga aramiden ita a mangipakita nga agyamantayo iti Nailangitan nga Ama kadagiti bendisiontayo?

• Tulongam dagiti ubbing nga agpanunot kadagiti bendision nga inted ti Nailangitan nga Ama kadakuada, ket kiddawem kadakuada a mangidrowing kadagiti ladawan ti sumagmamano kadagitoy a bendision. Awisem ida a mangigibitin kadagiti ladawan iti maysa a lugar iti pagtaenganda a pakakitaanda kadagitoy ken pakalagipanda kadagiti bendision nga impaay kadakuada ti Nailangitan nga Ama iti adu a wagas. Mabalinmo met nga awisem ida a mangbigbig kadagiti bendision a naggapu iti Nailangitan nga Ama bayat iti panagkantada ti umuna a berso ti “I Thank Thee, Dear Father” (Children’s Songbook, 7).

Mormon 3:12

Kayat ti Nailangitan nga Ama nga ayatek ti tunggal maysa.

Kasano a matulongam dagiti ubbing a sursuruam a maaddaan iti tarigagay a mangrikna iti ayat dagiti adda iti aglawlawda?

Dagiti Mabalin nga Aktibidad

• Kiddawem iti tunggal ubing a mangidrowing iti maysa a tao iti pisarra, ket ilawlawagmo no kasano a maigiddiat iti dadduma ti tunggal tao nga indrowingda. Mangidrowing iti a maysa a dakkel a sinan-puso a maipalawlawt iti amin nga drowing. Tulongam dagiti ubbing a makaawat a kayat ti Nailangitan nga Ama nga ayatentayo amin a tattao. Basaem ti Mormon 3:12, a mangyunay-unay kadagiti balikas nga “ayat” ken “inayat” Ania ti inaramid ni Mormon a mangipakita iti ayatna kadagiti dadduma?

• Aggigiddan nga agkansion iti maysa a kanta maipapan iti panangayat kadagiti dadduma, kas iti “Jesus Said Love Everyone” (Children’s Songbook, 61), bayat ti panangipakitam kadagiti ladawan dagiti ubbing manipud iti amin a suli a lubong. Paneknekam maipapan iti ayat ti Dios kadagiti amin nga annakna. Leppasem kadagiti ubbing ti panid ti aktibidad itoy a lawas.

Isuro ti Doktrina: In-inauna nga Ubbing

Mormon 1:1–3; 2:1, 23–24; 3:1–3, 12, 17–22

Makapagbalinak a nalinteg a kas ken ni Mormon.

Ubing pay unay ni Mormon idi nabigbig ni Ammaron nga agbalinto isuna a responsable a mangaywan kadagiti sagrado a kasuratan. Ania dagiti nalinteg a kababalin a makitam kadagiti ubbing a sursuruam?

Dagiti Mabalin nga Aktibidad

• Awisem ti tunggal ubing a mangbasa iti maysa kadagiti sumaganad a binatog, ket tulongam ida a mangibinglay no ania ti nasursuroda maipapan ken ni Mormon: Mormon 1:1–3; 2:1, 23–24; ken 3:1–3, 12, 20–22. Kalpasanna ibinglay dagiti nalinteg a kababalin a makitam iti tunggal maysa kadagiti ubbing.

• Ipakitam ti ladawan ni Mormon (kitaen ti ladawan iti balabala iti daytoy a lawas iti Umaykayo, Sumurot Kaniak—Para dagiti Indibidual ken Pamilia). Tulongam dagiti ubbing a mangkita a gapu ta responsable ken mapagtalkanen ni Mormon a mangkita ken mangtaginayon kadagiti kasuratan dagiti Nephite, addaantayon iti Libro ni Mormon iti agdama. Kasaritam dagiti ubbing maipapan iti no ania ti kaipapanan iti agbalin a responsable ken mapagtalkan. Awisem dagiti ubbing a mangutob kadagiti wagas a pakapagbalinanda nga ad-adda a responsable.

  

  Mormon, Agtawen iti 10, ni Scott M. Snow

Mormon 2:8–15; 5:10–11

Mangiturong iti panagbabawi ti nadiosan a panagladingit.

Nakita ni Mormon nga agladladingit dagiti dakes a Nephite, ngem ti panagladingitda ket saan a mangparegta kadakuada nga agbabawi (kitaen iti Mormon 2:13). Kasano a matulongam dagiti ubbing a makaawat iti pagdumaan ti nailubongan a panagladingit ken ti nadiosan a panagladingit a mangiturong iti panagbabawi?

Dagiti Mabalin nga Aktibidad

• Isurat dagiti sumaganad a paulo iti pisarra: Panagladingit a mangiturong iti panagbabawi ken panagladingit a saan a mangiturong iti panagbabawi. Awisem dagiti ubbing nga agsisinublat a mangbasa kadagiti bersikulo manipud iti Moroni 2:8,10–15. Tulongam ida a mangisurat kadagiti banag a nasursuroda maipapan iti panagladingit iti babaen dagiti maitutop a paulo iti pisarra. Kasano a masiguradotayo a ti panagladingit a mariknatayo gapu kadagiti basoltayo ket mangiturong kadatayo iti panagbalbaliw?

• Awisem ti maysa a miembro iti bishopric wenno maysa a nagannak kadagiti ubbing a mangibinglay iti klase no kasano a makatulong kadatayo ti nadiosan a panagladingit nga agbalbaliw tapno nga agbalin nga ad-adda a kas iti Nailangitan nga Ama ken ni Jesucristo. Apay a napateg a bigbigentayo no mariknatayo met laeng ti nadiosan a panagladingit wenno nainlubongan a panagladingit? Awisem dagiti ubbing a mangsukisok iti Mormon 2:12 tapno makakita kadagiti rason no apay a nasken nga aramidentayo dagiti “a naragsak dagiti puso[tayo]” (Mormon 2:12).

Mormon 3:12

Mariknak ti ayat ti Nailangitan nga Ama para kadagiti dadduma.

Masansan a nalaka nga ayaten dagiti agayat kadatayo ken kas kadatayo, ngem impakita ni Mormon a babaen iti tulong ti Nailangitan nga Ama, mabalin nga ayatentayo dagiti sabali ti pammatina ken aramidda a maiduma kadatayo.

Dagiti Mabalin nga Aktibidad

• Tulongam ti maysa nga ubing a mangbasa iti Mormon 3:12, ken awisem dagiti ubbing a mangisurat ti maysa a binatog [sentence] a manggupgop iti no ania ti nasursuroda manipud ken ni Mormon maipapan iti panangayat kadagiti dadduma. Awisem dagiti ubbing a mangibinglay no ania dagiti insuratda. Kasano a mariknatayo ti ayat ti Dios para kadagiti dadduma? (kitaen iti Moroni 7:48). Ania ti mabalin nga aramidentayo a mangipakita iti panagayattayo kadagiti tao iti klasetayo ken iti pamiliatayo?

• Awisem dagiti ubbing a mangileppas iti panid ti aktibidad itoy a lawas. Tulongam ida nga agpanunot kadagiti napateg a wagas a pakatulongan nga addaan iti ayat kadagiti mabalin a naiduma kadatayo.

Yallukoy ti Panagsursuro iti Pagtaengan

Allukoyem dagiti ubbing a mangi-display iti panid ti aktibidad itoy a lawas iti maysa a lugar iti pagtaengan tapno mangipalagipto kadakuada ti panangipakita iti ayat para kadagiti dadduma. Ikkam ida iti gundaway iti masakbayan a panangklase tapno mangibinglay no aniati inaramidda.

Panangpadur-as iti Panangisurotayo

Ibagay dagiti aktibidad iti tawen dagiti ubbing nga sursuruam. Kasapulan dagiti in-inaudi nga ubbing dagiti detaliado a panakailawlawag ken masursuruan manipud kadagiti simple a pamay-an iti panangisuro. Bayat ti panagnakemda, mabalin nga ad-adu ti maibinglayda ken mabalin a nalalaingda iti panangiburay kadagiti kapanunotanda. Ikkam ti amin nga ubbing kadagitigundaway a maitutop iti tawenda tapno agiburay, agpaneknek, ken makiraman, ken siguraduem ti mangipaay iti tulong no kasapulan. (Kitaen iti Panangisuro iti Wagas ti Mangisalakan, 25–26.)