Kapitulo 49

Ni Mormon ken dagiti Pannursurona

Adu a tawen kalpasan ti isasarungkar ni Jesucristo kadagiti Nephite, pimmanaw iti Simbaan ti bassit a grupo dagiti tao ken inawaganda ti bagbagida iti Lamanite.

4 Nephi 1:20

Idi agangay dumani nagbalin a nadangkes ti amin a tattao, agpada a dagiti Nephite ken Lamanite.

4 Nephi 1:45

Adda iti nalinteg a tao, ni Ammaron, dagiti sagrado a kasuratan. Imbaga ti Espiritu Santo kenkuana a mangilemmeng kadagitoy tapno masaluadanda.

4 Nephi 1:48–49

Imbaga ni Ammaron ken ni Mormon, ubing nga agtawen iti 10, no sadino ti nakailemmengan dagiti kasuratan. Ammo ni Ammaron a mapagtalkanna ni Mormon.

Mormon 1:2–3

Idi agtawen iti 24, nasken nga alaen ni Mormon dagiti pinanid ni Nephi ket agsurat kadagitoy maipapan kadagiti taona.

Mormon 1:3–4

Idi agtawen ni Mormon iti 11, nangrugi ti gubat iti nagbaetan dagiti Nephite ken Lamanite. Nangabak dagiti Nephite, ket adda manen kappia.

Mormon 1:6, 8–12

Ngem nadangkes unay dagiti Nephite isu nga innala nga inyadayo ti Apo dagiti tallo a disipulo, a nanggibus kadagiti milagro ken panagagas. Saanen a tinarabay ti Espiritu Santo dagiti tao.

Mormon 1:13–14

Idi agtawen ni Mormon iti 15, simmarungkar ni Jesucristo kenkuana. Ad-adu pay ti nasursuro ni Mormon maipapan iti Mangisalakan ken iti kinaimbagna.

Mormon 1:15

Tinarigagayan ni Mormon ti mangasaba kadagiti tao, ngem imbaga kenkuana ni Jesus a saan a mangasaba gapu ta nadangkes unay dagiti tao. Naitalimudok dagiti puspusoda a maisuppiat iti Dios.

Mormon 1:16–17

Iti saan a nabayag nangrugi ti gubat. Dakkel ken napigsa ni Mormon, ket isu ti pinili dagiti Nephite a mangidaulo iti buyotda.

Mormon 2:1

Kinaranget dagiti Nephite dagiti Lamanite iti uneg ti adu a tawen. Pinadas ni Mormon ti mangallukoy kadagiti taona a makiranget para kadagiti pamilia ken pagtaenganda.

Mormon 2:23

Nagbalin a nadangkes unay dagiti Nephite, ngarud, saan a tulongan ti Dios ida.

Mormon 2:26

Imbaga ni Mormon kadagiti Nephite a maispalda laeng no agbabawi ken agpabuniagda. Ngem nagkedked dagiti tao.

Mormon 3:2–3

Impang-asda maipapan iti pigsada, a kunkunada a papatayenda ti amin a Lamanite. Gapu iti kinadangkes dagiti Nephite, nagkedked ni Mormon a mangidaulo pay kadakuada.

Mormon 3:9–11

Nangrugi nga abaken dagiti Lamanite dagiti Nephite iti tunggal gubat. Inkeddeng ni Mormon ti mangidaulo manen kadagiti buyot a Nephite.

Mormon 4:18; 5:1

Ammona a saan a mangabak iti gubat dagiti nadangkes a Nephite. Saanda a nagbabawi wenno nagkararag para iti tulong a kasapulanda.

Mormon 5:2

Innala ni Mormon ti amin a kasuratan manipud iti turod a nangilemmengan ni Ammaron ken nagsuratanna kadagiti tao a mangbasanto iti kasuratan iti maysa nga aldaw.

Mormon 4:23; 5:9, 12

Tinarigagayanna iti tunggal maysa, agraman dagiti Judio, a mangammo iti maipapan ken ni Jesucristo, tapno agbabawi ken agpabuniag, ken agbiag iti ebanghelio ken mabendisionan.

Mormon 5:14; 7:8, 10

Ti Espiritu ti nangparegta ken ni Mormon a mangikabil kadagiti babassit a pinanid ni Nephi, a naglaon kadagiti padto ti yaay ni Cristo, kadagiti pinanid ni Mormon.

Dagiti Balikas ni Mormon 1:3–7

Indauluan ni Mormon dagiti Nephite iti daga ti Cumorah, a nagsaganaanda a makiranget manen kadagiti Lamanite.

Mormon 6:4

Lumaklakayen ni Mormon. Ammona a daytoyen ti maudi a pannakigubatna. Saanna a tinarigagayan a masarakan dagiti Lamanite dagiti sagrado a kasuratan ken mangdadael kadagitoy.

Mormon 6:6

Isu nga intedna dagiti pinanid ni Mormon iti anakna a lalaki, ni Moroni, ket indulinna dagiti nabati pay a pinanid iti Turod ti Cumorah.

Mormon 6:6

Dinarup ken pinatay dagiti Lamanite ti amin malaksid dagiti 24 a Nephite. Nasugatan ni Mormon.

Mormon 6:8–11

Nagliday ni Mormon gapu ta natay ti adu a Nephite, ngem ammona a natayda gapu ta saanda nga inawat ni Jesus.

Mormon 6:16–18

Pinadas ni Mormon ti mangisuro kadagiti Nephite iti kinapudno. Imbagana kadakuada no kasano ti kinapateg ti maaddaan iti pammati ken ni Jesucristo.

Moroni 7:1, 33, 38

Pinadasna nga isuro kadakuada ti maaddaan iti namnama babaen iti Pannubbot ni Jesucristo ken maaddaan iti asi [charity], nga isu ti natarnaw nga ayat ni Cristo.

Moroni 7:40–41, 47

Ket nagsurat ni Mormon kadagiti surat iti anakna a lalaki, ni Moroni a nangisuro pay iti ebanghelio kadagiti Nephite.

Moroni 8:1–2

Insurat ni Mormon maipapan iti nakaro a kinadangkes dagiti Nephite. Imbagana ken ni Moroni nga agtalinaed a napudno ken ni Jesucristo.

Moroni 9:1, 20, 25

Pinatay dagit Lamanite ni Mormon ken amin dagiti Nephite malaksid ken ni Moroni, a nangileppas iti panangisurat kadagiti kasuratan.

Mormon 8:2–3