Kapitulo 32

Ni Kapitan Moroni ken ti Wagayway ti Wayawaya

Tinarigagayan ti nadangkes a lalaki nga agnagan iti Amalickiah nga agbalin nga ari kadagiti Nephite. Adu a Nephite ti pimmanaw iti Simbaan tapno sumurotda kenkuana.

Alma 46:1, 4–5, 7

No agbalin nga ari ni Amalickiah, padasenna a dadaelen ti Simbaan ti Dios ket ikkatenna ti wayawaya dagiti tao.

Alma 46:9–10

Idi madamag ni Kapitan Moroni, ti dadaulo dagiti buyot ti Nephite, maipapan iti plano ni Amalickiah nga agbalin nga ari, nakapungtot isuna.

Alma 46:11

Pinigis ni Moroni ti kagayna tapno agaramid iti maysa a wagayway. Ditoy nga insuratna ti maysa a mensahe a mangipalagip kadagiti tao a mangsalaknib iti relihion, wayawaya, ken talnada.

Alma 46:12

Insingdan ni Moroni ti wagayway iti palo ket inawaganna daytoy iti wagayway ti wayawaya. Kalpasanna nakakawes iti kalasagna, nagparintumeng isuna a nagkararag.

Alma 46:13

Indawatna iti Dios a salaknibanna dagiti mamati ken ni Jesucristo ket nagkararag para iti wayawaya iti daga, nga aw-awaganna daytoy iti daga ti wayawaya.

Alma 46:16–18

Napan ni Moroni kadagiti tao. Iti panangipaypayapayna iti wagayway ti wayawaya, inawaganna ida nga umasideg ken tumulong a mangsalaknib iti wayawayada.

Alma 46:19–20

Immay dagiti tao manipud iti amin a daga. Inkarida ti agtungpal kadagiti bilin ti Dios ken makiranget para iti wayawaya.

Alma 46:21–22, 28

Idi nakita ni Amalickiah no mano a Nephite ti nakikadua ken ni Moroni, nagbuteng isuna. Pimmanaw isuna ken dagiti pasurotna tapno makikadua kadagiti Lamanite.

Alma 46:29–30

Pinadas ni Moroni ken ti buyotna a lapdan ida, ngem naglibas ni Amalickiah ket ti sumagmamano kadagiti taona.

Alma 46:31–33

Nangipan ni Moroni iti wagayway ti wayawaya iti tunggal torre iti daga ti Nephite. Napagtalinaed dagiti Nephite ti wayawayada ket adda manen kappia kadakuada.

Alma 46:36–37