Kapitulo 28

Dagiti Zoramite ken ti Rameumptom

Naminsan idi a kameng ti Simbaan ti Dios dagiti Zoramite ngem nagbalinda a nadangkes ket agdaydayawda kadagiti didiosen.

Alma 31:1, 8–9

Kayat dagiti Nephite a lapdan dagiti Zoramite iti pannakikadua kadagiti Lamanite, isu a napan a kakuyog ni Alma ti sumagmamano a dadduma pay a misionario tapno ikasabada ti balikas ti Dios kadagiti Zoramite.

Alma 31:4, 11

Nasdaaw ken naupay dagitoy a misionario iti no kasano ti panagdaydayaw dagiti Zoramite kadagiti simbaanda, a naawagan iti sinagoga.

Alma 31:12

Iti sentro ti simbaan, nangbangon dagiti Zoramite iti nangato a plataporma a maawagan iti Rameumptom. Adda lugar para iti maysa laeng a tao a pagtakderan iti rabawna.

Alma 31:13, 21

Nagsisinnublat dagiti Zoramaite iti panagtakder idiay, a mangdandanon iti langit ket sipipigsa nga isasaoda ti isu met la a kararag.

Alma 31:14, 20

Iti daytoy a kararag, kinuna dagiti Zoramite nga awanan iti bagi ti Dios; espiritu laeng isuna. Kinunada pay nga awan ti Cristo.

Alma 31:15–16

Impagarup dagiti Zoramite a pinili ti Dios laeng ida tapno maisalakan iti pagarian ti langit. Nagyamanda iti panagbalinda a paggugusto a tattaona.

Alma 31:17–18

Kalpasan a saggaysa a nagkararag dagiti Zoramite, nagawidda ket saanda a nagkararag wenno napagsasaritaan manen maipapan iti Dios iti uneg ti makalawas.

Alma 31:12, 23

Impateg dagiti nabaknang a Zoramite dagiti balitok ken pirakda, ket impasindayawda dagiti nailubongan a gamengda. Nagleddaang ni Alma a nakaimatang no kasano ti kinadangkesda.

Alma 31:24–25

Nagkararag ni Alma para kenkuana ken dagiti misionariona tapno maaddaanda iti pigsa, liwliwa, ken balligi iti trabahoda.

Alma 31:26, 32–33

Kalpasan ti panangkiddawna iti tulong a mangisubli kadagiti Zoramite iti kinapudno, napno iti Espiritu Santo ni Alma ken dagiti dadduma pay a misionario.

Alma 31:34–36

Kalpasanna nagsisina iti turongen dagiti misionario tapno mangasaba. Pinaraburan ida ti Apo iti taraon ken lupot ket pinapigsana ida iti trabahoda.

Alma 31:37–38

Saan a napalubosan a sumrek kadagiti simbaan dagiti Zoramite a napanglaw. Nangrugi dagitoy a tao ti panagdengngeg kadagiti misionario.

Alma 32:2–3

Adu ti nagsaludsod ken ni Alma no ania ti nasken nga aramidenda. Imbaga ni Alma kadakuada a saan a kasapulan nga addada iti uneg ti simbaan tapno agkararag wenno agdaydayawda iti Dios.

Alma 32:5, 10–11

Imbagana kadakuada a maaddaanda iti pammati iti Dios. Kalpasanna insuro ni Amulek kadakuada maipapan ken ni Jesucristo ken maipapan iti plano ti Dios para kadagiti annakna.

Alma 32:17–21; 34:8–9

Pimmanaw dagiti misionario, ket napapanaw iti siudad dagiti Zoramite a namati kadakuada. Napan nagindeg dagiti mamatpati iti daga ti Jershon a kadua dagiti tao ni Ammon.

Alma 35:1–2, 6

Nupay binutbuteng dagiti nadangkes a Zoramite dagiti tao ni Ammon, tinulongan dagiti tao ni Ammon dagiti nalinteg a Zoramite ket inikkanda ida iti taraon, lupot, ken daga.

Alma 35:8–9