Kapitulo 15
Mangisuro ken Mamuniag ni Alma
Nakalibas ni Alma manipud kadagiti katulongan ni Ari Noe ket naglemmeng iti uneg ti adu nga aldaw. Bayat ti pananglemmengna, insuratna no ania dagiti insuro ni propeta Abinadi.
Nagbabawi ni Alma kadagiti basolna ket napan a sililimed kadagiti Nephite, a nangisursuro kadakuada iti mensahe ni Abinadi. Imbaga ni Alma kadagiti tao a maaddaanda iti pammati ken ni Jesucristo ken agbabawida.
Kabayatan ti aldaw naglemmeng ni Alma iti rimmuong ti babassit a kayo nga asideg ti pagdigusan a maawagan iti Dandanum ti Mormon.
Napan iti Dandanum ti Mormon dagiti namati kadagiti pannursuro ni Alma ken nabuniaganda. Binuniagan ni Alma dagiti 204 a tao iti Simbaan ni Jesucristo.
Inordenan ni Alma dagiti saserdote a mangisuro kadagiti tao. Imbagana kadagiti saserdote a mangisuroda iti panagbabawi ken pammati ken ni Jesucristo. Imbagana pay a nasken a saanda nga agsisinnupiat ngem agkaykaysada.
Naggiinnayat ken nagserbi iti tunggal maysa dagiti tao ni Alma. Imbinglayda ti amin nga adda kadakuada ken nagyamanda iti pannakasursuroda maipapan ken ni Jesucristo, ti Mannubbotda.
Nakita dagiti katulongan ni Ari Noe ni Alma a mangisursuro kadagiti tao. Kinuna ti ari a tigtignayen ni Alma dagiti Nephite a maibusor kenkuana, isu a nagibaon iti buyotna a mangpapatay kadakuada.
Binallaagan ti Dios ni Alma nga umayen ti buyot ni Ari Noe. Inummong dagiti tao dagiti kaamaanda, ayup, ken dadduma pay a sanikuada ket naglibasda nga agturong iti langalang.
Pinapigsa ti Dios dagiti tao ni Alma tapno makapaglibasda manipud iti buyot ni Ari Noe. Nagsapul ti buyot ngem saanda a pulos nasarakan ida.
Kalpasan ti panagdaliasatda iti langalang iti walo nga aldaw, nakadanon dagiti tao ni Alma iti maysa a napintas a lugar nga adda natarnaw a danum nga agay-ayus ditoy. Nagitukitda kadagiti mula ken nagipatakder kadagiti pasdek.
Tinarigagayan dagiti tao a ni Alma ti agbalin nga arida, ngem kinuna ni Alma a saan a kayat ti Dios a maaddaanda iti maysa nga ari. Tinarigagayan ti Dios nga agbalinda a nawaya.