Kapitulo 24
Maam-ammo ni Ammon ti Ama ni Ari Lamoni
Tinarigagayan ni Ari Lamoni nga ikuyogna ni Ammon tapno yam-ammo iti amana. Binallagan ti Apo ni Ammon a saan a mapan gapu ta gandaten ti ama ni Lamoni ti mangpatay kenkuana.
Imbaga ni Ammon ketdi a mapan iti daga ti Middoni, a nakaibaludan ti kabsatna a ni Aaron. Napan ni Ari Lamoni a kadua ni Ammon.
Bayat ti panagbiaheda nasabatda ti ama ni Ari Lamoni, nga ari ti amin a daga. Dinamagna ken ni Lamoni no sadino ti papananna a kakuyogna ti maysa nga ulbod a Nephite.
Imbaga ni Ari Lamoni iti amana maipapan ken ni Ammon ken ti kabsatna nga adda iti pagbaludan. Nagpungtot, imbilin ti ama ni Lamoni a patayen ni Lamoni ni Ammon ket saan a mapan iti Middoni.
Nagkedked a patayen ni Lamoni ni Ammon ket kinunana a mapanda ken Ammon tapno wayawayaanda ni Aaron. Ad-adda a nagunget ti ama ni Lamoni ket inasutna ti espadana a mangpatay ken ni Lamoni.
Nagpasango ni Ammon a mangsalaknib ken ni Lamoni. Kalpasanna pinadas a patayen ti ama ni Lamoni ni Ammon, ngem sinalaknibanna ti bagina ket dinangranna ti takiag ti ama ni Lamoni.
Idi makita ti ama ni Lamoni a kabaelan ni Ammon ti mangpatay kenkuana, indiayana ken ni Ammon ti kagudua ti pagarianna no ispalenna ti biagna.
Kinuna ni Ammon a tarigagayanna a mawayawayaan ni Aaron ken dagiti kaduana manipud iti pagbaludan ken tarigagayanna a mapagtalinaed ni Lamoni ti pagarianna.
Naamiris ti ama ni Lamoni a saan a tinarigagayan ni Ammon ti mangdangran kenkuana. Nasdaaw iti no kasano ti kadakkel ti pammateg ni Ammon iti anakna a lalaki. Inawisna ni Ammon a mangisuro kenkuana iti ebanghelio.
Napan da Ammon ken Ari Lamoni iti Middoni. Nakisao ni Lamoni iti ari idiay, ket nawayawayaan ni Aaron ken dagiti kaduana iti pagbaludan.
Nagleddaang ni Ammon a makakita no kasano ti kalaus ti pannakaparparigatda. Nakaro ti panagsagabada ngem nagibturda.