Kapitulo 25
Suruan ni Aaron ti Ama ni Ari Lamoni
Imbaga ni Aaron iti ari nga isu ti kabsat ni Ammon. Nalaglagip ti ari maipapan iti kinasayaat ni Ammon ken maipapan iti imbaga ni Ammon kenkuana.
Dinamag ni Aaron iti ari no mamati isuna iti Dios. Kinuna ti ari a saan a sigurado ngem kinunana a mamati isuna no ibaga ni Aaron nga adda Dios. Impanamnama ni Aaron iti ari a sibibiag ti Dios.
Imbasa ni Aaron dagiti nasantuan a kasuratan iti ari. Insurona kenkuana maipapan iti Pannakaparsua ti daga, ti Pannakatnag ni Adan, ken ti mision ni Jesucristo.
Dinamag ti ari no ania ti nasken nga aramidenna tapno maaddaan iti Espiritu Santo ken agsagana nga agbiag kadenna ti Dios. Siaayat ti ari a mangaramid iti ania man a banag, uray pay mangisuko iti pagarianna.
Imbaga ni Aaron iti ari a kasapulanna ti naan-anay a panagbabawi kadagiti basolna. Kasapulanna ti agkararag ken maaddaan iti pammati iti Dios.
Nagkararag ti ari tapno ammuen no adda talaga maysa a Dios. Kinunana a lipatenna ti amin a basbasolna.
Nadaleb ti ari iti daga ket kasla natayen. Idi makita ti reyna isuna, impagarupna a da Aaron ken dagiti kaduana ti nangpatay kenkuana.
Binilin ti reyna dagiti katulongan a patayenda ni Aaron ken dagiti kaduana, ngem mabuteng dagiti katulongan. Imbaonna ida a mangsapul iti sabali a tattao a mangaramid iti daytoy.
Sakbay a makapagtitipon ti dakkel nga ummong ket magriribuk, innala ni Aaron ti ima ti ari ket imbagana a tumakder. Timmakder ti ari
Pinakalma ti ari ti mabutbuteng nga asawana ken dagiti katulonganna ket kalpasanna insurona kadakuada ti ebanghelio. Namatida amin ken ni Jesucristo.