Kapitulo 30
Balakadan ni Alma dagiti Annakna a Lallaki
Nagliday ni Alma gapu iti nakaro a kinadangkes a nagbalinan dagiti Nephite. Kinasaritana ti tunggal maysa kadagiti annakna a lallaki maipapan iti panagbiag a nalinteg.
Imbaga ni Alma ken ni Helaman, ti inauna nga anakna a lalaki, nga agtalek iti Dios. Imbagana kenkuana maipapan iti anghel nga imbaon ti Dios a mangibaga ken ni Alma a mangisardeng iti panangdadael iti Simbaan.
Iti uneg ti tallo nga aldaw nagsagaba ni Alma gapu iti basolna. Kalpasanna nalagipna dagiti pannursuro ti amana maipapan ken ni Jesus, ken ammona a mabalin a mapakawan dagiti basolna.
Nagkararag ni Alma para iti pannakapakawan, ket nasuktan iti rag-o ti saem iti kararuana. Napakawan isuna gapu ta adda pammatina ken ni Jesucristo ken nagbabawi.
Manipud idin insuro ni Alma ti ebanghelio kadagiti dadduma tapno mariknada ti isu met la a rag-o a nariknana. Binendisionan ti Dios ni Alma gapu iti panagtalekna iti Dios.
Inted ni Alma ken ni Helaman dagiti sagrado a kasuratan ket imbagana kenkuana nga ituloyna ti panagsurat iti pakasaritaan dagiti taoda.
Imbaga ni Alma kenkuana a no tungpalenna dagiti bilin, paraburan isuna ti Dios ket tulonganna a mangsaluad kadagiti kasuratan.
Imbaga pay ni Alma ken ni Helaman nga agkararag iti tunggal bigat ken agsapa ket kasaritana ti Dios maipapan iti amin a banag nga ar-aramidenna tapno makatulong ti Dios a mangtarabay kenkuana.
Naragsakan ni Alma iti anakna a lalaki a ni Shiblon, a nagbalin a natured a misionario kadagiti Zoramite. Nagtalinaed a napudno ni Shiblon uray no binatoda isuna.
Impalagip ni Alma ken ni Shiblon a babaen laeng ken ni Jesucristo ti kakaisuna a wagas tapno maisalakan. Kalpasanna inallukoy ni Alma ti anakna a lalaki a mangituloy iti panangisurona iti ebanghelio.
Saan a nagtungpal kadagiti bilin ti anak a lalaki ni Alma a ni Corianton. Saan a nagbalin isuna a napudno a misionario kabayatan ti panangisurona kadagiti Zoramite.
Gapu iti inaramid ni Corianton, saan a mamati dagiti Zoramite kadagiti pannursuro ni Alma.
Imbaga ni Alma ken ni Corianton a saan a mailemmeng dagiti tao ti basbasolda manipud iti Dios ket kasapulan ni Corianton ti agbabawi.
Insuro ni Alma ti anakna a lalaki nga agungarto ti tunggal maysa ngem dagiti laeng nalinteg ti makipagnaedto iti Dios.
Daytoy a biag ti panawen para kadagiti tao nga agbabawi ken agpaay iti Dios, kinuna ni Alma.
Iti panangipalagip ken ni Corianton a naawagan isuna nga agbalin a misionario, imbaga kenkuana ni Alma nga agsubli kadagiti Zoramite ket isurona kadagiti tao nga agbabawida.
Intuloy ni Alma ken dagiti annakna a lallaki ti panangisuro iti ebanghelio. Nangisuroda babaen ti bileg ti kinasaserdote.