Kapitulo 40
Isarita ni Samuel A Lamanite ti maipapan ken ni Jesucristo
Tinungpal dagiti Lamanite dagiti bilin ti Dios. Nagbalinda a nalinlinteg ngem dagiti Nephite.
Napan ni Samuel, maysa a propeta a Lamanite, iti Zarahemla tapno mangasaba kadagiti nadangkes a Nephite. Imbagana kadakuada nga agbabawi.
Pinaruar dagiti Nephite ni Samuel iti siudad, ket nangrugi a nagsubli iti bukodna a daga.
Ngem imbaga ti Apo ken ni Samuel nga agsubli iti Zarahemla ket ibagana kadagiti tao dagiti banag nga iseksek ti Apo iti pusona.
Saan a palubosan dagiti Nephite nga agsubli ni Samuel iti siudad, isu nga immuli isuna iti rabaw ti pader ti siudad ket nangikasaba manipud idiay.
Impadtona a madadaelto dagiti Nephite iti 400 a tawen malaksid no nagbabawi dagiti tao ken adda pammatida ken ni Jesucristo.
Imbaga ni Samuel kadagiti Nephite a mayanakto ni Jesucristo iti lima a tawen ken isalakannanto ti amin a mamati kenkuana.
Imbaga ni Samuel maipapan kadagiti tanda ti pannakayanak ni Jesus. Agparangto ti baro a bituen, ken awanto ti sipnget iti rabii sakbay a mayanak ni Jesus.
Kalpasanna imbaga ni Samuel kadakuada dagiti tanda ti ipapatay ni Jesus. Addanto tallo nga aldaw ti naan-anay a kinasipnget—saanto nga aglawag ti init, bulan, ken dagiti bituen.
Addanto pay gurruod ken kimat ken dagiti ginggined Agkusukosto dagiti bantay, ken adunto a siudad ti madadael.
Namati ken ni Samuel ti sumagmamano a Nephite ket nagbabawida kadagiti basbasolda. Sinapulda ni Nephi, ti nalinteg a Nephite a mabalin a mangbuniag kadakuada.
Saan a namati dagiti nabati a Nephite ken ni Samuel. Binato ken pinanada isuna. Ngem sinaluadan ti Apo isuna, ket awan kadagiti bato ken pana ti nangpunta kenkuana.
Idi makita dagiti tao a saanda a mapuntaan isuna, ad-adu pay ti namati kenkuana ket napanda ken ni Nephi tapno agpabuniag.
Sinuruan pay ni Nephi dagiti tao maipapan ken ni Jesus. Tinarigagayanna kadakuada a mamatida ken ni Jesus, agbabawi, ken agpabuniagda.
Nupay kasta, kaaduan a Nephite ti saan a namati ken ni Samuel. Pinadasda ti mangtiliw kenkuana.
Timmapuak ni Samuel manipud iti pader ket naglibas a napan iti bukodna a pagilian.
Nangrugi ni Samuel iti panangisuro kadagiti Lamanite. Awanen ti damag pay maipapan kenkuana kadagiti Nephite.