Kapitulo 34
Ni Helaman ken dagiti 2,000 nga Agtutubo a Mannakigubat
Inkari dagiti tao ni Ammon iti Dios a saandan a makiranget manen. Nagnaedda iti asideg dagiti Nephite, ket sinalakniban ida dagiti Nephite.
Idi dumarup dagiti kabusor dagiti tao ni Ammon kadagiti Nephite, tinarigagayan dagiti tao ni Ammon a dadaelen ti karida ken tulonganda dagiti Nephite a makiranget.
Saan a kayat ni Helaman ken dagiti dadduma pay a dadaulo a Nephite a dadaelen dagiti tao ni Ammon ti karida iti Dios.
Saan nga inaramid dagiti agtutubo nga annak a lalaki dagiti tao ni Ammon ti karida. Tinarigagayanda a tulongan ti buyot ti Nephite para iti wayawaya.
Pinili dagiti dua ribu kadagitoy nga agtutubo a lallaki ti mangsalaknib iti pagilianda. Indawatda ken ni Helaman nga agbalin a dadauloda.
Maingel, natured, ken napigsa dagitoy nga agtutubo a lallaki. Napudno ken mapagtalkanda pay, ket nagtungpalda kadagiti bilin ti Dios.
Indauluan ni Helaman dagiti 2,000 nga agtutubo a mannakigubat iti dangadang. Inawaganna ida nga annakna a lallaki, ket inawaganda isuna nga amada.
Nupay saan pay pulos a nakiranget dagiti annak a lallaki ni Helaman, saanda a nagbuteng. Sinuruan ida dagiti innada a maaddaan iti pammati iti Dios ken maammuanda a tulonganna ida.
Nakiranget ni Helaman ken ti buyotna iti sumagmamano a gubat a maibusor kadagiti Lamanite. Nagtungpal dagitoy nga agtutubo a lallaki iti amin a bilin ni Helaman.
Situtured a nakirangetda ken timmulongda a nagpapanaw iti kabusor. Kalpasan ti gubat naammuan ni Helaman a nadangran ti amin nga annakna a lallaki ngem awan ti uray maysa a napapatay.
Maysa a milagro daytoy. Naragsakan unay ni Helaman. Ammona a nasalakniban dagitoy nga agtutubo a lallaki gapu iti dakkel a pammatida iti Dios.