Kapitulo 18

Agbabawi ni Alma nga Ub-ubing

Inaramid ni Ari Mosiah ni Alma a dadaulo ti Simbaan iti Zarahemla. Kalpasanna pinili ni Alma dagiti dadduma a lallaki a mangtulong kenkuana a mangisuro kadagiti Nephite.

Mosiah 25:19; 26:8

Nagdanag da Alma ken Ari Mosiah gapu ta parparigaten dagiti di mamatpati dagiti miembro ti Simbaan gapu kadagiti pammatida.

Mosiah 27:1

Adda anak a lalaki ni Alma nga agnagan iti Alma. Saan a namati ni Alma nga Ub-ubing kadagiti pannursuro ti amana ket nagbalin nadangkes a tao.

Mosiah 27:8

Bimmusor iti Simbaan ni Alma nga Ub-ubing ken dagiti uppat nga annak a lallaki ni Ari Mosiah. Inallukoyda dagiti adu a tattao a pumanaw iti Simbaan ket agbalin a nadangkes.

Mosiah 27:8

Inkararag ni Alma a masursuro koma ti anakna a lalaki ti kinapudno ket agbabawi.

Mosiah 27:14

Nagtultuloy a pinadas ni Alma nga Ub-ubing ken dagiti annak a lallaki ni Ari Mosiah a mangdadael iti Simbaan.

Mosiah 27:10

Maysa nga aldaw nagparang ti maysa nga anghel kadakuada. Nagsao ti anghel iti napigsa a timek a nangdayyeg iti daga.

Mosiah 27:11

Nagbuteng unay ti lima nga agtutubo a lallaki ta natuangda iti daga. Idi damo dida naawatan no ania ti insasao ti anghel.

Mosiah 27:12

Dimteng ti anghel kas sungbat ti karkararag dagiti miembro ti Simbaan. Dinamag ti anghel ken ni Alma nga Ub-ubing no apay a lumablaban a maibusor iti Simbaan.

Mosiah 27:13–14

Nadayyeg ti daga bayat ti panangibaga ti anghel ken ni Alma nga Ub-ubing a mangisardeng iti panangpadas a mangdadael iti Simbaan.

Mosiah 27:15–16

Natuang manen ni Alma nga Ub-ubing ken dagiti annak a lallaki ni Mosiah. Nakitada ti maysa nga anghel, ket ammoda a ti bileg ti Dios ti nangdayyeg iti daga.

Mosiah 27:18

Nasdaaw unay ni Alma nga Ub-ubing ta saan a makapagsao. Nagbalin a nakapsut unay isuna ta saannan a maigaraw uray dagiti imana.

Mosiah 27:19

Binagkat dagiti annak a lallaki ni Mosiah ni Alma nga Ub-ubing nga impan iti amana ket imbagada kenkuana ti amin a napasamak.

Mosiah 27:19–20

Naragsak ni Alma. Ammona a sinungbatan ti Dios dagiti kararagna.

Mosiah 27:20

Inawagan ni Alma a sangkamaysa dagiti taona tapno kitaen no ania ti inaramid ti Apo para iti anakna a lalaki ken dagiti annak a lallaki ni Mosiah.

Mosiah 27–21

Nagayuno ken nagkararag ni Alma, a kaduana dagiti dadduma pay a lider ti Simbaan, ket indawatda iti Dios a tulonganna ni Alma nga Ub-ubing nga agbalin manen a napigsa.

Mosiah 27:22

Kalpasan ti dua nga aldaw ken rabii, nakapagsao ken nakagaraw ni Alma nga Ub-ubing.

Mosiah 27:23

Imbagana kadagiti tao a nagbabawin kadagiti basolna ket pinakawanen isuna ti Dios.

Mosiah 27:24

Insurona a nasken nga agbalin a nalinteg ti tunggal maysa tapno makastrek iti pagarian ti Dios. Imbagana pay maipapan iti nakaro a saem a sinagabana gapu kadagiti basolna.

Mosiah 27:25–26, 29

Naragsak ni Alma nga Ub-ubing gapu ta nagbabawi ket pinakawan ti Dios isuna. Ammona nga inayat ti Dios isuna.

Mosiah 27:28

Nangrugi a nangisuro iti kinapudno ni Alma nga Ub-ubing ken dagiti annak a lallaki ni Mosiah iti intero a daga, a mangibagbaga iti tunggal maysa no ania ti nakita ken nangngeganda.

Mosiah 27:32

Pinadasda a saan nga aramiden ti biddut nga inaramidda. Inlawlawagda dagiti nasantuan a kasuratan kadagiti tao ken insuroda kadakuada maipapan ken ni Jesucristo.

Mosiah 27:35

Binendisionan ti Dios ni Alma nga Ub-ubing ken dagiti annak a lallaki ni Mosiah bayat ti panangisuroda iti ebanghelio. Adu a tattao ti dimngeg kadakuada ken namati.

Mosiah 27:36