Kapitulo 5

Panagdaliasat iti Langalang

Kayat ti Apo a maaddaan dagiti annak a lallaki ni Lehi iti assawa, a mangisuro kadagiti annakda iti ebanghelio. Imbagana ken ni Lehi a mangibaon kadagiti annakna a lallaki nga agsubli iti Jerusalem a mangala iti kaamaan ni Ismael.

1 Nephi 7:1–2

Nagsubli da Nephi ken dagiti kakabsatna a lallaki iti Jerusalem. Imbagada ken ni Ismael no ania ti kayat ti Apo nga aramidenna. Namati ni Ismael kadakuada, simmurot isuna ken ti kaamaanna kadagiti annak ni Lehi.

1 Nephi 7:3–5

Bayat ti panagdaliasatda iti langalang, nagpungtot da Laman ken Lemuel ken ti sumagmamano iti kaamaan ni Ismael. Kayatda ti agsubli iti Jerusalem.

1 Nephi 7:6–7

Impalagip ni Nephi kada Laman ken Lemuel ti amin nga inaramid ti Apo para kadakuada. Imbagana kadakuada a maaddaan iti dakdakkel a pammati. Kinagurada ni Nephi ngem saanda a nagsubli iti Jerusalem.

1 Nephi 7:8–13, 16, 21

Idi agangay inkallaysa ni Nephi, dagiti kakabsatna a lallaki, ken ni Zoram dagiti annak a babbai ni Ismael.

1 Nephi 16:7

Imbaga ti Apo ken ni Lehi nga ituloyna ti panagdaliasatna. Kabigatanna nasarakan ni Lehi ti gambang a bola a maawagan iti Liahona iti ruar ti toldana. Daytoy ti mangitudo iti dalan a mapan iti langalang.

1 Nephi 16:9–10

Inummong ti kaamaan ni Lehi ti taraon ken bukbukel ken dagiti toldada. Nagdaliasatda iti langalang iti uneg ti adu nga aldaw, a nangsursurot kadagiti panangiturong ti Liahona.

1 Nephi 16:11–16

Nagusar da Nephi ken dagiti kakabsatna kadagiti bai ken pana a paganup iti taraon bayat ti panagdaliasatda.

1 Nephi 16:14–15

Natukkol ti landok a bai ni Nephi, ken kimmapsut dagiti bai dagiti kakabsatna. Saanen a makapatay iti ania man nga ayup dagiti agkakabsat, isu a nabisinan ti tunggal maysa. Nagpungtot da Laman ken Lemuel.

1 Nephi 16:18–21

Nagaramid ni Nephi iti kayo a bai ket sinaludsodna iti amana no sadino ti paganupanna. Inawat ni Lehi dagiti pangiturong iti Liahona. Sinurot ni Nephi dagiti pangiturong ket nasarakanna ti sumagmamano nga ayup.

1 Nephi 16:23, 26, 30–31

Agandar laeng ti Liahona no napudno, napasnek, ken natulnog ti kaamaan ni Lehi.

1 Nephi 16:28–29

Nagsubli ni Nephi a nangisangpet kadagiti ayup a nasarakanna. Naragsak ti tunggal maysa a nangan iti taraon. Nagladingitda iti panagpungtoda, ket nagyamanda iti Dios iti paraburna kadakuada.

1 Nephi 16:32

Saan a nalaka ti panagdaliasat. Masansan a mabannog, mabisin, ken mawaw ti kaamaan ni Lehi. Natay ni Ismael ket nagladingit dagiti annakna a babbai. Nagdayamudomda a maibusor ken ni Lehi.

1 Nephi 16:34–35

Nagdayamudom met da Laman ken Lemuel. Saanda a namati a nakisao ti Apo ken ni Nephi. Tinarigagayanda a patayen da Lehi ken Nephi ket agsublida iti Jerusalem.

1 Nephi 16:37–38

Nakisao ti timek ti Apo kada Laman ken Lemuel. Imbagana kadakuada a saanda nga agpungtot kada Lehi ken Nephi. Nagbabawi da Laman ken Lemuel.

1 Nephi 16:39

Intuloy ti kaamaan ni Lehi ti narigat a panagdaliasatda. Tinulongan ida ti Dios ket pinapigsana ida. Nayanak dagiti ubbing. Naaddaan da Lehi ken Saria ti dua pay nga annak a lallaki, nga agnagan iti Jacob ken Jose.

1 Nephi 17:1–3; 18:7

Kalpasan ti panagdaliasat iti langalang iti walo a tawen, nakadanon ti kaamaan ni Lehi iti igid ti baybay. Sadiay a nakasarakda iti bunga ken tagapulot ti uyokan. Inawaganda ti lugar iti Bountiful.

1 Nephi 17:4–6