Kapitulo 51
Agdaliasat dagiti Jaredite nga Agturong iti Naikari a Daga
Bayat ti panagkampo dagiti Jaredite iti igid ti baybay, nalipatan ti lalaki a kabsat ni Jared ti agkararag. Dimteng ti Apo iti ulep tapno mangibaga kenkuana nga agbabawi.
Nagbabawi ken nagkararag ti lalaki a kabsat ni Jared. Pinakawan ti Apo ti lalaki a kabsat ni Jared ngem kinunana a nasken a saanen nga agbasol pay.
Imbaga ti Apo iti lalaki a kabsat ni Jared nga agaramid kadagiti bilog a mangipan kadagiti taona iti naikari a daga.
Imbaga ti Apo iti lalaki a kabsat ni Jared no kasano ti agaramid kadagiti bilog.
Naaramid a napintek dagiti bilog tapno saan a makastrek ti danum.
Nasdaaw ti lalaki a kabsat ni Jared no kasano a maaddaan iti angin dagiti tao tapno makaangesda iti uneg dagiti bilog. Dinamagna iti Apo no ania ti nasken nga aramidenna.
Imbaga ti Apo kenkuana nga agaramid iti abut iti tuktok ken tengnga ti tunggal bilog. Mabalin a luktan ti abot tapno mangpalugod iti angin a sumrek ken maiserra tapno saan a makastrek ti danum.
Imbaga ti lalaki a kabsat ni Jared iti Apo a nasipnget iti uneg dagiti bilog. Indawat ti Apo kenkuana a mangpanunot iti wagas tapno maaddaan iti silaw iti uneg dagiti bilog.
Saan a mabalin nga aggapu kadagiti tawa ti silaw para kadagiti bilog gapu ta madadaelda.
Napan ti lalaki a kabsat ni Jared iti bantay ket nangsukog iti 16 a babassit a bato manipud iti bato. Kas iti aganninaw a sarming dagiti bato. Nagaramid iti dua a bato para iti tunggal maysa iti walo a bilog.
Insang-at ti lalaki a kabsat ni Jared dagiti bato iti tuktok ti bantay. Idiay a nagkararag isuna iti Apo.
Indawat ti lalaki a kabsat ni Jared iti Apo a mangsagid kadagiti bato tapno mangted silaw iti uneg dagiti bilog.
Sinagid ti Apo ti tunggal bato iti ramayna.
Gapu ta dakkel ti pammati ti lalaki a kabsat ni Jared, nakitana ti ramay ti Apo. Kasla maysa a ramay ti tao daytoy.
Kalpasanna impakita ti Apo ti bagina iti lalaki a kabsat ni Jared.
Kinuna ni Jesus a maaddaanto iti agnanayon a biag dagiti tao a mamati kenkuana.
Sinuruan ken impakita ni Jesus iti lalaki a kabsat ni Jared ti adu a banag. Imbaga ni Jesus kenkuana nga isuratna no ania ti nakita ken nangngeganna.
Imbaba ti lalaki a kabsat ni Jared dagiti bato iti bantay. Nangikabil iti maysa a bato iti tunggal murdong ti tunggal bilog. Nangtedda iti lawag iti uneg dagiti bilog.
Simrek dagiti Jaredite kadagiti bilog a bitbitda dagiti ayup ken taraonda. Inaramid ti Apo a narungsot ti angin a nangpuyot kadagiti bilog nga agturong iti naikari a daga.
Sinaluadan ti Apo ida iti nadawel a baybay. Nagyamanda iti Apo ket nagkantada a pagdaydayaw kenkuana.
Kalpasan ti 344 nga aldaw iti rabaw ti danum, dimmanon dagiti bilog iti igid ti baybay iti naikari a daga.
Idi rummuar dagiti Jaredite kadagiti bilog, nagparintumengda ket nagsangitda iti rag-o.
Nagbangon dagiti Jaredite kadagiti pagtaengan ken nagmulada iti naikari a daga. Sinuruanda dagiti annakda a dumngeg iti Apo ken agtungpal kadagiti balikasna.