Kapitulo 42
Dagiti Tanda ti Pannakailansa ti Mangisalakan iti Krus
Napalabas ti tallupulo-ket-tallo a tawen manipud idi nakita dagiti tao dagiti tanda ti pannakayanak ni Jesucristo.
Bambantayanda itan ti tanda ti pannakayanakna: tallo nga aldaw ti sipnget.
Sumagmamano ti saan a namati nga umay ti tanda. Nakisinnupiatda kadagiti namati.
Maysa nga aldaw immay ti narungsot a bagyo. Adda nakabutbuteng nga angin.
Nagkimat, ken dinayyeg ti gurruod ti sibubukel a daga.
Nauram ti siudad ti Zarahemla. Limned iti baybay ti siudad ti Moroni. Naitanem ti siudad ti Moronihah.
Dinayyeg ti ginggin-ed ti sibubukel a daga. Nadadael dagiti nalawa a kalsada, ket narpuog dagiti pasdek. Adu ti nadadael a siudad, ken adu ti natay a tattao.
Nagpaut ti bagyo ken ti ginggin-ed iti agarup tallo nga oras.
Idi nagsardeng ti bagyo ken ginggin-ed, nakumotan ti daga iti sipnget. Awan ti lawag iti sadino man. Marikna dagiti tao uray ti kinasipnget.
Nagpaut ti sipnget iti uneg ti tallo nga aldaw. Saan nga agsindi dagiti kandela, ken saan a makita dagiti tao ti init, bulan, ken dagiti bituen.
Nagsangit dagiti tao gapu iti sipnget, pannakadadael, ken ipapatay. Nagladingitda a saanda a nagbabawi kadagiti basolda.
Kalpasanna nangngeg dagiti tao ti timek ni Jesucristo.
Imbaga ni Jesus kadakuada maipapan iti nakabutbuteng a pannakadadael iti daga. Kinunana a kaaduan a nadangkes a tattao ti napapatay.
Kinunana a kasapulan nga agbabawi dagiti saan a napapatay. No nagbabawida ken immasidegda kenkuana, bendisionanna ida.
Nasdaaw unay dagiti tao kalpasan ti pannakangngegda iti timek a nagsardengdan a nagsangit. Naulimek ti amin a banag iti uneg ti adu nga oras.
Nagsao manen ni Jesus, a kunkunana a masansan a pinadasna a tulongan dagiti tao. No agbabawida itan, makapagsublida pay laeng kenkuana.
Kalpasan ti tallo nga aldaw nagawan ti sipnget. Nagrag-o dagiti tao ket siraragsak a nagyamanda iti Apo.