Kapitulo 31

Abaken ni Kapitan Moroni ni Zerahemnah

Kayat ni Zerahemnah, ti dadaulo dagiti Lamanite, nga ituloy dagiti taona ti pananggura kadagiti Nephite ken pagbalinen ida nga adipenda.

Alma 43:5, 8

Kayat dagiti Nephite a pagtalinaeden ti dagada ken nawaya dagiti kaamaanda. Kayatda pay nga agbalinda a nawaya nga agdaydayaw iti Dios.

Alma 43:9

Ni Kapitan Moroni ti dadaulo dagiti buyot ti Nephite. Idi immay dagiti Lamanite a makiranget, sinabat ida ni Moroni ken dagiti buyotna iti daga ti Jershon.

Alma 43:15–16

Insagana ni Kapitan Moroni ti buyotna kadagiti armas, kabal, kalasag, ken nabengbeng a lupot.

Alma 43:18–19

Dakdakkel ti buyot dagiti Lamanite ngem nagbutengda idi makitada ti kalasag dagiti Nephite—nakaaruat laeng dagiti Lamanite iti naingpis unay a lupot.

Alma 43:20–21

Saan a nagtured a makiranget ti buyot ti Lamanite iti buyot ni Kapitan Moroni. Nagtaray dagiti Lamanite iti langalang ket inkeddengda ti dumarup iti sabali a siudad ti Nephite.

Alma 43:22

Nangibaon ni Moroni kadagiti espia a mangbantay kadagiti Lamanite. Indawatna pay ken ni Alma nga agkararag para iti tulong ti Apo. Imbaga ti Apo ken ni Alma no sadino ti pagdarupan dagiti Lamanite.

Alma 43:23–24

Idi naawat ni Moroni ti mensahe ni Alma, nangibati isuna iti sumagmamano a soldado a mangbantay iti Jershon ket impagnana dagiti dadduma kadakuada a mangsabat kadagiti Lamanites.

Alma 43:25

Naglemmeng dagiti soldado ni Kapitan Moroni iti agsumbangir ti karayan Sidon, a mangur-uray iti buyot ti Lamanite.

Alma 43:27, 31–35

Nagrugi ti gubat, ket pinadas dagiti Lamanite ti aglibas babaen ti panagballasiwda iti karayan, ngem nagur-uray ti adu a Nephite kadakuada iti sabali a bangir.

Alma 43:36, 39–41

Iti pannakirangetda a napaspasnek pay ngem idi kasakbayanna, adu a Nephite ti pinatay ni Zerahemnah ken ti buyotna. Immararaw dagiti Nephite iti tulong ti Apo.

Alma 43:43–44, 49

Pinapigsa ti Apo ti buyot ti Nephite. Linikmutan ti buyot dagiti Lamanite, ket imbilin ni Moroni a maisardeng ti panagraranget.

Alma 43:50, 52–54

Imbaga ni Moroni ken ni Zerahemnah a saan a kayat dagiti Nephite ti mangpatay kadagiti Lamanite wenno pagbalinen ida nga adipenda.

Alma 44:1–3

Kinuna ni Moroni a saan a madadael dagiti Lamanite ti pammati dagiti Nephite ken ni Jesucristo. Kinunana nga ituloy ti Dios a tulongan dagiti Nephite a makiranget no la ketdi napudnoda.

Alma 44:4

Binilin ni Moroni ni Zerahemnah a mangisuko kadagiti armasna. Saan a mapapatay dagiti Lamanite no ikarida a saandan a makiranget manen kadagiti Nephite.

Alma 44:5–6

Inted ni Zerahemnah ken ni Moroni dagiti armasna ngem saan nga agkari a saan a makiranget. Insubli ni Moroni dagiti armas tapno masalakniban dagiti Lamanite ti bagbagida.

Alma 44:8, 10

Dimmarup ni Zerahemnah ken ni Moroni tapno patayenna, ngem pinalting ti maysa a soldado a Nephite ti espada ni Zerahemnah ket dinadaelna.

Alma 44:12

Kalpasanna nilapsi ti soldado ti kudil ti ulo ni Zerahemnah, inkabilna daytoy iti tirad ti espadana, ket intag-ayna daytoy iti tangatang.

Alma 44:12–13

Madaleb dagiti Lamanite no matnag ti kudil ti ulo, kinunana kadakuada, malaksid no isukoda dagiti armasda ket agkarida a saandan a makiranget pay.

Alma 44:14

Impan ti adu a Lamanite dagiti armasda iti sakaanan ni Moroni ket inkarida a saandan a makiranget. Napalubosanda a pumanaw nga agwaywayas.

Alma 44:15

Nakapungtot, sinugsogan ni Zerahemnah dagiti nabati pay a soldadona tapno makiranget. Pinatay dagiti soldado ni Moroni ti adu kadakuada.

Alma 44:16–18

Idi nakita ni Zerahemnah a mapapatay isuna ken ti amin a tattaona, impakaasina ken ni Moroni nga ispalenna ida. Inkarina a saandan a makiranget manen kadagiti Nephite.

Alma 44:19

Pinagsardeng ni Moroni ti panagranget ket innalana dagiti armas dagiti Lamanite. Kalpasan a nagkarida a saandan a makiranget, pimmanaw dagiti Lamanite.

Alma 44:20, 23