Kapitulo 46
Mangisuro ken Makipagkararag ni Jesucristo kadagiti Nephite
Imbaga dagiti Nephite a nakakita ken ni Jesucristo kadagiti gagayyemda nga agsubli isuna iti kabigatanna. Inkarigatan ti adu a tattao ti makapan iti yan ni Jesus.
Kabigatanna sinuruan ni Nephi ken dagiti dadduma pay a disipulo ti grupo a nagguummong. Kalpasanna nagkararag dagiti disipulo nga awatenda ti Espiritu Santo.
Timmapog ni Nephi iti danum ket nabuniagan. Kalpasanna binuniaganna dagiti dadduma a disipulona.
Kalpasan a nabuniaganda, inawat dagiti disipulo ti Espiritu Santo. Kasla napalawlawanda iti apuy, ken bimmaba dagiti anghel manipud iti langit ket nagpaayda kadakuada.
Kabayatan ti kaadda dagiti anghel kadagiti disipulo, immay ni Jesus ket nagtakder kadakuada.
Imbaga ni Cristo iti amin a Nephite nga agparintumengda iti daga. Imbagana kadagiti dispulona nga agkararagda.
Kabayatan ti panagkararagda, immadayo bassit ni Jesus manipud kadagiti tao ket nagparintumeng ken nagkararag iti Nailangitan nga Ama.
Nagyaman ni Jesus iti Nailangitan nga Ama iti panangtedna iti Espiritu Santo kadagiti disipulona. Kalpasanna indawatna a maited ti Espiritu Santo iti asino man a mamati kadagiti balikas dagiti disipulo.
Binendisionan ni Jesus dagiti disipulona bayat ti panagkararagda. Inisemanna ida, ket nagbalinda a katarnaw ti rupa ken kawesna.
Nagkararag manen ni Jesuscristo para kadagiti disipulona. Naragsakan isuna iti dakkel a pammatida.
Imbaga ni Cristo kadagiti tao nga agsardengda iti panagkararag ngem pagtalinaedenda ti panagkararag iti puspusoda. Kalpasanna intedna kadakuada ti sakramento.
Awan ti maysa a nangitugot iti tinapay wenno arak, ngem nangipaay ti Mangisalakan iti daytoy iti namilagruan a wagas.
Imbaga ni Jesucristo kadagiti Nephite a maisublinto ti ebangheliona iti daga kadagiti maudi nga aldaw.
Imbagana kadakuada nga adalenda dagiti nasantuan a kasuratan, ken impasuratna ken ni Nephi kadagiti kasuratan ti pannakaipatungpal dagiti nabati a padto ni Samuel a Lamanite.
Kalpasanna nangisuro ni Jesus kadagiti tao manipud kadagiti nasantuan a kasuratan. Imbagana kadakuada nga isuroda iti tunggal maysa dagiti banag nga insurona kadakuada.
Nagsubli ni Jesus iti langit, ket nangisuro dagiti disipulona kadagiti tao. Dagiti namati ket nabuniagan ken immawat iti Espiritu Santo.
Nagrugi nga agtungpal iti amin a bilin dagiti Nephite.