Kapitulo 17
Aglibas ni Alma ken dagiti Taona
Nagbuteng dagiti Nephite ket nagtarayda iti siudad para iti talged. Imbaga kadakuada ni Alma a laglagipenda ti Dios ket tulongannanto ida. Nangrugi a nagkararag dagiti Nephite.
Pinalukneng ti Apo ti puspuso dagiti Lamanite, ket saanda a dinangran dagiti Nephite. Nayaw-awan dagiti Lamanite kabayatan ti panangpadasda a nagsapul kadagiti tao ni Ari Limhi.
Inkari dagiti Lamanite ken ni Alma a saandanton a mangsinga kadagiti taona no ibagana kadakuada no kasano ti agsubli iti dagada. Impakita ni Alma kadakuada ti dalan.
Ngem saan a tinungpal dagiti Lamanite ti karida. Nagikabilda kadagiti guardia iti aglawlaw ti daga, ken saanen a nawaya ni Alma ken dagiti taona.
Inaramid ti ari dagiti Lamanite ni Amulon nga mangituray kadagiti tao ni Alma. Maysa idi a Nephite ni Amulon ken maysa a nadangkes a saserdote ni Ari Noe.
Pinagtrabaho ni Amulon dagiti tao ni Alma iti nakarigrigat. Nagkararagda para iti tulong, ngem kinuna ni Amulon a mapapatay ti asino man a matiliwan nga agkarkararag. Intuloy dagit tao ti nagkarkararag iti puspusoda.
Dinengngeg ti Dios dagiti kararagda ket pinapigsana dagiti tao tapno kasla nalaklaka ti trabahona. Naragsak ken naanus dagiti tao.
Naragsakan ti Dios ta napudno dagiti tao. Imbagana ken ni Alma a tulongannanto ida nga aglibas manipud kadagiti Lamanite.
Kabayatan ti rabii inummong dagiti tao dagiti taraon ken ayupda. Kabigatanna pinaturog ti Dios dagiti Lamanite idinto a pimmanaw ni Alma ken dagiti taona iti siudad.
Kalpasan ti panagdaliasat iti uneg ti 12 nga aldaw, nakasangpet dagiti tao iti Zarahemla, a nangpasangbayan kadakuada ni Ari Mosiah ken dagiti taona.