Kapitulo 13
Zeniff
Pinanawan ni Zeniff ken ti grupo dagiti Nephite dagiti pagtaenganda iti Zarahemla ket nagbaniagada iti daga ti Nephi, a nagindegan idi dagiti dadduma pay a Nephite.
Nasarakanda dagiti Lamanite nga agnanaed sadiay. Napan ni Zeniff ken ti uppat kadagiti taona iti siudad tapno kasarita ti ari. Kiniddawda ken ni Ari Laman no mabalinda ti agnaed iti dagana.
Kinuna ni Ari Laman a mabalinda a tagikuaen ti dua kadagiti siudadna. Kayat ti ari nga agnaedda iti dagana tapno maaramidna ida nga adipenna.
Nagpatakder dagiti tao ni Zeniff kadagiti pagtaengan ken tinarimaanda dagiti alad iti aglawlaw dagiti siudadda. Nagmulada iti adu a kita ti bukbukel ken bunga. Addaanda pay kadagiti arban dagiti ayup.
Imbaga ni Ari Laman kadagiti taona nga agbalinen a nabileg unay dagiti Nephite. Idi agangay adu a Lamanite ti napan dimmarup kadagiti Nephite ket tinakawda dagiti ayup ken apitda.
Nagtaray dagiti Nephite a nagturong iti siudad ti Nephi. Idiay nga inarmasan ni Zeniff dagiti tao iti bai, pana, espada, pang-or, ken palsiit. Napanda nakiranget kadagiti Lamanite.
Sakbay a nakirangetda, nagkararag dagiti Nephite, a nagidawdawat iti tulong. Pinaraburan ti Dios dagiti Nephite iti nayon a pigsa, ket inabakda dagiti Lamanite.
Kalpasan ti gubat nangikabil ni Zeniff kadagiti guardia iti lawlaw dagiti siudad ti Nephi. Kayatna a saluadan dagiti taona ken dagiti ayupda manipud kadagiti Lamanite.
Nagbiag dagiti Nephite iti kinatalna iti uneg ti adu a tawen. Nagtrabaho dagiti lallaki iti talon, nagtibbi dagiti babbai ket nagaramidda kadagiti kawes.
Natay ni Ari Laman ket nagbalin nga ari ti anakna a lalaki. Imbaon ti baro nga ari ti buyotna a makiranget kadagiti Nephite.
Nakaawat manen dagiti Nephite iti pigsa manipud iti Apo. Pinapatayda ti adu a Lamanite, ket nagtaray dagiti nabati.