Kapitulo 20
Da Alma ken Nehor
Sakbay a pimmusay ni Ari Mosiah, nangpili dagiti Nephite kadagiti ukom a mangidaulo kadakuada. Ni Alma nga Ub-ubing ti nagbalin nga umuna a kangatuan nga ukom. Isu pay ti lider ti Simbaan.
Nangrugi a nangisursuro iti inuulbod ti dakkel, napigsa a lalaki nga agnagan iti Nehor. Kinunana a maisalakanto ti tunggal maysa nasayaatda man wenno dakes. Namati ti adu a tao ken ni Nehor.
Nangasaba ni Nehor a maibusor iti Simbaan ti Dios, ngem sinaluadan daytoy ti nalinteg a tao nga agnagan iti Gideon. Sinuppiat ni Nehor ni Gideon, ngem nagsao ni Gideon kadagiti balikas ti Dios.
Nagpungtot ni Nehor ket inasutna ti espadana ket pinatayna ni Gideon.
Naidatag ni Nehor ken ni Alma tapno makedngan. Situtured a dinepensaan ni Nehor ti bagina.
Kinuna ni Alma a nakabasol ni Nehor gapu ta insurona dagiti tao nga agbalin a nadangkes ken pinatayna ni Gideon.
Kinuna ni Alma a nasken a madusa ni Nehor iti panangpatayna ken ni Gideon. Maibatay iti linteg, nasken a matay ni Nehor.
Naipan ni Nehor iti asideg a turod ket napapapatay. Sakbay a natay isuna kinunana a biddut ti amin a banag nga insurona. Ngem adu a tattao ti namati latta kadagiti insursuro ni Nehor.
Pagay-ayat dagitoy a tao dagiti kinabaknang ket saanda nga agtungpal kadagiti bilin ti Dios. Inang-angawda dagiti miembro ti Simbaan ket kinasuppiat ken kinarangetda ida.
Intultuloy dagiti nalinteg a tao ti agtungpal kadagiti bilin ken saanda a nagdayengdeng uray no dinangran ida dagiti pasurot ni Nehor.
Imbinglay dagiti miembro ti Simbaan ti amin nga adda kadakuada kadagiti napanglaw, ken inaywananda dagiti masakit. Tinungpalda dagiti bilin, ket pinaraburan ida ti Dios.