Kapitulo 37

Da Nephi ken Lehi iti Pagbaludan

Da Nephi ken Lehi ti annak a lallaki ni Helaman. Tinarigagayan ni Helaman kadakuada nga agbalinda a nalinteg kas kada Lehi ken Nephi a pimmanaw iti Jerusalem.

Helaman 5:4–7

Sinuruan ni Helaman dagiti annakna a mamati ken ni Jesucristo. Naammuanda nga umay ti pannakapakawan babaen ti pammati ken panagbabawi.

Helaman 5:9–12

Napan da Nephi and Lehi nangisuro iti balikas ti Dios kadagiti Nephite ken Lamanite. Rinibribu dagiti tao a nabuniagan.

Helaman 5:14–19

Idi napan da Nephi ken Lehi iti daga ti Nephi, impupok ida iti pagbaludan ti buyot ti Lamanite ket saanda nga inikkan ida iti taraon iti uneg ti adu nga aldaw.

Helaman 5:20–22

Napan dagiti Lamanite iti pagbaludan tapno patayenda da Nephi ken Lehi ngem dida kabaelan gapu ta nasalaknibanda iti nailikmut nga apuy a manguram iti asino man a mangpadas a mangsagid kadakuada.

Helaman 5:22–23

Saan a nauram iti apuy da Nephi ken Lehi. Imbagada kadagiti Lamanite a ti bileg ti Dios ti mangsalsalaknib kadakuada.

Helaman 5:24–26

Nagrugi a nadayyeg ti daga ket nagunggon dagiti pader ti pagbaludan. Napalawlawan iti ulep iti sipnget dagiti tao iti pagbaludan, ket nagbutengda.

Helaman 5:27–28

Nagsao ti maysa a timek a nagtaud iti ngato ti sipnget. Naalumamay a timek a kasla arasaas, ngem mangngeg ti tunggal maysa daytoy.

Helaman 5:29–30

Imbaga ti timek kadagiti tao nga agbabawi ken isardengda ti mangpapatay kada Nephi ken Lehi.

Helaman 5:29–30

Nagsao ti timek iti mamitlo a gundaway, ken nagtultuloy a nadayyeg ti daga ket nagunggon dagiti pader ti pagbaludan. Saan a makapaglibas dagiti Lamanite gapu ta nasipnget unay ket kasta unay ti butengda.

Helaman 5:33–34

Nakita ti maysa a Nephite a kameng idi ti Simbaan a nagrangrang dagiti rupa da Nephi ken Lehi iti sipnget.

Helaman 5:35–36

Kumitkita da Nephi ken Lehi iti langit ken agsarsaritada. Imbaga ti lalaki kadagiti Lamanite a kumitada. Nasdaawda no asino ti kasarsarita da Nephi ken Lehi.

Helaman 5:36–38

Imbaga ti lalaki, nga agnagan iti Aminadab, kadagiti Lamanite a kasarsarita da Nephi ken Lehi dagiti anghel.

Helaman 5:39

Dinamag dagiti Lamanite ken ni Aminadab no kasano a maliklikanda ti ulep ti sipnget. Imbagana kadakuada nga agbabawi ken agkararagda agingga nga adda pammatida ken ni Jesucristo.

Helaman 5:40–41

Nagkararag dagiti Lamanite agingga a napukaw ti ulep ti sipnget.

Helaman 5:42

Idi nagawan ti sipnget, nakita dagiti tao ti maysa nga adigi ti apuy a naipalawlaw kadakuada. Saan nga inuram ti apuy ida wenno dagiti pader ti pagbaludan.

Helaman 5:43–44

Nalaus ti rag-o dagiti Lamanite, ket napno iti Espiritu ti Dios dagiti puspusoda.

Helaman 5:44–45

Inyarasaas ti maysa a timek, a kunkunana maliwliwadanto gapu iti pammatida ken ni Jesucristo.

Helaman 5:46–47

Timmangad dagiti Lamanite tapno kitaenda no sadino ti naggapuan ti timek. Nakitada dagiti anghel a bumabbaba manipud iti langit.

Helaman 5:48

Agarup 300 ti nakakita ken nakangngeg no ania ti napasamak iti pagbaludan. Napanda imbaga kadagiti dadduma.

Helaman 5:49–50

Kaaduan dagiti Lamanite ti namati kadakuada ken nangidisso kadagiti armasda.

Helaman 5:50–51

Nagsardeng dagiti Lamanite iti pananggura kadagiti Nephite ket insublida ti daga nga innalada. Nagbalin a nalinlinteg dagiti Lamanite ngem dagiti Nephite.

Helaman 5:50, 52

Adu a Lamanite ti simmurot kada Nephi ken Lehi ket sinuruanda dagiti agpada a Nephite ken Lamanite.

Helaman 6:1, 6–7