Kapitulo 4

Dagiti Pinanid a Gambang

Imbaga ni Lehi ken ni Nephi a kayat ti Apo nga agsubli isuna ken dagiti kakabsatna a lallaki iti Jerusalem. Nasken nga alaenda dagiti pinanid a gambang manipud iti maysa a lalaki a managan iti Laban.

1 Nephi 3:2–4

Napapateg a kasuratan dagiti pinanid a gambang. Dagitoy ti mangisalaysay maipapan kadagiti appo ni Lehi ken naglaon kadagiti balikas ti Dios a naipalgak babaen kadagiti propeta.

1 Nephi 3:3, 20

Saan a kinayat da Laman ken Lemuel ti agsubli a mangala kadagiti pinanid a gambang. Kinunada a narigat unay nga aramiden daytoy. Awan ti pammatida iti Apo.

1 Nephi 3:5

Tinarigagayan ni Nephi ti agtungpal iti Apo. Ammona a tulongan ti Apo isuna ken dagiti kakabsatna a lallaki a mangala kadagiti pinanid a gambang manipud ken ni Laban.

1 Nephi 3:7

Nagdaliasat da Laman, Lemuel, Sam, ken Nephi nga agsubli iti Jerusalem a mangala kadagiti pinanid a gambang.

1 Nephi 3:9

Napan ni Laman ken ni Laban ken dinawatna kenkuana dagiti pinanid.

1 Nephi 3:11–12

Nagpungtot ni Laban ket saanna nga ited ken ni Laman dagiti pinanid a gambang. Kayat ni Laban a patayen ni Laman, ngem naglibas ni Laman.

1 Nephi 3:13–14

Imbaga ni Laman kadagiti kakabsatna no ania ti napasamak. Nagbuteng ket kinayatnan ti sumuko ket agsubli iti amada iti langalang.

1 Nephi 3:14

Kinuna ni Nephi a saanda a makasubli no awan dagiti pinanid a gambang. Imbagana kadagiti kakabsatna a maaddaan iti dakdakkel a pammati iti Apo ket kabaelanda nga alaen dagiti pinanid a gambang.

1 Nephi 3:15–16

Napan da Nephi ken dagiti kakabsatna iti daan a pagtaenganda iti Jerusalem ket inummongda dagiti balitok ken pirakda tapno isukat kadagiti pinanid.

1 Nephi 3:22

Impakitada ken ni Laban dagiti kinabaknangda ken indiayada nga isukat dagitoy kadagiti pinanid. Idi nakita ni Laban dagiti balitok ken pirakda, kayatna daytoy a tagikuaen ket pinapanawna ida.

1 Nephi 3:24–25

Imbaga ni Laban kadagiti taona a patayenda dagiti annak a lallaki ni Lehi. Nagtaray ni Nephi ken dagiti kakabsatsa ket naglemmengda iti maysa a kueba. Indulin ni Laban dagiti balitok ken pirakda.

1 Nephi 3:25–27

Kinagura da Laman ken Lemuel ni Nephi. Sinaplitda da Nephi ken Sam iti pannaplit.

1 Nephi 3:28

Nagparang ti maysa nga anghel ket imbagana kada Laman ken Lemuel nga isardengda. Kinunana a tulongan ida ti Apo a mangala kadagiti pinanid. Kinunana pay nga agbalin ni Nephi a dadaulo kadagiti kakabsatna a lallaki.

1 Nephi 3:29

Imbaga ni Nephi kadagiti kakabsatna a lallaki a maaddaan iti pammati iti Apo ket saanda nga agbuteng ken ni Laban ken dagiti taona. Inallukoy ni Nephi dagiti kakabsatna nga agsubli iti Jerusalem.

1 Nephi 4:1–4

Dayta a rabii naglemmeng dagiti kakabsat ni Nephi iti ruar ti bakud ti siudad idinto a simmirip ni Nephi iti uneg. Nagna a napan iti balay ni Laban.

1 Nephi 4:5

Iti yaasideg ni Nephi iti balay ni Laban, nakitana ti nabartek a tao a naudatal iti daga. Ni Laban daytoy.

1 Nephi 4:6–8

Nakita ni Nephi ti espada ni Laban ket innalana daytoy. Imbaga ti Espiritu Santo ken ni Nephi a patayenna ni Laban, ngem saan a kinayat ni Nephi ti mangpatay kenkuana.

1 Nephi 4:9–10

Imbaga manen ti Espiritu Santo ken ni Nephi a patayenna ni Laban tapno maala ni Nephi dagiti pinanid a gambang. Kasapulan ti kaamaan ni Lehi dagiti pinanid tapno masursuroda ti ebanghelio.

1 Nephi 4:12, 16–17

Nagtungpal ni Nephi iti Espiritu Santo ken pinatayna ni Laban. Kalpasanna insuot ni Nephi ti kawes ken ti kalasag ni Laban.

1 Nephi 4:18–19

Napan ni Nephi iti balay ni Laban ket sinabat ni Zoram, ti katulongan ni Laban. Naglanga ken nagtimek ni Nephi a kas Laban.

1 Nephi 4:20

Imbagana ken ni Zoram a mangala kadagiti pinanid a gambang. Impagarup ni Zoram a ni Laban ni Nephi, isu nga intedna kenkuana dagiti pinanid. Imbaga ni Nephi ken ni Zoram a sumurot kenkuana.

1 Nephi 4:21, 24–25

Nakita da Laman, Lemuel, ken Sam ni Nephi a sumangpet ket nagbutengda; impagarupda nga isu ni Laban. Inrugida ti agtaray ngem nagsardengda idi inawagan ida ni Nephi.

1 Nephi 4:28–29

Kalpasanna naamiris ni Zoram a saan a ni Laban ni Nephi, ket pinadasna ti agtaray. Nakamakam ni Nephi ni Zoram ket inkarina a saanna a dangran isuna no kumuyog ken ni Nephi iti langalang.

1 Nephi 4:30–33

Immanamong ni Zoram. Intugot ni Nephi ken dagiti kakabsatna ni Zoram ken dagiti pinanid a gambang ket nagsublida kada Lehi ken Saria.

1 Nephi 4:35, 38

Intedda dagiti pinanid a gambang ken ni Lehi. Naragsakda ken Saria gapu ta natalged dagiti annakda a lallaki. Nagrag-o ken nagyamanda amin iti Dios.

1 Nephi 5:1, 9

Binasa ni Lehi dagiti pinanid a gambang. Dagitoy ti mangisalaysay maipapan kada Adan ken Eva ken ti Pannakaparsua ti lubong. Naglaonda kadagiti balikas ti adu a propeta.

1 Nephi 5:10–11, 13

Naragsak da Lehi ken Nephi gapu ta tinungpalda ti Apo ken kinabaelanda nga innala dagiti pinanid a gambang.

1 Nephi 5:20–21

Binalkot ti kaamaan ni Lehi dagiti pinanid a gambang nga itugotda iti panangdaliasatda tapno maisuroda kadagiti annakda dagiti bilin a naisurat kadagiti pinanid.

1 Nephi 5:21–22