Kapitulo 6
Tagtagainep ni Lehi
Iti tagtagainepna nakita ni Lehi ti tao a nagkawes iti puraw a roba a nangibaga ken ni Lehi a sumurot kenkuana. Sinurot ni Lehi ti tao iti nasipnget ken nakaal-alingget a langalang.
Kalpasan ti panagdaliasat iti kasipngetan iti adu nga oras, nagkararag ni Lehi para iti tulong.
Kalpasanna, nakitana ti kayo nga addaan iti puraw a bunga. Daytoy nasam-it a bunga ti nangparagsak kadagiti nangan iti daytoy.
Nangan ni Lehi iti bunga, ket daytoy ti nangpunno kenkuana iti rag-o. Kayatna a ramanan ti kaamaanna ti bunga gapu ta ammona a daytoy pay ti mangparagsak kadakuada.
Nakita ni Lehi ti karayan nga agay-ayus nga asideg iti kayo. Iti uluanan ti karayan, nakitana da Saria, Sam, ken Nephi.
Inawagan ni Lehi ti asawa ken annakna a lallaki a mapan ken mangraman iti bunga. Napan da Saria, Sam, ken Nephi, ket nangraman iti bunga, ngem saan a napan da Laman ken Lemuel.
Nakita met ni Lehi ti landok a pagkaptan ken ti nailet ken akikid a dana a kumamang iti kayo.
Nakitana ti adu a tattao a magmagna nga agturong iti dana. Gapu iti nangisit nga angep, adda dagiti nayaw-awan iti dana ket napukawda.
Kimpet a nasayaat dagiti dadduma iti landok a pagkaptan ket nalasatanda ti nangisit nga angep a mapan iti kayo. Rinamananda ti bunga.
Dagiti tao iti nalawa a pasdek iti sabali a bangir ti karayan ket nagang-angawanda dagiti nangan iti bunga. Adda dagiti nangan iti bunga a nabainan ken pimmanawda iti kayo.
Adu a tao ti nakita ni Lehi iti tagtagainepna. Adda dagiti kimpet a sititibker iti landok a pagkaptan ket nagdaliasatda iti kasipngetan a mapan iti kayo. Rinamananda ti bunga. Napan dagiti dadduma iti dakkel a pasdek wenno nalmesda iti karayan wenno napukawda. Saan a mangan da Laman ken Lemuel iti bunga. Nagdanag ni Lehi maipapan kadakuada ken pinadasna a tulongan ida nga agtungpal kadagiti bilin ti Dios.