Kapitulo 1

No Kasano a Naalatayo ti Libro ni Mormon

Ni Joseph nga agsapsapul iti simbaan

Idi agtawen ni Joseph Smith iti 14, adu a simbaan ti agkuna a pudnoda, ket dina ammo ti no ania kadagitoy ti pagkamenganna.

Joseph Smith—Pakasaritaan 1:5–10

Ni Joseph nga agbasbasa iti Biblia

Maysa nga aldaw nabasa ni Joseph ti Santiago 1:5 iti Biblia: “No siasino man kadakayo ti agkurang iti kinasirib, agdawat koma iti Dios.” Kasapulan ni Joseph a maammuan no ania a simbaan ti umno, isu nga inkeddengna ti agsaludsod iti Dios.

Joseph Smith—Pakasaritaan 1:11–13

Ni Joseph iti kakaywan

Iti maysa nga agsapa ti panagsusulbod napan ni Joseph iti kakaywan iti asideg ti pagtaenganna tapno agkararag.

Joseph Smith—Pakasaritaan 1:14

Ni Joseph nga agkarkararag

Idi nagparintumeng ken nangrugi nga agkararag isuna, pinadas ni Satanas ti manglapped kenkuana. Ad-adda nga inkarigatan ni Joseph ti nagkararag, nga agdawdawat iti Nailangitan nga Ama para iti tulong.

Joseph Smith—Pakasaritaan 1:15–16

Ti Nailangitan nga Ama ken ni Jesucristo

Immay ti Nailangitan nga Ama ken ni Jesucristo ken ni Joseph Smith iti kasla adigi a lawag. Intudo ti Nailangitan nga Ama ni Jesus ket kinunana: “Daytoy ti Ay-ayatek nga Anakko. Dumngegka Kenkuana!”

Joseph Smith—Pakasaritaan 1:16–17

Jesus

Sinaludsod ni Joseph no ania a simbaan ti nasken a pakikappenganna. Imbagana kenkuana ni Jesus a saan a kumappeng iti ania man kadagitoy gapu ta biddutda amin.

Joseph Smith—Pakasaritaan 1:18–19

tattao a mangkakatawa ken ni Joseph

Idi imbaga ni Joseph iti sumagmamano a tao no ania ti nakita ken nangngegna, kinatkatawaanda isuna. Indadanes isuna dagiti dadaulo ti adu a lokal a simbaan.

Joseph Smith—Pakasaritaan 1:21–22

Ni Joseph nga agkarkararag

Napalabas ti tallo a tawen. Maysa a rabii idi agkarkararag ni Joseph tapno mapakawan dagiti basolna ken tapno maammuanna no ania ti nasken nga aramidenna.

Joseph Smith—Pakasaritaan 1:29

Ni Moroni nga agparparang ken ni Joseph

Nagparang ti maysa nga anghel nga agnagan iti Moroni ket imbagana ken ni Joseph maipapan iti maysa a libro a naisurat kadagiti balitok a pinanid. Nasken nga ipatarus ni Joseph dagitoy a pinanid iti Ingles.

Joseph Smith—Pakasaritaan 1:33–35

Ni Joseph a nakaidda

Kalpasan a pimmanaw ni Moroni, pinanunot ni Joseph maipapan iti imbaga ni Moroni kenkuana. Nagsubli ni Moroni iti namindua pay a gundaway iti dayta a rabii.

Joseph Smith—Pakasaritaan 1:44–47

Ni Joseph a mangitultulid iti bato

Iti sumaruno nga aldaw napan ni Joseph iti tuktok ti Turod ti Cumorah, a nakitana iti maysa a parmata. Idiay a nasarakanna ti maysa a dakkel a bato. Linikiabna ti bato babaen iti maysa a barreta.

Joseph Smith—Pakasaritaan 1:50–52

Ni Joseph a kumitkita kadagiti balitok a pinanid

Iti pandag ti bato ket maysa a kahon a bato. Iti ikikita ni Joseph iti kahon, nakitana dagiti balitok a pinanid.

Joseph Smith—Pakasaritaan 1:51–52

Ni Moroni nga agparparang ken ni Joseph

Nagparang ni Moroni ket imbagana ken ni Joseph a saanna nga alaen dagiti pinanid ngem agsubli iti kasta met la nga aldaw iti tunggal tawen iti uneg ti uppat a tawen. Tunggal kanito a napan ni Joseph, nangisuro kenkuana ni Moroni.

Joseph Smith—Pakasaritaan 1:53–54

Ni Moroni nga agparparang ken ni Joseph

Kalpasan ti uppat a tawen napalugodan ni Joseph iti kamaudiananna a mangala kadagiti pinanid a balitok. Inusarna ti Urim ken Tumim a nangipatarus iti sumagmamano kadagitoy.

Joseph Smith—Pakasaritaan 1:59, 62

Ni Joseph a kaduana ti para surat

Tinulongan dagiti para surat ni Joseph babaen ti panangisurat kadagiti balikas bayat ti panagipatarusna kadagitoy manipud kadagiti pinanid a balitok.

Joseph Smith—Pakasaritaan 1:67

Ni Joseph a kaduana ti agimalmaldit

Impan ni Joseph dagiti naipatarus a balikas iti maysa nga agimalmaldit ket impaaramidna dagitoy iti maysa a libro.

History of the Church 1:71

Libro ni Mormon

Maawagan ti libro iti Libro ni Mormon. Saritaen daytoy ti maipapan kadagiti tao a nagnaed iti America adun a tawen ti napalabas. Saritaenna pay ti maipapan ken ni Jesus, ti Anak ti Dios.

Pakauna iti Libro ni Mormon