Kapitulo 1
No Kasano a Naalatayo ti Libro ni Mormon
Idi agtawen ni Joseph Smith iti 14, adu a simbaan ti agkuna a pudnoda, ket dina ammo ti no ania kadagitoy ti pagkamenganna.
Maysa nga aldaw nabasa ni Joseph ti Santiago 1:5 iti Biblia: “No siasino man kadakayo ti agkurang iti kinasirib, agdawat koma iti Dios.” Kasapulan ni Joseph a maammuan no ania a simbaan ti umno, isu nga inkeddengna ti agsaludsod iti Dios.
Iti maysa nga agsapa ti panagsusulbod napan ni Joseph iti kakaywan iti asideg ti pagtaenganna tapno agkararag.
Idi nagparintumeng ken nangrugi nga agkararag isuna, pinadas ni Satanas ti manglapped kenkuana. Ad-adda nga inkarigatan ni Joseph ti nagkararag, nga agdawdawat iti Nailangitan nga Ama para iti tulong.
Immay ti Nailangitan nga Ama ken ni Jesucristo ken ni Joseph Smith iti kasla adigi a lawag. Intudo ti Nailangitan nga Ama ni Jesus ket kinunana: “Daytoy ti Ay-ayatek nga Anakko. Dumngegka Kenkuana!”
Sinaludsod ni Joseph no ania a simbaan ti nasken a pakikappenganna. Imbagana kenkuana ni Jesus a saan a kumappeng iti ania man kadagitoy gapu ta biddutda amin.
Idi imbaga ni Joseph iti sumagmamano a tao no ania ti nakita ken nangngegna, kinatkatawaanda isuna. Indadanes isuna dagiti dadaulo ti adu a lokal a simbaan.
Napalabas ti tallo a tawen. Maysa a rabii idi agkarkararag ni Joseph tapno mapakawan dagiti basolna ken tapno maammuanna no ania ti nasken nga aramidenna.
Nagparang ti maysa nga anghel nga agnagan iti Moroni ket imbagana ken ni Joseph maipapan iti maysa a libro a naisurat kadagiti balitok a pinanid. Nasken nga ipatarus ni Joseph dagitoy a pinanid iti Ingles.
Kalpasan a pimmanaw ni Moroni, pinanunot ni Joseph maipapan iti imbaga ni Moroni kenkuana. Nagsubli ni Moroni iti namindua pay a gundaway iti dayta a rabii.
Iti sumaruno nga aldaw napan ni Joseph iti tuktok ti Turod ti Cumorah, a nakitana iti maysa a parmata. Idiay a nasarakanna ti maysa a dakkel a bato. Linikiabna ti bato babaen iti maysa a barreta.
Iti pandag ti bato ket maysa a kahon a bato. Iti ikikita ni Joseph iti kahon, nakitana dagiti balitok a pinanid.
Nagparang ni Moroni ket imbagana ken ni Joseph a saanna nga alaen dagiti pinanid ngem agsubli iti kasta met la nga aldaw iti tunggal tawen iti uneg ti uppat a tawen. Tunggal kanito a napan ni Joseph, nangisuro kenkuana ni Moroni.
Kalpasan ti uppat a tawen napalugodan ni Joseph iti kamaudiananna a mangala kadagiti pinanid a balitok. Inusarna ti Urim ken Tumim a nangipatarus iti sumagmamano kadagitoy.
Tinulongan dagiti para surat ni Joseph babaen ti panangisurat kadagiti balikas bayat ti panagipatarusna kadagitoy manipud kadagiti pinanid a balitok.
Impan ni Joseph dagiti naipatarus a balikas iti maysa nga agimalmaldit ket impaaramidna dagitoy iti maysa a libro.
History of the Church 1:71
Maawagan ti libro iti Libro ni Mormon. Saritaen daytoy ti maipapan kadagiti tao a nagnaed iti America adun a tawen ti napalabas. Saritaenna pay ti maipapan ken ni Jesus, ti Anak ti Dios.