Kapitulo 22
Ti Mision ni Alma iti Ammonihah
Nagdanag ni Alma maipapan iti kinadangkes dagiti Nephite, isu nga inkeddengna a bubosen ti amin a panawenna a mangikasaba iti ebanghelio. Pinilina ni Nephihah a mangsukat kenkuana a kas pangulo nga ukom.
Insuro ni Alma ti ebanghelio iti intero a daga. Idi pinadasna ti mangikasaba iti Ammonihah, saan a dumngeg dagiti tao. Pinapanawda isuna iti ruar ti siudad.
Nagliday ni Alma gapu iti nalaus a kinadangkes dagiti tao ti Ammonihah. Pimmanaw a napan iti sabali a siudad.
Nagparang ti maysa nga angel ket nagliwliwa ken ni Alma. Imbaga ti anghel kenkuana nga agsubli iti Ammonihah ket mangasaba manen. Nagdardaras a nagsubli ni Alma.
Mabisin ni Alma. Idi sumrek isuna iti siudad, nagkiddaw iti maysa a lalaki iti sumagmamano a taraon. Imbaga ti anghel iti lalaki nga umay ni Alma ken maysa a propeta ti Dios ni Alma.
Daytoy a lalaki, ni Amulek, inkuyogna ni Alma iti pagtaenganna ket pinakanna isuna. Nagtalinaed ni Alma ken ni Amulek ken ti pamiliana iti uneg ti adu nga aldaw. Nagyaman isuna iti Dios para iti kaamaan ni Amulek ket binendisionanna ida.
Imbaga ni Alma ken ni Amulek maipapan iti pagrebbengenna a mangisuro kadagiti tao ti Ammonihah. Kimmuyog ni Amulek ken ni Alma tapno mangisuro kadagiti tao. Tinulongan ida ti Espiritu Santo.
Imbaga ni Alma kadagiti tao nga agbabawida wenno dadaelen ti Dios ida. Kinunana nga umayto ni Jesucristo ket isalakanna dagiti adda pammatina kenkuana ken nagbabawi.
Nakapungtot dagiti tao ti Ammonihah. Pinadasda nga iserrek ni Alma iti pagbaludan, ngem sinaluadan isuna ti Apo.
Kalpasanna nangrugi a nangisuro ni Amulek. Am-ammo ti adu kadagiti tao ni Amulek; saan a ganggannaet isuna a kas ken ni Alma. Imbagana kadakuada maipapan iti anghel a nakitana.
Kinuna ni Amulek a propeta ti Dios ni Alma ket nagsao iti kinapudno. Nasdaaw dagiti tao a dumngeg iti pammaneknek ni Amulek.
Nagpungtot ti sumagmamano kadagiti tao, nangnangruna iti maysa a nadangkes a tao nga agnagan iti Zeezrom. Pinadasda a sikapan ni Amulek babaen kadagiti saludsod, ngem imbagana kadakuada nga ammona ti maipapan iti planoda.
Tarigagayan ni Zeezrom ti mangdadael iti amin a banag a nasayaat. Isu ti mangigapu kadagiti parikut, ket kalpasanna bayadan dagiti tao iti kuarta a mangrisut kadagiti parikut a pinarnuayna.
Saan a nasikapan ni Zeezrom ni Amulek, isu nga indiayaanna iti kuarta tapno ibagana nga awan ti Dios. Ammo ni Amulek a sibibiag ti Dios ken ammo met ni Zeezrom daytoy ngem ad-adda nga ipatpategna ti kuarta ngem iti Dios.
Kalpasanna sinuruan ni Amulek ni Zeezrom maipapan ken ni Jesus ken maipapan iti Panagungar ken agnanayon a biag. Nasdaaw dagiti tao. Nagrugi a nagtigerger iti buteng ni Zeezrom.
Ammo ni Zeezrom nga adda bileg da Alma ken Amulek gapu ta ammoda ti pampanunotenna. Nagdamag ni Zeezrom kadagiti saludsod ket dimngeg bayat ti panangisuro kenkuana ni Alma iti ebanghelio.
Sumagmamano a tattao ti namati kada Alma ken Amulek ket nangrugida a nagbabawi ken nagadal kadagiti nasantuan a kasuratan.
Ngem kaaduan dagiti tattao ti nagtarigagay a mangpapatay kada Alma ken Amulek. Pinungoda ti dua a lallaki ket indatagda iti pangulo nga ukom.
Nagladingit ni Zeezrom iti panagbalinna a nadangkes ken panangisurona kadagiti tao iti inuulbod. Impakaasina kadagiti tao a ruk-atanda da Alma ken Amulek.
Napapanaw iti siudad ni Zeezrom ken dagiti dadduma pay a lallaki a namati kada Alma ken Amulek. Binato ida dagiti nadangkes a tattao.
Kalpasanna inummong dagiti nadangkes a tattao dagiti babbai ken ubbing a namati ket impuruakda ida, ken dagiti nasantuan a kasuratan, iti apuy.
Napilitan da Alma ken Amulek a mangbuya kadagiti babbai ken ubbing a matay iti apuy. Tinarigagayan ni Amulek nga usaren ti bileg ti Dios a mangisalakan kadakuada.
Ngem imbaga ni Alma ken ni Amulek a saanna a pagsardengen ti panagpapatay gapu ta asidegen a makadenna dagiti matmatayen a tao ti Dios ken madusanto dagiti nadangkes a tao.
Tinungpa ti pangulo nga ukom da Alma ken Amulek iti namin-adu a gundaway ken linaisna ida gapu ta dina insalakan dagiti maur-uram a babbai ken ubbing. Kalpasanna impupokna ida iti pagbaludan.
Immay iti pagbaludan dagiti dadduma pay a dakes a lallaki ket inabusoda da Alma ken Amulek iti adu a wagas, agraman ti panangpabisin kadakuada ken panangtupra kadakuada.
Kinuna ti pangulo nga ukom a no inusar da Alma ken Amulek ti bileg ti Dios a mangwayawaya iti bagbagida, mamati isuna. Tinungpana manen ida.
Timmakder da Alma ken Amulek. Nagkararag ni Alma ket indawatna iti Dios a papigsaenna ida gapu iti pammatida ken ni Cristo.
Napno da Alma ken Amulek iti bileg ti Apo, ket pinugsatda dagiti tali a nangpungo kadakuada. Nagbuteng dagiti dakes a lallaki ket pinadasda ti agtaray ngem nadalebda.
Nagunggon ti daga, ket naigabur dagiti pader ti pagbaludan kadagiti nadangkes a tattao. Sinalakniban ti Apo da Alma ken Amulek, ket saanda a nadangran.
Dimteng dagiti tao ti Ammonihah a mangkita no ania ti mapaspasamak. Idi makitada da Alma ken Amulek a rumrummuar iti narpuog a pagbaludan, nagbutengda ket nagtarayda.
Imbaga ti Apo kada Alma ken Amulek a mapanda iti Sidom. Idiay a nasarakanda dagiti nalinteg a tattao. Adda met sadiay ni Zeezrom ket masaksakit unay.
Naragsakan ni Zeezrom a makakita kada Alma ken Amulek. Nagdanag isuna a napapatayda gapu iti inaramidna. Indawatna kadakuada a mangagas kenkuana.
Namati ni Zeezrom ken ni Jesucristo ken nagbabawi kadagiti basolna. Idi inkararagan ni Alma isuna, dagus a naagasan ni Zeezrom.
Nabuniagan ni Zeezrom ket nangrugi a mangikasaba iti ebanghelio. Nabuniagan met ti adu a dadduma pay.
Pinapatay ti maysa a buyot ti Lamanite dagiti nadangkes a tattao ti Ammonihah, kas impadto ni Alma.