Kapitulo 7
Panangbangon iti Bapor
Kalpasan a nagkampo ti kaamaan ni Lehi iti igid ti baybay iti uneg ti adu nga aldaw, kinasao ti Apo ni Nephi. Imbagana kenkuana a mangbangon iti bapor a mangipan iti kaamaanna iti naikari a daga.
Saan nga ammo ni Nephi no kasano ti agaramid iti bapor, ngem kinuna ti Apo nga ipakitana kenkuana. Imbagana ken ni Nephi no sadino ti pakasarakan iti metal a pagaramid kadagiti ramit a kasapulanna.
Kinatawaan da Laman ken Lemuel ni Nephi iti panagtarigagayna a mangbangon iti bapor. Saanda a namati nga impakita ti Apo ken ni Nephi no kasano nga aramiden daytoy. Nagkedkedda a tumulong.
Imbaga ni Nephi kada Laman ken Lemuel nga agbabawida ken saanda nga agsukir. Impalagipna kadakuada a nakitada ti maysa nga anghel. Kasta met nga imbagana kadakuada nga addaan ti Dios iti bileg nga agaramid iti amin a banag.
Nagpungtot da Laman ken Lemuel ken ni Nephi ket kayatda nga itappuak isuna ti baybay.
Idi nakaasidegda kenkuana, imbilin ni Nephi kadakuada a dida sagiden isuna gapu ta napnuan iti pannakabalin ti Dios. Nagbuteng da Laman ken Lemuel iti uneg ti adu nga aldaw.
Kalpasanna imbaga ti Apo ken ni Nephi a sagidenna da Laman ken Lemuel. Idi inaramid ni Nephi, pinagkintayeg ida ti Apo. Ammo da Laman ken Lemuel nga adda ti pannakabalin ti Dios ken ni Nephi.
Imbaga ni Nephi kada Laman ken Lemuel nga agtungpalda kadagiti nagannak kadakuada ken agtungpalda iti Dios. Kinuna ni Nephi a no aramidenda daytoy, mabendisionandanto.
Nagbabawi da Laman ken Lemuel ket tinulonganda ni Nephi a mangbangon iti bapor.
Napan ni Nephi iti bantay iti adu a gundaway tapno agkararag para iti tulong. Insuro ti Apo kenkuana no kasano ti mangbangon iti bapor.
Idi nalpas ni Nephi ken dagiti kakabsatsa a nangbangon iti bapor, ammoda a nasayaat a bapor daytoy. Nagyamanda iti Dios iti panangtulongna kadakuada.