Kapitulo 38
Ti Pannakapapatay ti Pangulo nga Ukom
Nagbalin dagiti nadangkes a lallaki nga ukom dagiti Nephite. Dinusada dagiti nalinteg a tao ngem saanda a dinusa dagiti nadangkes a tao.
Nagliday ni Nephi a makakita iti napalalo a kinadangkes kadagiti tao.
Maysa nga aldaw agkarkararag isuna iti maysa a torre iti minuyonganna. Ti minuyonganna ket adda iti asideg ti nalawa a kalsada nga agturong iti maysa a tiendaan iti Zarahemla.
Mangngeg dagiti tao a lumablabas iti nalawa a kalsada ti panagkararag ni Nephi. Nagguummong ti dakkel a grupo, a masmasdaawda no apay a nalaus unay ti panagleddaangna.
Idi makita ni Nephi dagiti tao, imbagana kadakuada a ti kinadangkes dagiti tao ti gapu ti panagleddaangna. Imbagana kadakuada nga agbabawida.
Binallaaganna ida a no saanda nga agbabawi, alaen dagiti kabusorda dagiti pagtaengan ken siudadda ket saanto a tulongan ida ti Apo a mangranget kadagiti kabusorda.
Kinuna ni Nephi a nadangdangkes dagiti Nephite ngem dagiti Lamanite gapu ta nasuruan dagiti Nephite kadagiti bilin ngem saanda nga agtungtungpal kadagitoy.
Kinunana a no saan nga agbabawi dagiti Nephite, madadaeldanto.
Adda idiay dagiti sumagmamano a nadangkes nga ukom. Kinayatda a dusaen dagiti tao ni Nephi para iti panagsaona a maibusor kadakuada ken iti paglinteganda.
Immanamong ti sumagmamano a tattao kadagiti nadangkes nga ukom. Namati dagiti dadduma ken ni Nephi; ammoda nga isu ket propeta ken agsasao iti kinapudno.
Imbaga ni Nephi kadagiti tao a nagalsada a maibusor iti Dios ken madusadanto iti mabiit no saanda nga agbabawi.
Imbaga ni Nephi kadagiti tao a sapulenda ti pangulo nga ukomda. Naudatal iti bukodna a dara, a pinapatay ti kabsatna a nagtarigagay iti posisionna.
Nagtaray ti lima a lallaki manipud iti kaaduan tapno kitaenda ti pangulo nga ukom. Saanda a namati a maysa a propeta ti Dios ni Nephi.
Idi nakitada ni Seezoram, ti pangulo nga ukom, a naudatal iti darana, natuangda iti daga iti butengda. Ita ammoda a maysa a propeta ni Nephi.
Nakitan dagiti katulongan ni Seezoram ti pangulo nga ukom ken nagtarayda a mangibaga kadagiti tao. Nagsublida ket nasarakanda dagiti lima a lallaki a nakaidda sadiay.
Impagarup dagiti tao a dagiti lima a lallaki ti nangpapatay ken ni Seezoram.
Impupokda iti pagbaludan dagiti lima a lallaki ket kalpasanna impadamagda iti intero a siudad a napapatay ti pangulo nga ukom ket naibalud dagiti pimmatay.
Iti kabigatanna napan dagiti tao iti lugar a pakaitaneman ti pangulo nga ukom. Dinamag dagiti ukom nga adda iti minuyongan ni Nephi no sadino ti yan dagiti lima a lallaki.
Indawat dagiti ukom a mangkita kadagiti napabasol a pimmatay.
Dagiti napabasol a pimmatay ket dagiti lima a lallaki a nagtaray manipud iti minuyongan ni Nephi a napan iti pangulo nga ukom.
Kinuna dagiti lima a lallaki a nasarakanda ti pangulo nga ukom a naudatal iti dara, kas met laeng iti kinuna ni Nephi. Kalpasanna pinabasol dagiti ukom ni Nephi iti panangibaon iti maysa a tao a mangpapatay ken ni Seezoram.
Iti pannakaammoda a maysa a propeta ni Nephi, simmupiat dagiti lima a lallaki kadagiti ukom, ngem saanda a dumngeg. Pinapungoda ni Nephi.
Nangidiaya dagiti ukom ken ni Nephi iti kuarta ken ti biagna no ibagana nga isu ti nakipagkumplot a mangpapatay iti pangulo nga ukom.
Imbaga ni Nephi nga agbabawi iti kinadangkesda. Kalpasanna, imbagana kadakuada a mapanda ken ni Seantum, kabsat a lalaki ni Seezoram.
Imbaga ni Nephi kadakuada a damagenda ken ni Seantum no isuda ken ni Nephi ti nagkumplot a mangpapatay ken ni Seezoram. Kinuna ni Nephi nga ibaga ni Seantum ti “saan.”
Kalpasanna dinamag dagiti ukom ken ni Seantum no pinatayna ti kabsatna a lalaki. Ibaga manen ti Seantum ti “saan,” ngem makita dagiti ukom ti dara iti kagayna.
Kinuna ni Nephi nga agtigerger ken bumsagto ni Seantum ket iti kamaudianan ipudnona ti panangpatayna iti kabsatna a lalaki.
Napan dagiti ukom iti balay ni Seantum, ket napasamak ti amin a banag kas iti kinuna ni Nephi a mapasamak. Nawayawayaan ni Nephi ken dagiti lima a lallaki.
Bayat ti yaadayo dagiti tao ken ni Nephi, sumagmamano ti nagkuna nga isu ti propeta; kinuna ti dadduma nga isu ti dios. Nagawid ni Nephi, a maleddaangan pay laeng maipapan iti kinadangkesda.