Kapitulo 8
Panagballasiw iti Baybay
Imbaga ti Apo ken ni Lehi nga ikuyogna ti kaamaanna iti bapor a binangonda. Kinargaanda daytoy iti bunga, karne, ken tagapulot ti uyokan ken bukbukel nga imula iti naikari a daga.
Dagiti napigsa nga angin ti nangpapardas iti bapor nga agturong iti naikari a daga.
Nangrugi a nagbalin a nadangkes da Laman, Lemuel, ken dagiti sumagmamano a dadduma pay. Idi imbaga ni Nephi kadakuada nga agsardeng, nagpungtotda ket pinungoda isuna iti lubid.
Gapu iti kinadangkesda, nagsardeng a nagandar ti Liahona. Saanda nga ammo ti dalan a mangiturong iti bapor. Maysa a nakabutbuteng a bagyo ti nangpasanud iti bapor iti tallo nga aldaw.
Imbaga ni Lehi kada Laman ken Lemuel a ruk-atanda ni Nephi, ngem saanda a dumngeg. Kimmapsut unay da Lehi ken Saria ket naidalitda iti sakit.
Nagsangit ti asawa ni Nephi ken dagiti annakna. Impakaasida kada Laman ken Lemuel a ruk-atanda ni Nephi, ngem nagkedkedda.
Iti maikapat nga aldaw ad-adda a rimmungsot ti bagyo. Dumanin lumned ti bapor.
Ammo da Laman ken Lemuel nga imbaon ti Dios ti bagyo. Nagbutengda amangan no malmesda.
Iti kamaudiananna nagbabawi da Laman ken Lemuel ket rinuk-atanda ni Nephi. Uray no limteg ken nasakit dagiti pungupunguan ken palaypalayna gapu iti pannakapungona, saan a nagdayamudom ni Nephi.
Kalpasanna pinidut ni Nephi ti Liahona, ket nagandar manen daytoy. Nagkararag ni Nephi, ket nagsardeng ti angin. Nagtalna ti baybay.
Inturong ni Nephi ti bapor, ket naglayag manen nga agturong iti naikari a daga.