Kapitulo 45
Isuro ni Jesucristo maipapan iti Sakramento ken Kararag
Imbaon ni Jesucristo dagiti disipulona a mangala iti sumagmamano a tinapay ken arak. Imbagana kadagiti Nephite nga agtugawda iti daga.
Idi nagsubli dagiti disipulo, pinispisi ti Mangisalakan ti tinapay iti babassit ken binendisionanna daytoy. Intedna ti sumagmamano kadagiti disipulona ket impaitedna kadakuada ti sumagmamano kadagiti tao.
Kinuna ni Jesus nga ikari dagiti tao nga umawat iti sakramento a kanayon a manglaglagip kenkuana ken ti sakripisiona. Kalpasanna inawatda ti Espirituna.
Binendisionan ni Jesucristo ti arak ket nangted iti sumagmamano kadagiti disipulona. Nangted dagiti disipulo iti sumagmamano nga arak kadagiti tao.
Kinuna ni Jesus nga ikari dagiti umawat iti sakramento nga agtungpal kadagiti bilinna.
Imbaga manen ni Jesus kadagiti disipulona a maaddaanto iti Espirituna ti tunggal maysa nga umawat iti sakramento ken manglaglagip kenkuana.
Imbagana kadagiti disipulona a mabendisonanda no agtungpalda kadagiti bilin.
Imbagana kadakuada nga agkararagda a kanayon ken agkararagda kas iti pannakakitada kenkuana nga agkararag.
Imbaga ti Mangisalakan iti amin a Nephite nga agkararagda iti Nailangitan nga Ama iti naganna. Binilinna pay ida nga agkararagda a kagiddan dagiti pamiliada.
Kinunana a nasken nga aguummong a masansan dagiti tao. Nasken a pasangbayenda dagiti dadduma kadagiti mitingda, ikararaganda ida, ken agbalinda a nasayaat a pagwadan kadakuada.
Inikkan ti Mangisalakan dagiti disipulona iti bileg a mangted iti Espiritu Santo. Kalpasanna kinumotan ti ulep dagiti tao tapno dagiti laeng disipulo ti makakita ken ni Jesucristo nga umuli iti langit.