Kapitulo 21

Dagiti Amlicite

Nasikap, nadangkes a tao ni Amlici nga agtarigagay nga agbalin nga ari dagiti Nephite. Adu dagiti pasurotna.

Alma 2:1–2

Saan a kayat dagiti nalinteg a Nephite a ni Amlici ti agbalin nga arida. Ammoda a kayatna a dadaelen ti Simbaan ti Dios.

Alma 2:3–4

Nagguummong dagiti Nephite iti nadumaduma a grupo tapno ikeddeng no nasken nga agbalin nga ari ni Amlici. Kaaduan kadagiti tao ti nagbutos a maisuppiat ken ni Amlici, ket saan a nagbalin nga ari isuna.

Alma 2:5–7

Nagpungtot ni Amlici ken dagiti pasurotna. Pinanawanda dagiti Nephite, inaramidda ni Amlici nga arida, ken inawaganda dagiti bagbagida iti Amlicite. Biinilin ni Amlici ida a makiranget kadagiti Nephite.

Alma 2:8–18

Nagsagana dagiti nalinteg a Nephite a mangdepensa iti bagbagida kadagiti bai ken pana, espada, ken dadduma pay nga armas.

Alma 2:12

Dimmarup dagiti Amlicite, ken dagiti Nephite, nga indauluan ni Alma ken pinapigsa ti Apo, ket pinapatayda ti adu kadakuada. Nagtaray dagiti nabati pay nga Amlicite.

Alma 2:15–19

Nangibaon ni Alma kadagiti espia a mangbantay kadagiti Amlicite. Nakita dagiti espia ida a kumappeng iti dakkel a buyot dagiti Lamanite ken dumarup kadagiti Nephite nga agnanaed iti asideg ti Zarahemla.

Alma 2:21, 24–25

Nagkararag dagiti Nephite, ket tinulongan manen ti Dios ida. Napapatayda ti adu a soldado ti buyot ti Lamanite-Amlicite.

Alma 2:28

Nagranget da Alma ken Amlici iti tunggal maysa babaen iti espada. Nagkararag ni Alma a maispal koma ti biagna, ket nangted ti Dios kenkuana iti pigsa a mangpatay ken ni Amlici.

Alma 2:29–31

Kinamat dagiti Nephite dagiti Lamanite ken Amlicite agingga iti langalang Adu kadagiti nasugatan ti natay idiay ken kinnan ida dagiti atap nga ayup.

Alma 2:36–38

Kas kadagiti Lamanite, minarkaan dagiti Amlicite ti bagbagida iti nalabaga, a mangipatungpal iti maysa a pammadto. Insina dagiti Amlicite ti bagbagida manipud kadagiti bendision ti ebanghelio.

Alma 3:4, 14, 18–19