Kapitulo 43
Agpakita ni Jesucristo kadagiti Nephite
Agsasarita dagiti tao maipapan ken ni Jesucristo ken ti tanda ti ipapatayna.
Bayat ti panagsasaritada, nangngegda ti naulimek a timek manipud iti langit. Napabarana dagiti puspusoda.
Idi damo saanda a naawatan ti timek, ngem idi nagsao daytoy iti maikatlo a gundaway, naawatanda daytoy.
Timek daytoy ti Nailangitan nga Ama. Daytoy ti nangyam-ammo ken ni Jesucristo ken nangibaga kadagiti tao a dumngegda kenkuana.
Bimmaba manipud iti langit ni Jesucristo ket nagtakder kadagiti tao. Nagbutengda nga agsao gapu ta saanda a maawatan no ania ti mapaspasamak. Impagarupda a maysa nga anghel ni Jesus.
Imbagana kadakuada nga isu ni Jesucristo, ti maysa nga imbaga dagiti propeta nga umay.
Imbaga ni Jesus kadagiti tao nga umayda ket riknaenda dagiti marka ti bakrangna ken kadagiti ima ken sakana, a nakailansaanna iti krus.
Tinarigagayan ni Jesus a maammuan dagiti tao nga isu ti Diosda ken natay isuna para kadagiti basbasolda.
Saggaysa a rinikna dagiti tao dagiti marka iti bakrang, ima, ken saka ni Jesus. Ammo dagiti tao nga Isu ti Mangisalakan.
Kalpasanna dinayaw dagiti tao ni Jesus ken nagruknoyda iti sakaananna ken nagdaydayawda kenkuana.
Inawagan ni Jesus ni Nephi ken dagiti 11 a sabali pay a lallaki nga umasidegda kenkuana. Intedna kadakuada ti bileg ti saserdote ken insurona kadakuada ti umno a wagas ti panagbuniag.
Imbagana kadagiti Nephite a mamati kenkuana, agbabawi, ken agtungpalda kadagiti bilin. No saanda nga aramiden, saanda a makastrek iti pagarianna.
Sinuruanna dagiti Nephite no kasano ti agkararag iti Nailangitan nga Ama. Sinuruanna pay ida maipapan iti panagayuno ken kinunana a mapakawanda no pinakawanda ti tunggal maysa.
Kalpasan ti panangisurona kadagiti tao iti adu a banag, imbaga ni Jesus kadakuada nga agawid ken agkararag maipapan iti no ania ti kinunana.
Nangrugi a nagsangit dagiti Nephite. Dida pay la tinarigagayan a pumanaw ni Jesus.
Inayat ni Jesus dagiti Nephite. Imbagana kadakuada a mangyeg kenkuana kadagiti tao a masakit wenno nadangran tapno maagasanna ida.
Inagasan ni Jesus dagitoy a tattao. Nagtamed ti tunggal maysa ket nagdaydayaw kenkuana.